এতিয়াও শান্ত হোৱা নাই মধ্য-প্ৰাচ্য । বৃহস্পতিবাৰে আমেৰিকাই আ*ক্ৰমণ তীব্ৰ কৰি ইৰানৰ উত্তৰাঞ্চলৰ বহু ঠাই লক্ষ্য কৰি আক্ৰমণ চলায়। মাৰ্কিন বায়ুসেনাই নতুন কৌশল হিচাপে ইৰানৰ কেইবাখনো দলঙৰ ওপৰতো আক্ৰমণ কৰে। মাৰ্কিন সেনাৰ এই আ*ক্ৰমণৰ প্ৰতিক্ৰিয়াত ইৰানেও পশ্চিম এছিয়াত থকা আমেৰিকাৰ কেইবাখনো মিত্ৰ দেশক লক্ষ্য কৰি ক্ষেপণাস্ত্ৰ আৰু ড্ৰোনেৰে ধাৰাবাহিক আ*ক্ৰমণ আৰম্ভ কৰিছে। তেহৰানে মাৰ্কিন আ*ক্ৰমণৰ প্ৰত্যাক্ৰমণ হিচাপে আজি পুৱতি নিশা বাহৰেইন, কাতাৰ আৰু কুৱেইটত আ*ক্ৰমণ চলায়। এই দেশসমূহত আমেৰিকাৰ সামৰিক ঘাটি আছে আৰু শেহতীয়া সময়তো সেই দেশসমূহৰ মাৰ্কিন সেনাৰ ঘাটিত ইৰানে আক্ৰমণ চলাইছিল।
মধ্য-প্ৰাচ্যত চলি থকা সংঘাত সমাপ্ত কৰাৰ উদ্দেশ্যে ইৰান আৰু আমেৰিকাৰ মাজত পূৰ্বে এক শান্তি চুক্তি সম্পন্ন হৈছিল। কিন্তু হৰমুজ প্ৰণালীত (Hormuz Strait) দুয়োপক্ষৰ সামৰিক তৎপৰতাৰ ফলত পুনৰ সংঘাত আৰম্ভ হয়।
আমেৰিকাৰ আক্ৰমণৰ প্ৰত্যুত্তৰ ইৰানৰ
ইৰানৰ চৰকাৰী সংবাদ সংস্থা IRNAই শুকুৰবাৰে সদৰী কৰা অনুসৰি, দক্ষিণৰ হৰমুজগান প্ৰদেশত দলঙক লক্ষ্য কৰি আমেৰিকাই চলোৱা বায়ু আক্ৰমণত কমেও ৩ জন লোক নি*হত হৈছে। ইয়াৰ পূৰ্বে বৃহস্পতিবাৰে আমেৰিকাই পুনৰ ইৰানৰ বিৰুদ্ধে আক্ৰমণ তীব্ৰ কৰি উত্তৰাঞ্চল আৰু দূৰৱৰ্তী কেইবাটাও সামৰিক ঘাটিত বায়ু আক্ৰমণ চলায়। লগতে আমেৰিকাই এখন জাহাজতো আক্ৰমণ কৰে, যাক ইৰানে আমেৰিকাৰ নৌ-অৱৰোধ ভংগ কৰাৰ চেষ্টা কৰা বুলি অভিযোগ কৰিছিল।
এই ঘটনাৰ প্ৰতিক্ৰিয়াত ইৰানে খাড়ী অঞ্চলত থকা আমেৰিকাৰ মিত্ৰ দেশসমূহৰ ওপৰত ক্ষেপণাস্ত্ৰ আৰু ড্ৰোন নিক্ষেপ কৰে।
আমেৰিকাৰ আক্ৰমণৰ দ্বিতীয় পৰ্যায়
দুয়োখন দেশৰ প্ৰতিনিধিয়ে আলোচনাত মিলিত হোৱাৰ পিছত প্ৰথমবাৰৰ বাবে আমেৰিকাৰ আক্ৰমণৰ পৰিসৰ ইৰানৰ ৰাজধানী তেহৰানৰ সমীপৱৰ্তী অঞ্চলসমূহলৈও বিস্তৃত হৈছে। ইয়াৰ পৰা স্পষ্ট যে আমেৰিকাই আক্ৰমণৰ লক্ষ্যক অধিক সম্প্ৰসাৰিত কৰিছে। বৃহস্পতিবাৰে নিশা আমেৰিকাই আক্ৰমনৰ দ্বিতীয় পৰ্যায় আৰম্ভ কৰি ইয়াৰ উদ্দেশ্য ইৰানৰ সামৰিক ক্ষমতাক “আৰু অধিক দুৰ্বল কৰা” বুলি কয়।
ইৰানৰো প্ৰত্যাক্ৰমণৰ তীব্ৰ কৰাৰ হুংকাৰ
ইৰানৰ সেনাৰ খাতাম আল-আম্বিয়া কেন্দ্ৰীয় মুখ্য কাৰ্যালয়ৰ মুখপাত্ৰ কৰ্নেল ইব্ৰাহিম জ’লফাঘাৰীয়ে আমেৰিকাক সতৰ্ক কৰি কয় যে যদি আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰানৰ দলং আৰু বিদ্যুৎ কেন্দ্ৰসমূহত আক্ৰমণ কৰে, তেন্তে ইৰানে “সমগ্ৰ অঞ্চলৰ সকলো গুৰুত্বপূৰ্ণ আন্তঃগাঁথনি”ৰ ওপৰত বৃহৎ পৰিসৰৰ আক্ৰমণ চলাব।
হৰমুজেই মূল উদ্দেশ্য
উল্লেখযোগ্য যে, বিগত জুনত দুয়োখন দেশৰ মাজত যুদ্ধবিৰতিৰ বাবে এক অন্তৱৰ্তীকালীন চুক্তি হৈছিল যদিও, সেই চুক্তি কেইদিনমানৰ ভিতৰতে ভংগ হয়। তাৰ পাছৰে পৰা হৰমুজ প্ৰণালীৰ নিয়ন্ত্ৰণক কেন্দ্ৰ কৰি আমেৰিকা আৰু ইৰানৰ মাজত আক্ৰমণ-প্ৰত্যাক্ৰমণ অব্যাহত আছে। ইৰানৰ চৰকাৰী তথ্য অনুসৰি, আমেৰিকাৰ শেহতীয়া আক্ৰমণত ৩৫ জনতকৈ অধিক লোক নি*হত আৰু ৩০০ জনতকৈ অধিক আহত হৈছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
