RSSৰ শতবৰ্ষপূৰ্তি উপলক্ষে আয়োজিত এক অনুষ্ঠানত আকৌ বিতৰ্কিত বক্তব্য ৰাখিছে সংঘপ্ৰধান মোহন ভাগৱতে৷ মঙ্গলবাৰে ১০০ বছৰীয়া জাৰ্নি অফ আৰ এছ এছঃ নিউ হৰাইজনছ শীৰ্ষক এক অনুষ্ঠানত বক্তব্য ৰাখিবলৈ গৈ তেওঁ দাবী কৰিছে যে হিন্দু আৰু মুছলমানসহ অখণ্ড ভাৰতৰ ভূখণ্ডত বসবাসকাৰী সকলো মানুহৰ ডি এন এ বিগত চল্লিছ হাজাৰ বছৰ ধৰি থাকি একেই হৈ পৰিছে৷
মোহৰ ভাগৱতৰ বক্তব্য অনুসৰি যিসকলে এই ভূখণ্ডত বাস কৰে তেওঁলোক সকলো হিন্দু যদিও কোনো কোনোৱে নিজকে হিন্দু বুলি স্বীকাৰ নকৰে বা নিজকে তেওঁলোকে হিন্দু বুলি পাহৰি গৈছে৷ এই প্ৰসংগত তেওঁ হিন্দুসকলক ৪ভাগত ভাগো কৰিছে৷
১. যিসকলে গৰ্বৰ সৈতে নিজকে হিন্দু বুলি পৰিচয় দিয়ে৷
২. যিসকলে জানে তেওঁলোক হিন্দু কিন্তু বিশেষ গুৰুত্ব নিদিয়ে
৩. যিসকলে জানে অথচ বিভিন্ন কাৰণত নিজক হিন্দু বুলি ক’ব নোখোজে
৪. যিসকলে নাজানেই তেওঁলোক হিন্দু
মোহন ভাগৱতে সভাত কয়, ‘আজিৰ পৰা প্ৰায় ১০০ বছৰ পূৰ্বে ডঃ কেশৱ বলিৰাম হেডগেৱাৰে আৰ এছ এছ প্ৰতিষ্ঠা কৰিছিল হিন্দু সমাজক ঐক্যবদ্ধ কৰাৰ লক্ষ্যৰে৷ কিন্তু প্ৰশ্ন ৰৈ যায়-অন্যসকল কেনেকৈ বাদ পৰিল? এই উত্তৰতো তেওঁ এক ঐতিহাসিক বাখ্যা দিছে৷ তেওঁৰ দাবী, প্ৰাচীন ইৰাণৰ মানুহে সিন্ধু নদীৰ ওপৰত বসবাসকাৰী মানুহক হনদ নামেৰে মাতে৷ তাৰ পৰাই ক্ৰমে হিন্দু শব্দৰ উদ্ভৱ হৈছে৷ তেওঁ কয়, এই ভূমিত বহু দেৱতা আৰু বহু ধৰ্মগ্ৰন্থৰ প্ৰচলন আছিল বা আছে৷ আৰু সকলোৰে ধাৰণা এটাই যে সকলো পথে একেই গন্তব্যলৈ লৈ যায়৷ যিয়ে এই ঐক্যৰ দৰ্শনত বিশ্বাস কৰে সেই সকলেই হিন্দু৷ এই মন্তব্য ভাগৱতৰ৷
মোহন ভাগৱতে লগতে কয় যে, হিন্দু হোৱা মানেই হিন্দু বনাম অন্য সকলো নহয় বৰং হিন্দু মানে সৰ্বসন্মতি এক ঐক্য৷ তেওঁৰ মতে আমাৰ ঐতিহ্যই হৈছে একেলগে থকা৷ মই বিশ্বাস নকৰো যে এক হবলৈ হলে একেধৰণৰেই হব লাগিব৷ বৈচিত্ৰ প্ৰকৃততে ঐক্যৰেই ফল৷ তেওঁ আৰু উদাহৰণ টানি কয়, যেনেকৈ কাৰোবাৰ শৰীৰ ভালে ৰাখিবলৈ ব্যায়াম লাগে তেন্তে যুঁজ কৰাৰ বাবেও সংঘই কাৰোবাৰ বিৰুদ্ধে নহয় বৰং সমাজক সুস্থ ৰখাৰ বাবে কাম কৰে৷
ভাগৱতে হিন্দু মুছলমানৰ একেই পূৰ্বপুৰুষ বা অভিন্ন ডি এন এ বুলিও মন্তব্য কৰিছে৷ ২০২১ চনত তেওঁ কৈছিল, ‘হিন্দু মুছলমানৰ পূৰ্বপুৰুষ একেই তেওঁলোকৰ ডি এন এ একেই৷’ সেই সময়ত মোহন ভাগৱতৰ এই মন্তব্যক লৈ একাংশ আৰ এছ এছ নেতাই বিৰোধো কৰিছিল৷ মঙলবাৰে তেওঁ পুনৰ কয়, হিন্দু শব্দটো আমাৰ মাতৃভূমি, পুৰ্বপুৰুষ আৰু সংস্কৃতিৰ সমৃদ্ধ ঐতিহ্যৰ সমাৰ্থক৷ প্ৰত্যেক ভাৰতীয়ই প্ৰকৃততে হিন্দু৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
