পৰিয়ালৰ বাকীসকল সদস্যৰ স্বাস্থ্যক লৈ প্ৰতিসময়তে সচেতন হৈ থাকে ঘৰৰ মহিলাসকল। কিন্তু নিজা স্বাস্থ্যক লৈ সিমানেই অৱহেলা প্ৰায়সংখ্যক মহিলাৰেই। ঘৰ, কাৰ্যালয় সকলো সামৰি শৰীৰৰ যত্ন ল’বলৈ বহুসংখ্যকেই সময়েই নাপায়। শৰীৰৰ প্ৰতি দীৰ্ঘদিন ধৰি অনিয়ম আৰু অযত্নৰ ফলতেই শৰীৰত নানান অসুখেও দেখা দিয়ে। বয়সে ৩০ ডেওনা পাৰ কৰিলে প্ৰত্যেকগৰাকী মহিলাই কেইটামান বিশেষ স্বাস্থ্যপৰীক্ষা কৰোৱাটো নিতান্তই প্ৰয়োজন। চিকিৎসেই পৰামৰ্শ দিয়ে যে ৩০ ৰ ডেওনা পাৰ হ’লে প্ৰত্যেকজন লোকেই স্বাস্থ্যক লৈ সচেতন হ’ব লাগে। কাৰণ শৰীৰত কোনো সমস্যা থাকিলে প্রাথমিক অৱস্থাতেই ধৰা পৰিলে দ্ৰুতভাৱে চিকিৎসা আৰম্ভ কৰিব পাৰি। ৩০ পাৰ হোৱাৰ লগে লগেই এইকেইটা পৰীক্ষা কৰোৱাটো অতি জৰুৰী।
ডায়াবেটিছ
বয়স বাঢ়িলেই ডায়াবেটিছৰ আশংকা বাঢ়ি যায় এই ধাৰণা ভুল। কমবয়সতো ডায়াবেটিছ হ’ব পাৰে। সেয়ে বয়স ৩০ পাৰ হ’লেই ৬ মাহৰ ব্যৱধানত এবাৰকৈ ৰক্ত শৰ্কৰাৰ মাত্ৰা পৰীক্ষা কৰোৱাটো জৰুৰী।
থাইৰয়েড আৰু কল’ষ্টেৰল
পৰিসংখ্যাই কয়, মহিলাসকলেই থাইৰয়েডত আক্ৰান্ত হোৱাৰ আশংকা বেছি। সেয়ে ৩০ পাৰ হ’লেই নিয়মিতভেৱ থাইৰয়েড পৰীক্ষা কৰোৱাটো অতি জৰুৰী। কেৱল থাইৰয়েডে নহয়, কল’ষ্টেৰলৰ মাত্ৰাও নিয়মিতভাৱে পৰীক্ষা কৰাব লাগে। এইক্ষেত্ৰত বছৰত এবাৰ লিপিড প্ৰফাইল পৰীক্ষা কৰোৱাটো জৰুৰী।
কৰ্কট স্ক্ৰিনিং
কৰ্কট স্ক্ৰিনিং অত্যন্ত জৰুৰী অক পৰীক্ষা। স্তন কৰ্কটৰ পৰা ডিম্বাশয়, জৰায়ুমুখৰ কৰ্কটত আক্ৰান্ত হোৱাৰ আশংকা মহিলাসকলৰ বেছিকৈ থাকে। সেয়ে এটা বয়সৰ অন্তত এই পৰীক্ষাসমূহ কৰাটো অতি জৰুৰী।
হাড়ৰ পৰীক্ষা
হাড় সংক্ৰান্তীয় নানান সমস্যা পুৰুষতকৈ মহিলাৰেই বেছি থাকে। আঁঠুৰ বিষ, আৰ্থৰাইটিছ, গাঁঠিৰ বিষ এইধৰণৰ সমস্যাসমূহ মহিলাসকলৰেই বেছিকৈ হয়। সেয়ে বয়স ৩০ পাৰ হ’লেই ভিটামিন ডি-৩ ৰ পৰীক্ষা কৰোৱাটো জৰুৰী। ইয়াৰোপৰি শৰীৰত কেলছিয়ামৰ মাত্ৰা পৰ্যাপ্ত নাথাকিলেও বহু ৰোগে দেখা দিয়ে। ইয়াৰোপৰি ইউৰিক এছিডৰো নিয়মিত পৰীক্ষা কৰোৱাটো অতি জৰুৰী।
চকুৰ পৰীক্ষা
যান্ত্ৰিক জীৱনত কমবয়সতে চকুৰ বিভিন্ন সমস্যাই দেখা দিয়াটো অস্বাভাৱিক কথা নহয়। এটা বয়সৰ অন্তত চকুক লৈ সচেতন হোৱাটো অতিকৈ প্ৰয়োজনীয়। বয়সে যদি ৩০ ৰ ঘৰ অতিক্ৰম কৰিছে তেন্তে চকুৰ পৰীক্ষা কৰোৱাটোও অত্যন্ত জৰুৰী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
