মহানগৰীৰ বাছত উঠোতে মহিলাসকল বিশেষকৈ সাৱধান হ’ব। মহানগৰীৰ বাছত মহিলা-যুৱতীসকলৰ সৈতে অশালীন ব্যৱহাৰ কৰাটো কোনো নতুন কথা নহয়। ঠিক এনে এটা ঘটনাই আজি গুৱাহাটীৰ পৰা মঙলদৈ অভিমুখী এখন গ্ৰীন বাছত সংঘটিত হৈছে। জানিব পৰা মতে এগৰাকী যুৱতীক এজন যুৱতে অশালীন স্পৰ্শ কৰা অভিযোগ উত্থাপিত হৈছে। এই সমগ্ৰ ঘটনাৰ ভিডিঅ কৰি যুৱতীগৰাকীয়ে নিজৰ অভিযোগৰ সত্যতা নিৰূপণ কৰিছে।
বাছখনত যাত্ৰা কৰি থকা যুৱতীগৰাকীৰ কাষতে বহি যোৱা এজন যুৱকে তেওঁৰ সৈতে অশালীন আচৰণ কৰাৰ লগতে শ্লীলতা হানিৰ চেষ্টা চলোৱাৰ অভিযোগ উঠিছে। এই ঘটনাক কেন্দ্ৰ কৰি সৃষ্টি হৈছে তীব্ৰ প্ৰতিক্ৰিয়াৰ। প্ৰাপ্ত তথ্য অনুসৰি, গুৱাহাটীৰ পৰা মঙলদৈ অভিমুখে গৈ থকা গ্ৰীণ বাছখনত যাত্ৰা কৰি আছিল ভুক্তভোগী যুৱতীগৰাকী। সেই সময়তে যুৱতীগৰাকীৰ কাষতে বহি থকা বিপুল দাস নামৰ যুৱকজনৰ বিৰুদ্ধে অসভ্য আচৰণ কৰাৰ অভিযোগ উত্থাপন হয়। যুৱতীগৰাকীৰ অভিযোগ অনুসৰি, যুৱকজনে তেওঁৰ সৈতে আপত্তিজনক আচৰণ কৰি শ্লীলতা হানিৰ চেষ্টা চলাইছিল।
কিন্তু এনে পৰিস্থিতিত যুৱতীগৰাকীয়ে সাহসিকতাৰে সমগ্ৰ ঘটনাটো কেমেৰাত বন্দী কৰিবলৈ আগবাঢ়ে। ঘটনাৰ প্ৰথমৰ পৰাই বিভিন্ন দৃশ্য কেমেৰাত ৰেকৰ্ড কৰি ৰাখে যুৱতীগৰাকীয়ে। নিজৰ সৈতে সংঘটিত হোৱা বুলি অভিযোগ কৰা ঘটনাটোৰ প্ৰমাণ সংগ্ৰহ কৰি তেওঁ যি সাহস প্ৰদৰ্শন কৰিলে, সেয়া বিশেষভাৱে চৰ্চালৈ আহিছে।
অভিযোগ অনুসৰি, যুৱকজনৰ এনে আচৰণত অতিষ্ঠ হৈ যুৱতীগৰাকীয়ে এই ঘটনাৰ প্ৰতিবাদ কৰে। আনকি যুৱকজনক বাছৰ পৰা বাহিৰ কৰি দিয়াৰো ব্যৱস্থা কৰে। যুৱতীগৰাকীয়ে সাহসেৰে যুৱকজনক বাছৰ পৰা নমাই দিয়ে বুলি জানিব পৰা গৈছে। ইয়াৰ পিছত বিষয়টো কেৱল বাছৰ ভিতৰতে সীমাবদ্ধ নাৰাখি ভুক্তভোগী যুৱতীগৰাকীয়ে যুৱকজনক আৰক্ষী থানালৈ লৈ যায়। ঘটনাটোৰ সন্দৰ্ভত আৰক্ষীৰ ওচৰত অভিযোগ দাখিল কৰা বুলি জানিব পৰা গৈছে।
দিনৰ পোহৰতে ৰাজহুৱা পৰিবহণত এগৰাকী যুৱতীৰ সৈতে এনে আচৰণ কৰাৰ অভিযোগে পুনৰ এবাৰ মহিলাৰ সুৰক্ষাক লৈ প্ৰশ্ন উত্থাপন কৰিছে। বাছত যাত্ৰা কৰাৰ সময়তো যদি এগৰাকী যুৱতীয়ে এনে পৰিস্থিতিৰ সন্মুখীন হ’বলগীয়া হয়, তেন্তে ৰাজহুৱা স্থানত মহিলাৰ সুৰক্ষা নিশ্চিত কৰাৰ ক্ষেত্ৰত অধিক সতৰ্কতাৰ প্ৰয়োজন আছে। আনহাতে, এনে ঘটনাৰ সন্মুখীন হ’লে ভুক্তভোগীয়ে নিজৰ সুৰক্ষাক প্ৰথম অগ্ৰাধিকাৰ দিয়াৰ লগতে সম্ভৱ হ’লে প্ৰমাণ সংগ্ৰহ কৰি আৰক্ষীৰ সহায় লোৱাটো গুৰুত্বপূৰ্ণ। অৱশ্যে, ঘটনাটোৰ সম্পূৰ্ণ সত্যতা, আৰক্ষীৰ তদন্ত আৰু অভিযুক্তৰ বিৰুদ্ধে গ্ৰহণ কৰা ব্যৱস্থা সম্পৰ্কে আনুষ্ঠানিক তথ্য লাভ কৰাটোও সমানেই প্ৰয়োজনীয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
