আজিৰে পৰা ট্ৰাম্পৰ ‘ভ্ৰমণ নিষেধাজ্ঞা’ আৰম্ভ, এই ১২ দেশৰ লোকে প্ৰৱেশ কৰিব নোৱাৰিব আমেৰিকাত
আজি ৯ জুন তাৰিখৰ পৰা আমেৰিকাত আৰম্ভ হৈছে এক বিশেষ নীতি, কাৰণ আজিৰে পৰা আমেৰিকাত আৰম্ভ তথা কাৰ্যকৰী হৈছে ‘ভ্ৰমণ নিষেধাজ্ঞা’। যাৰ অৰ্থ ট্ৰাম্পে জাৰি কৰা ‘ভ্ৰমণ নিষেধাজ্ঞা’ৰ অন্তৰালত আজিৰে পৰা আমেৰিকাত প্ৰৱেশ কৰিব নোৱাৰিব নিৰ্ধাৰিত ১২ দেশৰ লোকে।
আমেৰিকাত অনুপ্ৰৱেশ বলবৎকৰণক লৈ ক্ৰমাৎ উত্তেজনা বৃদ্ধি পোৱাৰ মাজতে আজি কাৰ্যকৰী হৈছে ড’নাল্ড ট্ৰাম্পৰ ভ্ৰমণ নিষেধাজ্ঞা নীতি। বিগত বুধবাৰে ৰাষ্ট্ৰপতি ট্ৰাম্পে এক আদেশত স্বাক্ষৰ কৰি ১২খন দেশৰ লোকক আমেৰিকাত প্ৰৱেশ কৰাত নিষেধাজ্ঞা আৰোপ কৰিছিল।
বুধবাৰে ঘোষণা কৰা এই নিষেধাজ্ঞা আফগানিস্তান, ম্যানমাৰ, চাড, কংগো ৰিপাব্লিক, ইকুৱেটৰিয়েল গিনি, ইৰিত্ৰিয়া, হাইটি, ইৰাণ, লিবিয়া, ছোমালিয়া, চুডান আৰু য়েমেনৰ নাগৰিকৰ ক্ষেত্ৰত প্ৰযোজ্য। এই সম্প্ৰসাৰিত নিষেধাজ্ঞা বুৰুণ্ডি, কিউবা, লাওছ, ছিয়েৰা লিয়ন, ট’গো, তুৰ্কমেনিস্তান আৰু ভেনিজুৱেলাৰ লোকৰ ক্ষেত্ৰত প্ৰযোজ্য যিসকল আমেৰিকাৰ বাহিৰত আছে আৰু তেওঁলোকৰ বৈধ ভিছা নাই।
আজিৰ পৰাই এই নীতি কাৰ্যকৰী হ’ব, কিন্তু এই নীতিৰ অন্ত কেতিয়া পৰিব সেই সন্দৰ্ভত কোনো নিৰ্দিষ্ট তাৰিখ নাই।
উল্লেখ্য যে, প্ৰথম কাৰ্যকালতো ড’নাল্ড ট্ৰাম্পে ২০১৭ চনৰ জানুৱাৰী মাহত এক নিৰ্দেশ জাৰি কৰিছিল, য’ত সাতখন মুছলমান দেশৰ নাগৰিকক আমেৰিকালৈ যোৱাত নিষেধাজ্ঞা আৰোপ কৰা হৈছিল। এই দেশসমূহৰ ভিতৰত আছিল ইৰাক, ছিৰিয়া, ইৰাণ, চুডান, লিবিয়া, ছোমালিয়া আৰু য়েমেন।
২০১৭ চনত ট্ৰাম্পৰ এই আদেশৰ পিছতে এই ৭ মুছলমান দেশসমূহৰ নাগৰিক বহু অশান্তিত দিছিল। কিছুমান যাত্ৰীক হয় আমেৰিকালৈ অহা বিমানত উঠিবলৈ বাধা দিয়া হৈছিল নহয় অৱতৰণৰ পিছত আমেৰিকাৰ বিমানবন্দৰত আটক কৰা হৈছিল।
ট্ৰাম্পৰ এই আদেশক মুছলমান নিষেধাজ্ঞা বুলিও কোৱা হৈছিল। বহুতে ইয়াৰ বিৰোধিতা কৰিছিল আৰু আদালতত প্ৰত্যাহ্বান জনাইছিল যদিও ২০১৮ চনত আমেৰিকাৰ উচ্চতম ন্যায়ালয়ে ইয়াৰ পৰিৱৰ্তিত সংস্কৰণত অনুমোদন জনাইছিল।
এইবাৰ নতুন নিষেধাজ্ঞাৰো অন্তৰ্গত বহু মুছলমান দেশ। এইবাৰো নিষেধাজ্ঞাৰ তালিকাত অন্তৰ্ভুক্ত হোৱা ১২ দেশৰ নাগৰিক পূৰ্বৰ দৰে সমস্যাত পৰাৰ সম্ভৱনাই দেখা দিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
