বিবাহ উপলক্ষে প্ৰায় এমাহ ছুটি লৈ ঘৰলৈ আহিছিল নৌসেনাৰ লেফটেনেণ্ট বিনয় নৰৱেল৷ মাত্ৰ ৭দিন পূৰ্বে ২৬ বছৰীয়া বিনয়ৰ সৈতে বিবাহপাশত আৱদ্ধ হৈছিল ২৪ বছৰীয়া হিমাংশী নৰৱেল৷ হানিমুনত তেওঁলোক ইউৰোপলৈ যোৱাৰ কথা আছিল৷ কিন্তু ভিছাৰ জটিলতাৰ বাবে সেই পৰিকল্পনা ৰৈ যায়৷ হানিমুনত বিদেশ যাত্ৰাৰ প্লেন সলনি কৰি নৱদম্পতিয়ে ভূস্বৰ্গ কাশ্মীৰলৈ যোৱাৰ পৰিকল্পনা কৰে৷ পৰিকল্পনা মতে কাশ্মীৰত উপস্থিত হৈছিল দুয়ো৷ কিন্তু মঙলবাৰে অনন্তনাগ জিলাৰ পহেলগামত সন্ত্ৰাসবাদীৰ আক্ৰমণত প্ৰাণ হেৰুৱালে নৌসেনাৰ লেফটেনেণ্টে৷ হানিমুনতেই বিধৱাৰ সাজ পিন্ধিলে গুৰুগ্ৰামৰ কন্যা হিমাংশীয়ে৷
মঙলবাৰে সন্ধিয়া বিনয়ৰ হত্যাৰ খবৰ পায় পৰিয়ালে৷ আকাশ ভাঙি পৰে দুই পৰিয়ালৰ মূৰত৷ ভয়ংকৰ ঘটনাৰ বিৱৰণ দিবলৈ গৈ কান্দোনত ভাঙি পৰিছে হিমাংশী৷ তেওঁৰ এটা ভিডিঅ ভাইৰেল হৈছে সামাজিকমাধ্যমত৷ হিমাংশীয়ে সেই ভিডিঅত কৈছে, ‘আমি দুজনে ভেলপুৰী খাই আছিলো৷ হঠাৎ এজন লোকে আহি কয়, এইটো মুছলমান নহয় গুলি কৰা৷’ লগে লগেই গুলি চলে মোৰ হাজবেণ্ডৰ ওপৰত৷ মোক কিন্তু এৰি দিয়ে৷’
বিগত ১৬ এপ্ৰিলত গুৰুগ্ৰামত বিনয়-হিমাংশীৰ বিবাহ সম্পন্ন হৈছিল৷ ১৯ এপ্ৰিলত প্ৰীতিভোজৰ আয়োজন কৰাৰ পাছতেই ২১ এপ্ৰিলত দুয়ো জম্মু-কাশ্মীৰলৈ গৈছিল৷ পৰিয়ালে দিয়া তথ্য অনুসৰি মধুচন্দ্ৰিমাৰ পৰা উভতি আহিয়েই আকৌ এটা পৰিকল্পনা আছিল বিনয়ৰ৷ আগন্তুক ২৭ মেত বিনয়ৰ জন্মদিন৷ পুত্ৰৰ জন্মদিনো এইবাৰ ভালকৈ পালন কৰাৰ কথা ভাৱিছিল পিতৃ-মাতৃয়ে৷ কিন্তু আশাবোৰ আশা হৈয়েই ৰ’ল৷ জীৱন্তে ঘৰলৈ ঘূৰি অহা নহ’ল বিনয়ৰ৷ তেওঁৰ দেহ আনিবলৈ আজি ৰাওনা হৈছে পৰিয়ালৰ সদস্য৷ সদ্য বিবাহিত হিমাংশীৰ সন্মুখত যেন এক অন্ধকাৰ ভৱিষ্যৎ৷ সপোন দেখিবলৈ আৰম্ভ কৰোতেই সপোন ভাঙি যোৱাৰ যন্ত্ৰণা কি সেয়া তিলতিলকৈ অনুভৱ কৰিছে হিমাংশীয়ে৷ হিমাংশীয়ে হেৰুৱাই পেলাইছে মুখৰ মাতো৷ কি ক’ব, কেনেকৈ ক’ব৷ চকুৰ সন্মুখতে তেজেৰে লুটুৰি পুতুৰি হৈ হেৰাই গ’ল তেওঁৰ স্বামী৷ হেৰাই গ’ল এটা সুন্দৰ ভৱিষ্যতৰ সপোন৷ সন্ত্ৰাসবাদৰ ওচৰত হাৰ মানিলে এক প্ৰতিভাৱান নৌসেনা বিষয়াই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
