সঁচাকৈ ছোনম ৱাংচুকৰ জীৱনৰ ওপৰত নিৰ্মাণ কৰা হৈছিল নেকি ‘3 Idiots’?

লাডাখৰ সমাজকৰ্মী তথা শিক্ষাবিদ ছোনম ৱাংচুক বিগত ১৯ দিন ধৰি দিল্লীৰ যন্তৰ-মন্তৰত অনশন কৰি আছে। দীঘলীয়া অনশনৰ ফলত তেওঁৰ স্বাস্থ্যৰ অৱস্থা ক্ৰমাৎ অৱনতি ঘটিছে, যাৰ বাবে দেশজুৰি বিভিন্ন মহলে উদ্বেগ প্ৰকাশ কৰিছে। ৱাংচুকৰ স্বাস্থ্যৰ অৱনতিৰ লগে লগে অধিকাংশই চৰকাৰক ৱাংচুক আৰু তেওঁৰ সমৰ্থকৰ সৈতে আলোচনাত বহিবলৈ আহ্বান জনাইছে। বলিউডৰ কেইবাজনো তাৰকায়ো সামাজিক মাধ্যমৰ জৰিয়তে ছোনম ৱাংচুকৰ প্ৰতি সমৰ্থন জনাইছে।

কিছুদিন পূৰ্বে ‘3 Idiots’ ছবিত চতুৰ ৰামালিংগমৰ চৰিত্ৰত অভিনয় কৰা অভিনেতা অ’মি বৈদ্যই এটা ভিডিঅ’ শ্বেয়াৰ কৰি কৈছিল যে তেওঁ “ফুংচুক ৱাংৰু”ক মৃ*ত্যুৰ মুখত পৰাটো চাব নোৱাৰে। তেওঁ লগতে দাবী কৰিছিল যে ছবিখনত আমীৰ খানে অভিনয় কৰা “ফুংচুক ৱাংৰু” চৰিত্ৰটো বাস্তৱ জীৱনৰ ছোনম ৱাংচুকৰ আধাৰত সৃষ্টি কৰা হৈছিল।

আমীৰ খানৰ ছুপাৰহিট ছবি ‘3 Idiots’ত আমীৰ খানে ৰূপায়ণ কৰা ফুংচুক ৱাংৰুৰ চৰিত্ৰটো বহুতেই ছোনম ৱাংচুকৰ জীৱনৰ ওপৰত আধাৰিত বুলি দাবী কৰে। কিন্তু শেহতীয়াভাৱে এই দাবীক সম্পূৰ্ণভাৱে নাকচ কৰিছে আমীৰ খানে। শেহতীয়াকৈ এটা অনুষ্ঠানত তেওঁ স্পষ্টকৈ কয় যে ‘3 Idiots’ ছোনম ৱাংচুকৰ জীৱনৰ ওপৰত আধাৰিত ছবি নহয়। অনুষ্ঠানটোত আমীৰ খানক সোধা হৈছিল যে, ‘3 Idiots’ এখন প্ৰভাৱশালী ছবি আছিল আৰু বহুতে কয় যে ইয়াৰ মূল প্ৰেৰণা ছোনম ৱাংচুক। ইয়াৰ উত্তৰত আমীৰ খানে কয়— “ফুংচুক ৱাংৰুৰ চৰিত্ৰটো ছোনম ৱাংচুকৰ ওপৰত নিৰ্মাণ কৰা হোৱা নাই। অনুৰাগীসকলে কৰা এই ধাৰণা একেবাৰেই সত্য নহয়। এয়া এটা ভুল ধাৰণা। ছবিখনৰ শ্বুটিং চলি থকা সময়ত আমি ছোনম ৱাংচুকৰ বিষয়ে একেবাৰেই নাজানিছিলো।’ আমীৰে আৰু কয়—‘মই শেহতীয়াকৈ চতুৰ (অ’মি বৈদ্য)ৰ এটা ভিডিঅ’ দেখিছোঁ, য’ত তেওঁ এই কথা কৈছিল। কিন্তু তেওঁ ভুল কৰিছে। হয়তো তেওঁৰ তেনে ধাৰণা আছে, কিন্তু মই নিশ্চিতকৈ ক’ব বিচাৰোঁ যে নে ৰাজকুমাৰ হিৰানীয়েই হওক বা অভিজাত যোশীয়েই হওক বা মই—আমাৰ কোনেও সেই সময়ত ছোনম ৱাংচুকৰ বিষয়ে জনা নাছিলোঁ।’

আমীৰ খানে লগতে কয় যে ছোনম ৱাংচুকে সমাজৰ বাবে কৰি থকা কাম অতিশয় প্ৰশংসনীয়। তেওঁ কয়—‘ছোনমজীয়ে কৰি থকা কামৰ বাবে আমাৰ মনত তেওঁৰ প্ৰতি যথেষ্ট সন্মান আছে। তেওঁক সন্মান কৰিবলৈ ‘3 Idiots’ৰ চৰিত্ৰ তেওঁৰ ওপৰত আধাৰিত হ’বই লাগিব বুলি কোনো কথা নাই।’ অৱশ্যে ‘3 Idiots’ৰ চৰিত্ৰটো সন্দৰ্ভত ছোনম ৱাংচুকে নিজেও পূৰ্বতেই স্পষ্টকৈ কৈছিল যে ‘3 Idiots’ৰ চৰিত্ৰটো তেওঁৰ জীৱনৰ ওপৰত আধাৰিত নহয়। মিষ্টাৰ পাৰ্ফেকছনিষ্টে লগতে ছোনম ৱাংচুকৰ স্বাস্থ্যৰ প্ৰতি উদ্বেগ প্ৰকাশ কৰি কয় যে- ছোনমজীৰ দৰে ব্যক্তিত্ব আমাৰ সমাজৰ বাবে প্ৰয়োজন। আশা কৰিম তেওঁ সোনকালে আৰোগ্য হৈ আমাৰ মাজলৈ ঘূৰি আহিব আৰু যি দাবীত তেওঁ অনশন কৰিছে, সেয়া আলোচনাৰ মাধ্যমেৰে নিষ্পত্তি হব।

আমীৰ খানৰ এই মন্তব্যৰ পিছত ‘3 Idiots’ ছবি ছোনম ৱাংচুকৰ জীৱনৰ ওপৰত নিৰ্মিত বুলি চলি অহা বহুদিনৰ ভুল ধাৰণাৰো অৱসান ঘটিল। যদিও ছবিখন তেওঁৰ জীৱনৰ ওপৰত আধাৰিত নহয়, তথাপিও ছোনম ৱাংচুকৰ সমাজসেৱা আৰু শিক্ষা ক্ষেত্ৰত আগবঢ়োৱা অৱদানৰ বাবে দেশজুৰি তেওঁ প্ৰশংসিত আৰু সন্মানিত।

এই প্ৰতিবেদন যুগুতাইছে মানসজ্যোতিয়ে