বৰষুণ-বান-ধুমুহাৰ তাণ্ডৱ, অসমসহ উত্তৰপূৱৰ ৪ ৰাজ্যত প্ৰাণ হেৰুৱালে ৩০ লোকে
বৰ্তমানে বৰষুণ, বান আৰু ধুমুহাৰ কবলত উত্তৰ পূব। যাৰ ফলত বিগত কেইবাদিনো ধৰি নেৰানেপেৰা বৰষুণৰ বাবে জনজীৱন ব্যাহত হৈ পৰিছে। এতিয়াও শাম কটা নাই বৰষুণৰ প্ৰভাৱ। তাৰ মাজতে আকৌ উত্তৰ-পূবৰ ৰাজ্যসমূহত কেইবাদিনো ধৰি অবিৰত বৰষুণৰ ফলত নদীসমূহত হোৱা বাঢ়নী পানীয়ে বানপানীৰ বিধ্বংসী ৰূপ ধাৰণ কৰিছে।
বৰ্তমানলৈকে অসম, মিজোৰাম, অৰুণাচল প্ৰদেশ আৰু মণিপুৰত বৰষুণ, বানপানী আৰু ভূমিস্খলনৰ ফলত ৩০ জন লোকৰ মৃত্যু হোৱাৰ লগতে বহু লোক আহত হোৱাৰ খবৰ পোৱা গৈছে। বান পৰিস্থিতিৰ পৰিপ্ৰেক্ষিতত বহু অঞ্চলত সতৰ্কতা জাৰি কৰা হৈছে।
বতৰ বিজ্ঞান বিভাগে আগন্তুক দিনত এই ৰাজ্যসমূহত প্ৰবলৰ পৰা অতি প্ৰবল বৰষুণৰ সম্ভাৱনা থকা কথা জাৰি কৰিছে। এই সন্দৰ্ভত বতৰ বিজ্ঞান বিভাগে এক সতৰ্কবাণী জাৰি কৰিছে।
অসমত ধাৰাবাহিকভাৱে হোৱা ধাৰাসাৰ বৰষুণৰ ফলত বানপানী আৰু ভূমিস্খলনৰ ফলত এতিয়ালৈকে ৮ জন লোকৰ মৃত্যু হৈছে। ধাৰাসাৰ বৰষুণৰ ফলত ১৭খন জিলা বুৰাই পেলোৱাৰ লগতে ৭৮ হাজাৰৰো অধিক লোক ক্ষতিগ্ৰস্ত হৈছে।
মিজোৰামতো ভূমিস্খলন হৈছে, যাৰ ফলত চাৰিজন লোকৰ মৃত্যু হৈছে – ইয়াৰে তিনিজন ম্যানমাৰৰ শৰণাৰ্থী – আৰু আন এজন আহত হৈছে। পিটিআইৰ প্ৰতিবেদন অনুসৰি ৰাজ্যত বৰ্তমান বৰষুণৰ ফলত মৃত্যু হোৱা লোকৰ মুঠ সংখ্যা পাঁচজনলৈ বৃদ্ধি পাইছে।
মেঘালয়ত ধাৰাসাৰ বৰষুণৰ ফলত দুগৰাকী ছোৱালীৰ বজ্ৰপাতৰ ফলত মৃত্যু হোৱাৰ লগতে আন এজন লোকৰ মৃত্যু। পিটিআইৰ তথ্য অনুসৰি বিগত তিনিদিনত ৬ জন লোকৰ মৃত্যু হৈছে। ভূমিস্খলন, ক্ষন্তেকীয়া বানপানী আৰু বিদ্যুৎ যোগানৰ ব্যাঘাতৰ ফলত ৪৯খন গাঁৱৰ প্ৰায় ১১০০ জন লোক ক্ষতিগ্ৰস্ত হৈছে।
অৰুণাচল প্ৰদেশতো একেই অৱস্থা। মুখ্যমন্ত্ৰী পেমা খাণ্ডুৱে ভূমিস্খলনৰ ফলত ৯ জন লোকৰ মৃত্যু হোৱা বুলি প্ৰকাশ কৰিছে। পূব কামেঙত ৭ জন আৰু জিৰো উপত্যকাত ২ জন – আৰু ক্ষতিগ্ৰস্ত পৰিয়ালৰ প্ৰতিটোৰ বাবে ৪ লাখ টকাৰ এক্স-গ্ৰেটিয়া ঘোষণা কৰে। বতৰ বিজ্ঞান কেন্দ্ৰই ১ জুনৰ পৰা ৫ জুনলৈ প্ৰচণ্ড বৰষুণ, ধুমুহা আৰু বজ্ৰপাতৰ পূৰ্বাভাস প্ৰকাশ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
