দিল্লীৰ লালকিল্লাৰ বিস্ফোৰণত সন্ত্ৰাসবাদীৰ যোগ থকাৰ বিষয়টোত চিলমোহৰ মাৰিলে খোদ প্ৰধানমন্ত্ৰীয়ে৷ প্ৰধানমন্ত্ৰী নৰেন্দ্ৰ মোদীয়ে ভূটানৰ পৰা লালকিল্লাৰ বিস্ফোৰণৰ ঘটনাত গৰ্জি উঠিছে৷ প্ৰধানমন্ত্ৰী মোদীয়ে কয়, কোনো ষড়যন্ত্ৰকাৰী হাৰি নাযাব৷ ঘটনাৰ সৈতে জড়িতৰ শিঁপালৈকে আমি উভালি পেলাবলৈ সকলোবোৰ কৰিম৷ তদন্তকাৰী সংস্থাসমূহ যি কৰিব লাগে সকলোখিনি কৰিব৷
নিৰ্ধাৰিত কৰ্মসূচী অনুসৰি ভুটানৰ চতুৰ্থ ৰজা জিগমে সিংগৰ ৱাংচুকৰ ৭০তম জন্মবাৰ্ষিকী উদযাপনৰ অনুষ্ঠানত যোগ দিবলৈ মঙলবাৰে ভুটানত উপস্থিত হৈছে প্ৰধানমন্ত্ৰী মোদী৷ ভুটানৰ ৰাজধানী থিম্পুৰ এক অনুষ্ঠানত মঞ্চৰ পৰা মোদীয়ে কয়, ‘আজি মোৰ মন খুবেই ভাৰাক্ৰান্ত৷ সোমবাৰে সন্ধিয়া দিল্লীত ভয়াৱহ ঘটনা ঘটিছে৷ যিসকলে নিজৰ প্ৰিয়জনক হেৰুৱাইছে তেওঁলোকৰ যন্ত্ৰণা মই বুজিব পাৰিছো৷ সমগ্ৰ দেশ তেওঁলোকৰ কাষত আছে৷’
এই ঘটনাৰ উপযুক্ত ব্যৱস্থা লোৱাৰ আশ্বাসো দিছে প্ৰধানমন্ত্ৰীয়ে৷ সোমবাৰে সন্ধিয়াৰ পৰা পৰিস্থিতিক আমি নজৰত ৰাখিছো বুলিও জনাই মোদীয়ে৷ মোদীয়ে কয়, ‘সমগ্ৰ নিশা আমি সমস্ত কেন্দ্ৰীয় এজেন্সিৰ সৈতে যোগাযোগ ৰাখিছিলো৷ তদন্তত প্ৰাপ্ত তথ্যসমূহক লৈ আলোচনা চলিছিল৷ এই ষড়যন্ত্ৰৰ শিঁপালৈকে যাব তদন্তকাৰী সংস্থাসমূহে৷ যিসকলে এই ষড়যন্ত্ৰৰ সৈতে যুক্ত আৰু দায়ী তেওঁলোক সকলোকে বিচাৰৰ আওঁতাত অনা হব৷ এজনো হাৰি নাযাব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
