১ জুলাইৰ পৰা সলনি হ’ব তৎকালীন টিকটৰ নিয়ম, সাধাৰণ যাত্ৰীসকলৰ বাবে সকাহ
ভাৰতীয় ৰেলৱেই ১১ জুন বুধবাৰে তৎকালীন টিকট বুকিং ব্যৱস্থাত কেইবাটাও সংশোধনীৰ কথা ঘোষণা কৰে। নতুন বিধানত অনলাইন তৎকালীন বুকিঙৰ বাবে আধাৰ ভিত্তিক পৰীক্ষণ বাধ্যতামূলক কৰা হৈছে। অৰ্থাৎ আই আৰ চি টি চি এপত আধাৰ লিংক নথকাসকলে তৎকালীন টিকট বুকিং কৰিব নোৱাৰিব।
ৰে’ল মন্ত্ৰালয়ৰ এগৰাকী মুখপাত্ৰই কয় যে ইয়াৰ উদ্দেশ্য হৈছে সকলোৰে বাবে তৎকালীন টিকটৰ সমান সুবিধা নিশ্চিত কৰা আৰু অপব্যৱহাৰ ৰোধ কৰা।
লগতে ইয়াকো কয় যে, ‘১ জুলাইৰ পৰা আই আৰ চি টি চিৰ অফিচিয়েল ৱেবছাইট আৰু মোবাইল এপৰ জৰিয়তে বুকিং কৰা তৎকালীন টিকট কেৱল আধাৰ প্ৰমাণিত ব্যৱহাৰকাৰীৰ বাবেহে উপলব্ধ হ’ব।’ একে সময়তে অহা ১৫ জুলাইৰ পৰা অ’টিপি ভিত্তিক আধাৰ পৰীক্ষণ বাধ্যতামূলক হ’ব।
ৰে’ল মন্ত্ৰী অশ্বিনী বৈষ্ণৱে এটা পোষ্টত লিখে, ‘তৎকালীন টিকটিং প্ৰকৃত ব্যৱহাৰকাৰীৰ বাবে অধিক সুলভ কৰি তোলা হৈছে। ২০২৫ চনৰ ১ জুলাইৰ পৰা IRCTC-website/app ৰ জৰিয়তে তৎকাল বুকিঙৰ অনুমতি কেৱল আধাৰ প্ৰমাণীকৃত ব্যৱহাৰকাৰীৰ বাবেহে।
তৎকালীন টিকট বুকিং ব্যৱস্থাত কৰা সংশোধনীৰ জৰিয়তে এতিয়া অবৈধ আৰু ভুৱা আইডি থকা ব্যৱহাৰকাৰীক ৰোধ কৰিব পৰা যাব। লগতে এজেন্ট সন্দৰ্ভত লোৱা সিদ্ধান্তই যাত্ৰীসকলক উপকৃত কৰিব বুলি আশা কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
