ট্ৰেইনৰ খাদ্যৰ মানক লৈ বহু সময়ত বহু অভিযোগ উঠি আহিছে৷ প্ৰায়েই অভিযোগ উঠে ট্ৰেইনৰ খাদ্যত পোক ওলায়৷ আনকি খাদ্যত মৰা জেঠীও পোৱা যায়৷ বিগত কেইবাবছৰ ধৰি IRCTCৰ বিৰুদ্ধে এনে একাধিক অভিযোগ উঠিছে৷ এইবাৰ IRCTCৰ বিৰুদ্ধে কাঢ়া পদক্ষেপ গ্ৰহণ কৰিছে ৰে’লে৷ ১০ লাখ টকা জৰিমনা বিহাৰ খবৰ ভাইৰেল হৈছে৷ সম্প্ৰতি ছচিয়েল মিডিয়াত এক ভিডিঅ’ ভাইৰেল হৈছে৷ ৰিতেশ কুমাৰ নামেৰে এগৰাকী যাত্ৰীয়ে ভিডিঅ’টো ৰেকৰ্ড কৰিছে৷ তেওঁৰ অভিযোগ, ট্ৰেইনত তেওঁক যি খাদ্য দিয়া হৈছে তাত পোক ওলাইছে৷ ভিডিঅ’টো ছচিয়েল মিডিয়াত শ্বেয়াৰো কৰিছে৷ ভিডিঅ’ত দেখা গৈছে যে তেওঁক যি খাদ্য দিয়া হৈছে তাৰ মাজত আছে এটা দৈৰ বাটি৷ দেখা গৈছে তাতেই পোকে কিলবিলাই আছে৷ লগে লগে ট্ৰেইনৰ মেনেজাৰক ফোন কৰি অভিযোগ জনায় তেওঁ৷
ছচিয়েল মিডিয়াচ আৰু এটা ভিডিঅ’ ভাইৰেল হৈছে৷ ভিডিঅ’ত দেখা গৈছে, দৈৰ ভিতৰত পোক আছেনে নাই সেয়া ভালধৰণে পৰীক্ষা কৰিলে ৰে’লৰ অধিকাৰীসকলে৷ টৰ্চ দি পৰীক্ষা কৰাৰ সময়তে দেখা যায় পোকৰ কিলবিলনি৷ কেৱল সেয়াই নহয় যি ট্ৰেত খাদ্য দিয়া হৈছে তাতো বগা পোক ভৰ্তি হৈ আছে৷
কাঢ়া পদক্ষেপ ৰে’ল বিভাগৰ
ঘটনাটো ঘটিছে পাটনা, টাটানগৰ বন্দেভাৰত এক্সপ্ৰেছত৷ ভিডিঅ’ ভাইৰেল হোৱাৰ পাছৰে পৰা তীব্ৰ সমালোচনাত মুখত পৰিছে ৰে’ল কৰ্তৃপক্ষ৷ ইয়াৰ পাছতেই ৰে’ল মন্ত্ৰণালয়ৰ তৰফৰ পৰা এক বিবৃতি জাৰি কৰি জনোৱা হয় যে বিষয়টো গুৰুত্ব সহকাৰে চোৱা হৈছে৷ ৰে’ল মন্ত্ৰণালয়ৰ পৰা এক্স হেণ্ডেলত পোষ্ট কৰি জনোৱা হৈছে, ‘২০২৬ৰ ১৫ মাৰ্চত ২১৮৯৬ নম্বৰ ট্ৰেইন খাদ্যৰ মানক লৈ এজন যাত্ৰীৰ অভিযোগ আমি পাইছো৷ কাঢ়া পদক্ষেপো আমি গ্ৰহণ কৰিছো৷ IRCTCক ১০ লাখ টকা জৰিমনা বিহা হৈছে৷ ছাৰ্ভিছ প্ৰোভাইডাৰক ৫০ লাখ টকা জৰিমনা বিহা হৈছে৷ একেলগে চুক্তি বাতিলৰ নিৰ্দেশো দিয়া হৈছে৷ ৰে’ল মন্ত্ৰণালয়ৰ তৰফৰ পৰা জনোৱা হৈছে, ‘যাত্ৰীসকলৰ নিৰাপত্তা আৰু খাদ্যৰ মানক আমি সৰ্বোচ্চ অগ্ৰাধিকাৰ দিব লাগে৷’
ভিডিঅ’ ভাইৰেল হোৱাৰ লগে লগে তীব্ৰ ক্ষোভ প্ৰকাশ কৰিছে নেটিজেনে৷ ট্ৰেইনৰ খাদ্যক লৈ কিয় বাৰে বাৰে অভিযোগ উঠিছে সেই বিষয়েও প্ৰশ্ন তুলিছে তেওঁলোকে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
