সোমবাৰে পশ্চিমবংগৰ বিধানসভা নিৰ্বাচনৰ ফলাফল প্ৰকাশ হৈছে৷ বিপুল আসনত জয়ী হৈছে ভাৰতীয় জনতা পাৰ্টী৷ তাৰপিছতেই গেৰুৱা শিবিৰ জয় উদযাপনত ব্যস্ত৷ ঠিক সেই সময়তেই বুধবাৰে নিশা হঠাৎ অঘটন৷ অজ্ঞাতপৰিচয়ৰ দুষ্কৃতীকাৰীয়ে এখন বাহনত আহি শুভেন্দু অধিকাৰীৰ ব্যক্তিগত সহায়ক চন্দ্ৰনাথ ৰথৰ বাহনক লক্ষ্য কৰি গুলি চলায়৷ ঘটনাস্থলতেই মৃত্যুক সাবটি লৈছে শুভেন্দুৰ ছায়াসংগী বুলি পৰিচিত চন্দ্ৰনাথ ৰথে৷
কোন আছিল চন্দ্ৰনাথ ৰথ?
ছাত্ৰজীৱন অৰ্থাৎ চন্দ্ৰনাথৰ পঢ়াশুনা ৰামকৃষ্ণ মিশনত৷ পঢ়াশুনা কৰাৰ সময়ত স্বামী বিবেকানন্দৰ আদৰ্শত গভীৰভাৱে উদ্বুদ্ধ আছিল চন্দ্ৰনাথ৷ শুনা যায় এসময়ত তেওঁ আধ্যাত্মিক জীৱন বাচি লোৱাৰ কথাও ভাৱিছিল৷ শেষ পৰ্যন্ত তেওঁ ভাৰতীয় বায়ুসেনাত যোগ দিয়ে৷ আৰু প্ৰায় দুই দশক দেশলৈ সেয়া আগবঢ়ায়৷ বায়ুসেনাৰ পৰা স্বেচ্ছাই অৱসৰ লোৱাৰ পাছত তেওঁ অলপ সময়ৰ বাবে কৰ্পৰেট জগততো কাম কৰিছিল৷
তাৰপিছতেই তেওঁৰ পৰিচয় হয় শুভেন্দু অধিকাৰীৰ সৈতে৷ ২০১৯ চনত শুভেন্দু অধিকাৰী ৰাজ্যৰ মন্ত্ৰী হোৱাৰ সময়তে জলসম্পদ দফতৰৰ ব্যক্তিগত সহায়ক কৰা হৈছিল চন্দ্ৰনাথক৷ তাৰপিছতেই শুভেন্দু বিজেপিলৈ গ’ল৷ তেতিয়া চন্দ্ৰনাথেও শুভেন্দুৰ সৈতেই দল সলনি কৰিলে৷ শুভেন্দু বিৰোধী দলনেতা থকাৰ সময়তে তেওঁৰ দফতৰৰ বিভিন্ন গুৰুত্বপূৰ্ণ দায়িত্ব সামৰিছিল চন্দ্ৰনাথে৷
জল্পনা আছিল শুভেন্দু যদি মুখ্যমন্ত্ৰী হয় তেতিয়া তেওঁৰ ব্যক্তিগত সহায়ক চন্দ্ৰনাথেও কোনো ভাল দায়িত্ব লাভ কৰিব৷ কিন্তু সেই আশা আশা হৈয়ে ৰ’ল৷ বুধবাৰে নিশা কেইবাজাঁই গুলিয়ে থকাসৰকা কৰি গ’ল চন্দ্ৰনাথৰ দেহ৷ কোনে কিয় শেষ কৰিলে চন্দ্ৰনাথক সেয়া এতিয়াও ৰহস্যৰ বিষয় হৈয়ে আছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
