No Cost EMI নে পকেট খালী কৰাৰ নতুন কৌশল?

আজিকালি মোবাইল, টিভি, ফ্ৰিজ, লেপটপ আদি দামি সামগ্ৰী কিনাটো আগৰ তুলনাত বহুত সহজ হৈ পৰিছে। ইয়াৰ অন্যতম মুখ্য কাৰণ হৈছে No Cost EMI। অনলাইন শ্বপিং প্লেটফৰ্ম হওক বা অফলাইন দোকান—প্ৰায় সকলো ঠাইতে এই অফাৰ দেখা যায়। বিজ্ঞাপনত ডাঙৰকৈ লিখা থাকে—‘০% সুদ’, ‘অতিৰিক্ত খৰচ নোহোৱাকৈ EMI’ ইত্যাদি। এই ধৰণৰ প্ৰচাৰ দেখি বহুতে লগে লগে সামগ্ৰী কিনাৰ সিদ্ধান্ত লয়, কিয়নো আৰম্ভণিতে একেলগে বৃহৎ পৰিমানৰ ধন দিব নালাগে।

No Cost EMI সঁচাকৈয়ে সম্পূৰ্ণ বিনামূলীয়া নেকি?

ইমানখিনি সুবিধাৰ পিছত অধিকাংশৰ মনত উদয় হোৱা প্ৰশ্নটো হ’ল—No Cost EMI সঁচাকৈয়ে সম্পূৰ্ণ বিনামূলীয়া নেকি? বহু সময়ত এই অফাৰৰ লগত এনে কিছুমান চৰ্ত থাকে, যিবোৰৰ বিষয়ে গ্ৰাহকে পিছতহে জানিব পাৰে আৰু শেষত অতিৰিক্ত খৰচ বহন কৰিবলগীয়া হয়। সেয়েহে যিকোনো EMI অফাৰ লোৱাৰ আগতে ইয়াৰ সকলো চৰ্ত আৰু নিয়ম ভালদৰে বুজি লোৱাটো অতি প্ৰয়োজনীয়।

No Cost EMI আচলতে কি?

সহজ ভাষাত ক’বলৈ গ’লে, No Cost EMI মানে হৈছে—আপুনি কোনো সামগ্ৰীৰ সম্পূৰ্ণ মূল্য একেলগে নিদি, মাহে মাহে কিস্তিৰ জৰিয়তে পৰিশোধ কৰে। কোম্পানী বা বেংকে দাবী কৰে যে এই কিস্তিৰ ওপৰত পৃথককৈ কোনো সুদ লোৱা নহ’ব। উদাহৰণস্বৰূপে, যদি আপুনি ৩০ হাজাৰ টকাৰ এটা মোবাইল কিনে আৰু ১০ মাহৰ No Cost EMI বাছি লয়, তেন্তে প্ৰতি মাহে প্ৰায় ৩ হাজাৰ টকা পৰিশোধ কৰিব লাগিব। প্ৰথম দৃষ্টিত ইয়াক সম্পূৰ্ণ সুদবিহীন লেনদেন যেনেই লাগে। কিন্তু বাস্তৱত বহু ক্ষেত্ৰত কাহিনীটো ইমান সহজ নহয়।

তেন্তে কোম্পানীবোৰে লাভ কেনেকৈ কৰে?

যদি বেংক বা ফাইনেন্স কোম্পানীয়ে সুদ নলয়, তেন্তে লাভ ক’ৰ পৰা হয়? ইয়াৰ উত্তৰ লুকাই থাকে অফাৰৰ চৰ্তসমূহত। বহু সময়ত গ্ৰাহকে নগদে মূল্য পৰিশোধ কৰিলে যি ৰেহাই (Discount) পাব পাৰিলেহেঁতেন, সেই ৰেহাই No Cost EMI ল’লে কমি যায় বা একেবাৰেই নাপায়। অৰ্থাৎ সুদৰ পৰিৱৰ্তে কোম্পানীয়ে সেই ৰেহাইৰ পৰিমাণৰ পৰাই নিজৰ লাভ আদায় কৰে। আন কিছুমান ক্ষেত্ৰত Processing Fee, Documentation Charge আদি অতিৰিক্ত মাচুলও লোৱা হয়। সেয়ে কেৱল ‘০% সুদ’ দেখি সিদ্ধান্ত লোৱাটো কেতিয়াও উচিত নহয়।

সৰু EMI দেখি বহুতে অধিক খৰচ কৰে

ধৰি লওক, আপোনাৰ বাজেট ১৫ হাজাৰ টকা। কিন্তু দোকানীয়ে কয়—“৩০ হাজাৰ টকাৰ মোবাইলটো মাত্ৰ মাহে ২,৫০০ টকাৰ EMI-ত লৈ যাওক।” এনে অৱস্থাত বহুতে ভাবে—“মাহে মাত্ৰ ২,৫০০ টকাই দিব লাগিব”—আৰু নিজৰ সামৰ্থ্যতকৈ বহুত দামি সামগ্ৰী কিনি পেলায়। ইয়াতেই ডাঙৰ ভুলটো হয়। গ্ৰাহকে সামগ্ৰীৰ মুঠ মূল্য নেদেখি কেৱল মাহিলী কিস্তিটোহে দেখে। ফলত প্ৰয়োজনতকৈ অধিক খৰচ হৈ যায়।

বহু সৰু EMI মিলি ডাঙৰ বোজা হৈ পৰে

এদিন মোবাইল EMI-ত কিনিলে, কেইমাহমান পিছত টিভি, তাৰ পিছত ফ্ৰিজ—এনেদৰে একাধিক সামগ্ৰী কিস্তিত কিনাটো এটা অভ্যাসত পৰিণত হৈ পৰে। আৰম্ভণিতে প্ৰতিটো EMI সৰু যেন লাগে, কিন্তু কিছুদিনৰ পিছত মাহে মাহে হাজাৰ হাজাৰ টকা কেৱল EMI পৰিশোধতেই ব্যয় হয়। যদি হঠাতে চাকৰি হেৰুৱাবলগীয়া হয় বা আয় কমি যায়, তেন্তে এই কিস্তিসমূহ পৰিশোধ কৰাটো কঠিন হৈ পৰে। সেয়ে EMI লোৱাৰ আগতে নিজৰ মাহিলী আয়-ব্যয়ৰ হিচাপ ভালদৰে পৰ্যালোচনা কৰা উচিত।

Hidden Charges আৰু Processing Fee-ৰ প্ৰকৃত অংক

No Cost EMI-ৰ নামত আটাইতকৈ ডাঙৰ বিষয়টো হৈছে Hidden Charges, অৰ্থাৎ লুকুৱাই ৰখা অতিৰিক্ত খৰচ। এই আঁচনিৰ অধীনত সামগ্ৰী কিনিলে বহু বেংকে ৯৯ টকাৰ পৰা ২৯৯ টকালৈকে Processing Fee একেলগে আদায় কৰে। ইয়াৰ উপৰিও, No Cost EMI-ত সুদৰ অংশটোৰ ওপৰত ১৮% GST প্ৰযোজ্য হ’ব পাৰে, যাৰ ভাৰ শেষত গ্ৰাহকেই বহন কৰে। আনহাতে, যদি আপুনি EMI ম্যাদ শেষ হোৱাৰ আগতেই সম্পূৰ্ণ ঋণ পৰিশোধ কৰিব বিচাৰে, তেন্তে বহু বেংকে ২%ৰ পৰা ৩% পৰ্যন্ত Pre-closure Charge লয়। এই সকলো সৰু-সৰু খৰচ একেলগে যোগ কৰিলে তথাকথিত ‘ফ্ৰী’ ঋণটোৱেই বহু ক্ষেত্ৰত বছৰি প্ৰায় ১২%ৰ পৰা ১৫% সুদীয়া ঋণৰ সমান ব্যয়বহুল হৈ পৰে।

Impulse Buying-ৰ বিপদ

EMIৰ সুবিধাই মানুহৰ ক্ৰয়-মনোবিজ্ঞানতো ডাঙৰ প্ৰভাৱ পেলাইছে। আজিকালি বহুতে প্ৰয়োজন নাথাকিলেও কেৱল বিজ্ঞাপন বা অফাৰৰ প্ৰলোভনত দামি সামগ্ৰী কিনি পেলায়। মনোবিজ্ঞানৰ ভাষাত ইয়াক Impulse Buying বুলি কোৱা হয়। বজাৰ বিশেষজ্ঞসকলৰ মতে, যেতিয়া একেলগে ডাঙৰ অংকৰ ধন দিব নালাগে, তেতিয়া মানুহৰ মনত সেই খৰচটো সৰু আৰু সহজ যেন অনুভৱ হয়। কোম্পানীবোৰেও এই মনস্তাত্ত্বিক দিশটোৰ সুবিধা লৈ ১০ হাজাৰ টকাৰ বাজেট থকা গ্ৰাহকক ২০ বা ৩০ হাজাৰ টকাৰ সামগ্ৰী বিক্ৰী কৰিবলৈ সক্ষম হয়। দীৰ্ঘম্যাদত এই অভ্যাসে মাহিলী বাজেট সম্পূৰ্ণ বিঘ্নিত কৰে আৰু বহু লোক ঋণৰ চক্ৰব্যূহত আবদ্ধ হৈ পৰে।

No Cost EMI কেতিয়া লোৱা উচিত?

যদি আপোনাৰ হাতত সম্পূৰ্ণ মূল্য পৰিশোধ কৰাৰ সামৰ্থ্য আছে, কিন্তু আপুনি নিজৰ সঞ্চয় একেলগে খৰচ কৰিব নিবিচাৰে, তেন্তে No Cost EMI এটা সুবিধাজনক বিকল্প হ’ব পাৰে। কিন্তু কেৱল মাহিলী EMI সৰু দেখি নিজৰ প্ৰয়োজনতকৈ অধিক দামি সামগ্ৰী কিনাটো ভৱিষ্যতে আৰ্থিক সমস্যাৰ কাৰণ হ’ব পাৰে।
সামগ্ৰী কিনাৰ আগতে এই কথাবোৰ মনত ৰাখক
কেৱল EMI নেদেখি সামগ্ৰীৰ মুঠ মূল্য পৰীক্ষা কৰক। Processing Fee আৰু আন সকলো অতিৰিক্ত মাচুলৰ বিষয়ে নিশ্চিত হওক। অফাৰৰ সকলো চৰ্ত আৰু নিয়ম ভালদৰে পঢ়ক। যিমান EMI আপুনি অনায়াসে মাহে মাহে পৰিশোধ কৰিব পাৰে, সিমানেই লওক। কেৱল অফাৰৰ লোভত নহয়, নিজৰ প্ৰকৃত প্ৰয়োজনৰ ভিত্তিত সিদ্ধান্ত লওক।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ