তেওঁ নায়ক৷ তামিলনাডুৰ এতিয়া তেওঁ মহানায়ক বুলিলেও বেছিকৈ কোৱা নহয়৷ পৰ্দাত যেনেকৈ ভিলেইনৰ তুলাধুনা কৰিছিল এতিয়া সেই কায়দাতেই তেওঁ সোমবাৰে তেওঁৰ ছ্যুট পিন্ধাক লৈ কৰা সমালোচনাৰ জবাব দিছে৷ তামিলনাডুৰ মুখ্যমন্ত্ৰী চি জোছেফ বিজয় ওৰফে থালাপতি বিজয়ৰ ছ্যুট বিতৰ্কৰ জবাব শুনি সকলোৱে আকৌ এবাৰ হাতচাপৰি বজাবলৈ বাধ্য হৈছে৷ তিৰুচিৰাপল্লিৰ জনসভাৰ পৰা উদাত্ত ভাষণত তেওঁ দিছে জবাব৷ থালাপতি বিজয়ে কয়, ‘আমাৰ ৰাজনীতিও এই পোছাকৰ দৰেই বগা-ক’লা৷ ইয়াৰ সৈতে দল টিভিকেৰ ভৱিষ্যতৰ ৰূপৰেখাৰো তেওঁ বৰ্ণনা দিছে৷
জনতাৰ ভিৰৰ মাজত চেন্নাইৰ নেহৰু ষ্টেডিয়ামত বিজয়ে যেতিয়া কলা ছ্যুট পৰিধান কৰি মঞ্চত শপত লৈছিল তেতিয়াই চমকি উঠিছিল বহুজন৷ দশকৰ পাছত দশক ধৰি বগা ছাৰ্ট আৰু লুঙ্গিৰ দৰে বস্ত্ৰ পৰিধান কৰি আহিছিল তামিলনাডুৰ ৰাজনীতিবিদসকলে৷ কিন্তু ধাৰাবাহিকতা ৰক্ষা নকৰিলে থালাপতি বিজয়ে৷ সকলোকে আচৰিত কৰি তেওঁৰ ছ্যুট পৰিধান কৰিয়েই শপতগ্ৰহণ কৰিলে৷ এই ঘটনাই জন্ম দিয়ে ৰাজনৈতিক বিতৰ্কৰো৷ এইদিনটোত নিৰ্বাচনত বিপুল জয়ৰ পাছত সাধাৰণ মানুহক কৃতজ্ঞতা জনাবলৈ আয়োজন কৰা জনসভাৰ পৰাই এইবাৰ সেই বিতৰ্কৰ উত্তৰ দিছে বিজয়ে৷
কেৱল ক্ষমতাত থকা মানুহেই নহয়, ছ্যুট সকলোৱে পিন্ধে৷ এই বাৰ্তা দিয়েই বিজয়ে প্ৰশ্নও তোলে, বহুতেই কৈছে যে মই কিয় ছ্যুট পিন্ধিছো? মই কিয় ছ্যুট পিন্ধিব নোৱাৰো? ছ্যুট কি কেৱল ক্ষমতাত থকা মানুহেই পিন্ধে নেকি? বিজয়ে স্পষ্ট ভাষাৰে জনাই যে তেওঁৰ পোছাক কেৱল ফেশ্ব্যন নহয় তেওঁৰ পোছাকে বাৰ্তাও বহন কৰে৷ বিজয়ে কয়, ‘আপোনালোকে মন কৰিব৷ মই কেৱল দুটা ৰঙৰ পোছাকেই পিন্ধো৷ হয় বগা নহয় ক’লা৷ মই এই কথাই বুজাবলৈ যত্ন কৰো যে বিজয়ৰ সকলোতে ক’লা-বগা আছে৷’
পোছাকেই যে তেওঁৰ ৰাজনৈতিক পৰিচয় বহন কৰিব সেয়াও স্পষ্ট কৰি দিছে বিজয়ে৷ তেওঁ কয়, ‘মোৰ ৰাজনীতি মোক পোছাকৰ দৰেই৷ ক’লা-বগা৷ মই এমজিআৰ, আন্না আৰ পেৰিয়াৰে দেখুওৱা পথেৰে কাম কৰিবলৈ আহিছো৷ এম জি আৰ মানে এম জি ৰামচন্দ্ৰন৷ তেওঁৱো এজন নামী দামী অভিনেতা আছিল৷ পাছলৈ তেওঁ মুখ্যমন্ত্ৰী হয়৷ আৰু ছি এন আন্নাদুৰাইয়ো দ্ৰাবিড় আন্দোলনৰ নায়ক৷ মই নঅৱশ্যেই দুজনৰ প্ৰতি কৃতজ্ঞতা জনালেও কিছু দূৰত্ব বজায় ৰাখিছো৷ মই নিজকে কাৰো সৈতে তুলনা নকৰো৷ মই বিজয়৷ আপোনালোকৰ ভাতৃ, দাদা৷ যিয়ে আপোনালোকৰ কাম কৰিবলৈ আহিছো৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
