মহিলা সংৰক্ষণ আৰু লোকসভাত আসনবৃদ্ধি সংক্ৰান্তিয় সংবিধান সংশোধনী বিল লোকসভাত পাছ নহ’ল৷ মুঠ তিনিখন বিল উত্থাপন কৰিছিল কেন্দ্ৰীয় চৰকাৰে৷ এই বিল পাছ কৰাৰ বাবে দুই তৃতীয়াংশ সমৰ্থনৰ দৰকাৰ আছিল কেন্দ্ৰীয় চৰকাৰৰ৷
এদিনীয়া ভোটদানত বিলৰ পক্ষে পৰে ২৯৮টা ভোট আৰু বিপক্ষে পৰে ২৩০টা ভোট৷ বিলখন পাছ কৰাবলৈ শাসক NDA ৰ প্ৰয়োজন আছিল ৩২৬টা ভোট৷ মুঠ ৪৮৯জন সাংসদে এই ভোটদানত অংশ লৈছিল৷ এই বিলৰ মূল লক্ষ্য আছিল নতুন জনগণনা অবিহনে ডিলিমিটেছন প্ৰক্ৰিয়া সম্পন্ন আৰু বিধানসভা আৰু সংসদত মহিলাসকলৰ সংৰক্ষণ কাৰ্যকৰ কৰা৷
পৰবৰ্তীত কেন্দ্ৰীয় মন্ত্ৰী কিৰেণ ৰিজেজুৱে লোকসভাত বিলখন প্ৰত্যাহাৰ কৰে৷ তেওঁ কয়, ‘মহিলাসকলক অধিকাৰ দিয়া নহ’ল৷ এয়া খুবেই লজ্জাৰ বিষয়৷ কিন্তু আমি অধিকাৰ দিমেই৷ আমি প্ৰতিশ্ৰুতিবদ্ধ৷’
ইয়াৰপাছতেই লোকসভা অধিবেশন শনিবাৰে পুৱা ১১বজা পৰ্যন্ত চলিব বুলিও ঘোষণা কৰা হয়৷ নিয়ম অনুসৰি এই বিল আৰু ৰাজ্যসভালৈ নাযায়৷ এই সংক্ৰান্তত আৰু কোনো ভোটদানো নচলে৷ ইফালে বিলত সমৰ্থন নোপোৱাত ক্ষুদ্ধ হৈ পৰিছে একাধিক দল৷ মহিলা সাংসদসকলে বিৰোধীৰ বিৰুদ্ধে প্ৰতিবাদত সৰৱো হৈছে৷ সংসদৰ মকৰ দ্বাৰৰ পৰা এই বিক্ষোভ কৰ্মসূচীৰ সূচনা হয়৷ আজি অৰ্থাৎ ১৮ এপ্ৰিলৰ পৰা ইণ্ডিয়া জোঁটৰ অন্তৰ্ভূক্ত দলৰ নেতাসকলৰ ঘৰৰ সন্মুখত গৈ প্ৰতিবাদী কৰ্মসূচী চলোৱা হ’ব বুলিও জানিব পৰা গৈছে৷
ৰাহুল গান্ধীয়ে কয়, ‘সংশোধনী বিল খাৰিজ হৈছে৷ মহিলাসকলৰ নাম লৈ সংবিধান ভঙাৰ বাবে অসাংবিধানিক কৌশল ব্যৱহাৰ কৰা হৈছিল বিজেপিৰ তৰফৰ পৰা৷ সেয়া লোকসভাত মানি লোৱা নহ’ল৷ এয়া সংবিধানৰ জয়৷’
উল্লেখ্য যে এই বিলক লৈ বিৰোধীয়ে অপপ্ৰচাৰ কৰিছে৷ আগতে এই অভিযোগ কৰিছিল বিজেপিয়ে৷ খোদ প্ৰধানমন্ত্ৰী মোদী আৰু গৃহমন্ত্ৰী অমিত শ্বাহে লোকসভাত নিজৰ বক্তব্যত এই বিলক লৈ তথ্য দাঙি ধৰিছিল৷ মোদীয়ে কৈছিল, ‘মহিলাসকলৰ সংৰক্ষণ দিয়াৰ এই গুৰুত্বপূৰ্ণ সুযোগ আমি হাতৰ পৰা এৰি নিদিও৷ ৰাজনৈতিক দৃষ্টিভংগীৰ পৰা নাচাই জাতীয় স্বাৰ্থৰে এই বিল চাওক৷’
একেই সুৰত অমিত শ্বাহে সংসদক আশ্বস্ত কৰিছিল৷ জনাইছিল, লোকসভাত আসনৰ সংখ্যা ৫৪৩ৰ পৰা প্ৰায় ৮১৬ কৰা হলেও দক্ষিণৰ ৰাজ্যসমূহৰ বৰ্তমান প্ৰতিনিধিত্বই অক্ষুণ্ণ থাকিব বা সামান্য বৃদ্ধি পাব বুলি জনাইছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
