ৰাজনীতি কৰিবলৈ ধনেই লাগিব সেই কথা একেষাৰেই সঁচা বুলি আপুনি ক’ব নোৱাৰে৷ ধন অবিহনেও আজিৰ প্ৰেক্ষাপটতো ৰাজনীতিত নামিব পাৰি সেই প্ৰমাণ দাঙি ধৰিলে এজন যুৱ বিজেপি নেতাই৷ নিৰ্বাচনত নমাই নহয়, কংগ্ৰেছৰ আটাইতকৈ হেভিৱেট প্ৰাৰ্থীৰ বিৰুদ্ধে যুঁজ দি তেওঁ বিজয় সাব্যস্ত কৰিবলৈকো সক্ষম হৈছে৷ মাত্ৰ ২০ হাজাৰ টকাৰে নিৰ্বাচন খেলি বিধায়ক লৈ অহা যুৱ বিজেপি নেতা আন কোনো নহয় তেওঁ হৈছে মিলন দাস৷ হাইলাকান্দিৰ পৰা তেওঁ বিজেপি দলৰ সৈতে নিৰ্বাচন খেলি বিজয় সাব্যস্ত কৰিছে৷
মিলন দাসৰ বিৰুদ্ধে এই যুঁজত অৱতীৰ্ণ হৈছিল কংগ্ৰেছৰ আটাইতকৈ ধনী প্ৰাৰ্থী ৰাহুল ৰয়৷ হাইলাকান্দিৰ কংগ্ৰেছ প্ৰাৰ্থী ৰাহুল ৰয়ে ২০২৬ চনৰ অসম বিধানসভা নিৰ্বাচনত সৰ্বাধিক ধনী প্ৰাৰ্থী হিচাপে আত্মপ্ৰকাশ কৰিছিল। তেওঁৰ সম্পত্তিৰ পৰিমাণ ২৬১ কোটি টকা বুলি মনোনয়ন দাখিলত দিয়া তথ্যত এই হিচাপ তেওঁ নিজেই দিছিল৷ সেই হেভিৱেট প্ৰাৰ্থী ৰাহুলৰ বিৰুদ্ধে যুঁজ দিয়া মিলন দাসৰ সম্পত্তিৰ পৰিমাণ হৈছে ২০,৪০৬ টকা৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
