কেন্দ্ৰীয় চৰকাৰৰ লাখ লাখ কৰ্মচাৰী আৰু পেঞ্চনভোগীৰ বাবে সুখবৰ। বৰ্তমানৰ মূল্যবৃদ্ধিৰ মাজতে জুলাই মাহৰ পৰা মূল্যবৃদ্ধি ভাট্টা (DA) আৰু মূল্যবৃদ্ধি সকাহ (DR) ৩% বৃদ্ধি হোৱাৰ সম্ভাৱনা আছে। যদি এই বৃদ্ধি অনুমোদিত হয়, তেন্তে বৰ্তমানৰ ৬০% DA বৃদ্ধি পাই হ’বগৈ ৬৩%। অৱশ্যে এই সন্দৰ্ভত চূড়ান্ত ঘোষণা এতিয়াও হোৱা নাই, কিন্তু নতুন AICPI-IW (শিল্প শ্ৰমিকৰ উপভোক্তা মূল্য সূচক)ৰ তথ্যৰ ভিত্তিত এই বৃদ্ধি প্ৰায় নিশ্চিত বুলি ধৰা হৈছে। চৰকাৰে সাধাৰণতে অক্টোবৰত, বিশেষকৈ দীপাৱলীৰ সময়ছোৱাত, এই ঘোষণা কৰে, যদিও এই ঘোষণা পিছত হয় তথাপিও বৃদ্ধি পোৱা DA ১ জুলাই ২০২৬-ৰ পৰাই কাৰ্যকৰী ধৰা হ’ব।
DA কেনেকৈ গণনা কৰা হয়?
কেন্দ্ৰীয় চৰকাৰৰ কৰ্মচাৰীৰ DA কোনো অনুমানৰ ওপৰত নিৰ্ভৰ নকৰে। ইয়াৰ বাবে এক নিৰ্দিষ্ট গণনাৰ পদ্ধতি আছে। DA গণনাৰ মূল আধাৰ হৈছে AICPI-IW। বৰ্তমান এই সূচকৰ ভিত্তি বৰ্ষ ২০১৬।গণনাৰ সুবিধাৰ বাবে এই সূচকক ২.৮৮-ৰে পূৰণ কৰি ২০০১ চনৰ ভিত্তিৰ সৈতে মিলোৱা হয়। ইয়াৰ পিছত চৰকাৰে নিৰ্ধাৰিত সূত্ৰ অনুসৰি DA গণনা কৰে।
মে’ ২০২৬ৰ তথ্যই কি কয়?
শ্ৰম ব্যুৰোৰ তথ্য অনুসৰি, চলিত বৰ্ষৰ মে’ত AICPI-IW সূচক ১৫০.৮-লৈ বৃদ্ধি পাইছে। যদি যোৱা ১২ মাহৰ গড় সূচক ধৰা হয়, তেন্তে ইয়াৰ মান ১৪৮.০৭৫ হয়। চৰকাৰ DA দশমিকত ঘোষণা নকৰে। নিকটতম পূৰ্ণ সংখ্যালৈ ঘূৰাই ঘোষণা কৰা হয়। সেই হিচাপেই DA ৬৩% হয়। অৰ্থাৎ জানুৱাৰী ২০২৬ৰ ৬০% DAৰ তুলনাত ৩% বৃদ্ধি হ’ব।
অষ্টম বেতন আয়োগৰ কি অৱস্থা?
DA বৃদ্ধিৰ লগতে কৰ্মচাৰীসকলৰ দৃষ্টি এতিয়া অষ্টম বেতন আয়োগৰ ওপৰতো আছে। বিশেষজ্ঞসকলৰ মতে, নতুন বেতন কাঠামোৰ পৰামৰ্শ অহা বছৰৰ শেষৰ ফালে আহিব পাৰে। নতুন বেতন কাঠামো পিছত কাৰ্যকৰী হ’লেও, ইয়াক জানুৱাৰী ২০২৬ৰ পৰাই প্ৰযোজ্য হিচাপে ধৰাৰ সম্ভাৱনা আছে। যদি সেয়া হয়, তেন্তে কৰ্মচাৰীসকলে ১৮ৰ পৰা ২৪ মাহৰ এৰিয়াৰ একেলগে লাভ কৰিব পাৰে।
জুলাই ২০২৬ৰ DA কেনেকৈ দিয়া হ’ব?
জুলাই ২০২৬ৰ DA সপ্তম বেতন আয়োগৰ নিয়ম অনুসৰিয়েই গণনা কৰা হ’ব। ভৱিষ্যতে অষ্টম বেতন আয়োগ কাৰ্যকৰী হ’লে, নতুন বেতন কাঠামো আৰু DAৰ মাজৰ পাৰ্থক্যৰ ধন কৰ্মচাৰীসকলক এৰিয়াৰ হিচাপে পৰিশোধ কৰাৰ সম্ভাৱনা আছে।
চৰকাৰী ঘোষণা কেতিয়া হ’ব?
১ জানুৱাৰী আৰু ১ জুলাইত কেন্দ্ৰীয় চৰকাৰে বছৰত দুবাৰকৈ DA সংশোধন কৰে। কিন্তু কেবিনেটৰ আনুষ্ঠানিক ঘোষণা সাধাৰণতে কেইমাহমান পিছত হয়। এইবাৰো অক্টোবৰ মাহত দীপাৱলীৰ সময়ছোৱাত DA বৃদ্ধিৰ আনুষ্ঠানিক ঘোষণা হোৱাৰ সম্ভাৱনা আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
