‘মোদীৰ বাবেই ৰাছিয়াৰ পাৰমাণৱিক আক্ৰমণৰ পৰা ৰক্ষা পৰিছিল ইউক্ৰেইন’

‘ৰাছিয়াৰ ৰাষ্ট্ৰপতি ভ্লাদিমিৰ পুটিনে সহজে কাৰো মতামতক গুৰুত্ব সহকাৰে নলয়। কিন্তু ভাৰতৰ প্ৰধানমন্ত্ৰী নৰেন্দ্ৰ মোদী সেইসকল বিশ্বনেতাৰ ভিতৰত অন্যতম যাৰ মতামত পুটিনে অতি গুৰুত্ব সহকাৰে গ্ৰহণ কৰে। ২০২২ৰ শেষৰফালে ইউক্ৰেইনৰ ওপৰত কৌশলগত পাৰমাণৱিক অস্ত্ৰ ব্যৱহাৰ নকৰিবলৈ ৰাছিয়া আৰু পুটিনক বুজাবলৈ প্ৰধানমন্ত্ৰী মোদীয়ে গুৰুত্বপূৰ্ণ ভূমিকা গ্ৰহণ কৰিছিল’- ভাৰতৰ প্ৰধানমন্ত্ৰী নৰেন্দ্ৰ মোদীক লৈ এই গুৰুত্বপূৰ্ণ মন্তব্য আগবঢ়াইছে পোলেণ্ডৰ উপ-বৈদশিক মন্ত্ৰী ৱ্লাদিছ্লাভ থেওফিল বাৰ্টোশ্বেভস্কিয়ে। এটা সাক্ষাৎকাৰত বাৰ্টোশ্বেভস্কিয়ে কয় যে-ৰাছিয়াৰ সৈতে ভাৰতৰ দশকজুৰি থকা সম্পৰ্কই নতুন দিল্লীক এক বিশেষ স্থান প্ৰদান কৰিছে, যাৰ ফলত শান্তি স্থাপনৰ প্ৰচেষ্টাত ভাৰত এক গুৰুত্বপূৰ্ণ ভূমিকা পালন কৰিব পাৰে।

মোদীৰ প্ৰশংসাত পঞ্চমুখ বাৰ্টোশ্বেভস্কি

সাম্প্ৰতিক যুদ্ধসদৃশ পৰিস্থিতিত বিশ্বৰ প্ৰেক্ষাপটত ভাৰতে লৈ অহা ভূমিকাক প্ৰশংসা কৰি বাৰ্টোশ্বেভস্কিয়ে লগতে কয়-“প্ৰধানমন্ত্ৰী নৰেন্দ্ৰ মোদী বিশ্বৰ প্ৰেক্ষাপটত এজন অতি সন্মানীয় আৰু সুপৰিচিত বিশ্বনেতা। ৰাছিয়াৰ সৈতে আৰু ইয়াৰ আগতে ছোভিয়েট ইউনিয়নৰ সৈতে, ভাৰতৰ বহুদিনীয়া সম্পৰ্ক আছে। ৰাষ্ট্ৰপতি পুতিনে প্ৰধানমন্ত্ৰী মোদীৰ কথাক গুৰুত্বসহকাৰে লয়।”

বৰ্তমানৰ পৰিস্থিতিত মস্কোৰ সৈতে যোগাযোগ কৰাটো ক্ৰমাৎ কঠিন হৈ পৰিছে আৰু এনে সময়ত পুটিনৰ ওপৰত প্ৰভাৱ বিস্তাৰ কৰিব পৰা অতি কম নেতাৰ ভিতৰত মোদীও অন্যতম বুলি মত ব্যক্ত কৰে পোলেণ্ডৰ মন্ত্ৰীগৰাকীয়ে। তেওঁ লগতে কয় যে- ইউক্ৰেইন-ৰাছিয়াৰ সংঘাতৰ অৱসান ঘটোৱাত ভাৰতৰ ভূমিকা গুৰুত্বপূৰ্ণ হ’ব পাৰে।

ভাৰত আৰু চীনৰ গুৰুত্ব

বাৰ্টোশ্বেভস্কিৰ মতে, যিবোৰ দেশক ৰাছিয়াই শত্ৰু বুলি নাভাবে, সেই দেশসমূহৰ পৰা অহা সংযমৰ আহ্বান অধিক ফলপ্ৰসূ হয়। ভাৰতৰ লগতে তেওঁ চীনৰ ৰাষ্ট্ৰপতি শ্বি জিনপিঙৰ নামো উল্লেখ কৰি কয় যে মস্কোৱে চীনৰ মতামতকো গুৰুত্ব দিয়ে। তেওঁ কয়, “কেৱল প্ৰধানমন্ত্ৰী মোদীৰ নেতৃত্বত ভাৰতেই নহয়, শ্বি জিনপিঙো উত্তেজনা বৃদ্ধি হোৱাৰ বিপক্ষে মত পোষণ কৰিছে। বিশেষকৈ যিবোৰ দেশক ৰাছিয়াই শত্ৰু বুলি নাভাবে, সেই দেশসমূহৰ পৰা এনে বাৰ্তা অহাটো অতি গুৰুত্বপূৰ্ণ। ইয়াত ভাৰতৰ ভূমিকা বিশেষভাৱে উল্লেখযোগ্য।”

তেল ক্ৰয়ক লৈ পোলেণ্ড-ভাৰতৰ মতভেদ হ্ৰাস

বাৰ্টোশ্বেভস্কিয়ে আৰু জনায় যে ৰেহাই মূল্যত ৰাছিয়াৰ কেঁচা তেল আমদানি কৰাৰ বিষয়ত ভাৰত আৰু পোলেণ্ডৰ মাজত থকা মতভেদ এতিয়া বহু পৰিমাণে কমি আহিছে।
তেওঁ স্বীকাৰ কৰে যে আগতে পোলেণ্ডে ভাৰতৰ ৰাছিয়ান তেল ক্ৰয়ৰ সমালোচনা কৰিছিল, কাৰণ ইয়াৰ ফলত পৰোক্ষভাৱে ৰাছিয়াৰ যুদ্ধকালীন অৰ্থনীতি শক্তিশালী হৈছিল। কিন্তু একে সময়তে তেওঁ কয় যে “কম মূল্যত তেল লাভ কৰাৰ অৰ্থনৈতিক যুক্তি পোলেণ্ডে বুজি পাইছিল। এতিয়া দুয়ো দেশেই পৰস্পৰৰৰ স্থিতি অধিক ভালদৰে বুজি পাইছে, আৰু এই বিষয়টো এতিয়া মতভেদৰ কাৰণ নহয়।”

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ