অপাৰেছন সিন্দূৰত টাৰ্গেট কৰা হৈছিল পাক পৰমাণু অস্ত্ৰভাণ্ডাৰকো? সেই কথা বহু সংবাদমাধ্যমত প্ৰকাশ পাইছিল৷ কিন্তু কিৰানা পাহাৰত আঘাত কৰাৰ কথা মিছা বুলি জনালে এয়াৰ মাৰ্ছেল এ কে ভাৰতীয়ে৷ সোমবাৰে অপাৰেছন সিন্দূৰক লৈ সংবাদমেল সম্বোধন কৰিছে ভাৰতীয় সেনাই৷ সাংবাদিকৰ প্ৰশ্নৰ উত্তৰত এয়াৰ মাৰ্ছেল একে ভাৰতীয়ে কয়, ‘কিৰানা পাহাৰত পাকিস্তানৰ পাৰমাণৱিক অস্ত্ৰ ভাণ্ডাৰ আছে৷ সেয়া আমাক জনোৱাৰ বাবে ধন্যবাদ৷ যতেই নাথাকক কিয় আমি কিৰানা পাহাৰত আক্ৰমণ কৰা নাই৷ আমি যেতিয়া আক্ৰমণ চলাইছিলো তেতিয়া সেই আক্ৰমণ কৰা স্থানৰ তালিকাত কিৰানা পাহাৰ নাছিল৷’
পাকিস্তান পঞ্জাৱ প্ৰদেশত সাৰগোধা বিমানঘাঁটি৷ এই বিমানঘাঁটিৰ কাষতেই আছে কিৰানা পাহাৰ৷ ধাৰণা কৰা হৈছে এই পাহাৰতেই সম্ভৱত পাৰমাণৱিক অস্ত্ৰ মজুত ৰাখিছে পাকিস্তানে৷ এই কিৰানা পাহাৰতেই আক্ৰমণ চলাইছে ভাৰতে বুলি সামাজিক মাধ্যমত কিছু তথ্য প্ৰচাৰ হৈ আছিল৷ আনকি কোৱা হৈছিল পাৰমাণৱিক অস্ত্ৰ ভাণ্ডাৰত আক্ৰমণ কৰাৰ কাৰণেই পাকিস্তানত ভূমিকম্প হৈছে৷
সংবাদমেল সন্মিলনত এয়াৰ মাৰ্ছেল এ কে ভাৰতীয়ে কয়, আমাৰ ৩ বাহিনীয়ে কেনেকৈ পাকিস্তানৰ সন্ত্ৰাসবাদী ঘাঁটিত আঘাত কৰিছিলো সেই বিষয়ে আমি জনাইছো৷ আমাৰ যুঁজ সন্ত্ৰাসবাদৰ বিৰুদ্ধেহে৷ পাক সেনাৰ বিৰুদ্ধে নহয়৷ কিন্তু দুঃখৰ বিষয় এয়াই যে পাকসেনাৰ সৈতে নিজকে একলগ কৰি লৈছে সন্ত্ৰাসবাদীয়ে৷ সেয়ে আমি তেওঁলোককো জৱাব দিবলৈ বাধ্য হৈছো৷ বিগত ৭ মে’ত আমি কেৱল সন্ত্ৰাসবাদীকহে আক্ৰমণ কৰিছিলো৷ কিন্তু পাকিস্তানী সেনা সন্ত্ৰাসবাদীৰ কাষত থিয় দিলে৷ ইয়াৰ বাবে তেওঁলোকৰ যি ক্ষতি হৈছে তাৰবাবে তেওঁলোক নিজেই দায়ী৷ তেওঁলোকৰ আক্ৰমণৰ সন্মুখত আমাৰ এয়াৰ ডিফেন্স চিষ্টেম পাহাৰ হৈ থিয় দিলে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
