মাত্ৰ ১৫ বছৰ বয়সতে বৈভৱ সূৰ্যবংশীয়ে তেওঁৰ বিস্ফোৰক বেটিঙেৰে ক্ৰিকেট দুনীয়াত আলোড়ন সৃষ্টি কৰিছে৷ শচীন তেণ্ডুলকাৰৰ পৰা আৰম্ভ কৰি সুনীল গাভাস্কাৰ পৰ্যন্ত বহুজনেই তেওঁৰ অনুৰাগী হৈ পৰিছে৷ ইমান কম বয়সত আন্তৰ্জাতিক মানৰ বলাৰসকলৰ বিৰুদ্ধে যেনেকৈ তেওঁ আধিপত্য দেখুৱাইছে সেই কাৰ্যই সকলোকে অবাকো কৰিছে৷
এই কিশোৰ তাৰকাৰ বেটিঙৰ শক্তিৰ ৰহস্যক লৈয়ো কৌতূহল আছে৷ বহুতেই জানিব খোজে যে যেতিয়া তেওঁৰ সমবয়সীয়াসকলে স্কুলৰ বেগ লৈ পঢ়াশুনাত ব্যস্ত থাকে সেই সময়তে তেওঁ কেনেকৈ ইমান শক্তি আৰু উদ্যমেৰে খেলিব পাৰিছে? বৈভৱ সূৰ্যবংশীয়ে নিজেই জনাইছে যে ক্ৰিকেটৰ ওপৰিও তেওঁ বিভিন্ন খাদ্য খাবলৈ খুবেই পছন্দ কৰে৷ বিশেষকৈ তেওঁ ননভেজ খাদ্য খুবেই উপভোগ কৰে৷ এক সাক্ষাৎকাৰত তেওঁ কৈছে, ছাগলীৰ মাংস তেওঁৰ খুবেই প্ৰিয়৷ ইয়াৰোপৰি চিকেন আৰু মাছৰ বিভিন্ন ব্যঞ্জনো তেওঁ ভালপায়৷
মিঠাইৰ ভিতৰতো তেওঁৰ বিশেষ পছন্দ আছে৷ তেওঁৰ প্ৰিয় মিঠাই হৈছে হালধীয়া ৰাজভোগ৷ এই ৰাজভোগ সন্মুখত থাকিলে তেওঁ নিজকে নিয়ন্ত্ৰণ কৰিব নোৱাৰে বুলিও স্বীকাৰ কৰিছে৷ আইপিএল ২০২৬তৰ আইপিএলত ট্ৰফী জয় নকৰিও সৰ্বাধিক চৰ্চা পোৱা খেলুৱৈজনেই হৈছে বৈভৱ সূৰ্যবংশী৷ সূৰ্যবংশীৰ দখলতেই আছিল ২৬ৰ আইপিএল সেয়া অস্বীকাৰ কৰিব নোৱাৰি৷ কিন্তু দুৰ্ভাগ্যজনকভাৱে তেওঁৰ দল ৰাজস্থান ৰয়েলছে ফাইনেল খেলিব নোৱাৰিলে৷ তথাপিও ব্যক্তিগত পাৰফৰ্মেন্সৰ বাবে তেওঁ সমগ্ৰ টুৰ্নামেণ্টৰে সকলোতকৈ উজ্জ্বল তাৰকা৷
বৈভৱে ৰাজস্থানৰ হৈ এই ছিজনত সৰ্বাধিক পান সংগ্ৰহ কৰিছে৷ তেওঁ ১৬খন মেচত মুঠ ৭৭৬ৰান কৰিছে আৰু ইয়াৰবাবে তেওঁ অৰেঞ্জ কেপো জয় কৰিছে৷ এই সময়ত তেওঁ ১টা শতৰান আৰু ৫টা অৰ্ধশতক কৰে৷ প্লে অফত তেওঁ দুবাৰ শতৰানৰ খুবেই কাষলৈ আহিছিল যদিও সেয়া পূৰণ কৰিব নোৱাৰিলে৷ অৱশ্যে তেওঁৰ ধাৰাবাহিক বেটিং সকলোৰে আলোচনাৰ কেন্দ্ৰবিন্দু হৈ পৰিছে৷ আই পি এল ২০২৬ত অৰেঞ্জ কেপ জয় কৰাৰ ওপৰিও সকলোতকৈ বেছি ছিক্স কোবোৱাৰ ৰেকৰ্ডতো তেওঁ নিজৰ নাম অন্তৰ্ভুক্ত কৰিবলৈ সক্ষম হৈছে৷
তেওঁ এই ছিজনত মুঠ ৭২টা ছিক্স মাৰে৷ যাৰ মাজত তেওঁ ৱেষ্ট ইণ্ডিজৰ কিংবদন্তি ক্ৰিছ গেইলৰ দৰে বেটছমেনসকলকো পাৰ কৰিছে৷ ছিক্সৰ সংখ্যাৰ দিশৰ পৰা সম্পূৰ্ণ টুৰ্নামেণ্টত তেওঁৰ কাষলৈ কোনো আহিব পৰা নাই৷ বৈভৱৰ পাছত দ্বিতীয় স্থানত আছিল গুজৰাট টাইটান্সৰ অধিনায়ক শুভমন গিল৷ তেওঁ মুঠ ৩৩টা ছিক্স কোবাইছে৷ ইয়াৰ পৰাই ক’ব পাৰি ছিক্সৰ তালিকাত বৈভৱ এইবাৰ একচেটীয়া সম্ৰাট৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
