২৬ দিনীয়া অনশনৰ অন্তত শুকুৰবাৰে কেন্দ্ৰীয় মন্ত্ৰী জে পি নাড্ডা আৰু জীতেন্দ্ৰ সিঙৰ উপস্থিতিত ছোনম ৱাংচুকে মেদান্ত হাস্পতালত অনশনৰ অন্ত পেলায়। অৱশ্যে আন্দোলন শেষ কেতিয়া হব তাৰ কোনো নিশ্চয়তা অহা নাই। সূত্ৰসমূহে জনোৱা মতে, চৰকাৰে কিছুমান মূল দাবীৰ ওপৰত ইতিবাচক লক্ষণ দেখুৱাইছে লগতে অধিক আলোচনাৰ বাবে লিখিত আশ্বাস দিয়াৰ পিছত এই সিদ্ধান্ত লোৱা হৈছে।
আন্দোলনৰ ঘনিষ্ঠ সূত্ৰৰ মতে, ৱাংচুকক চিকিৎসালয়ত ভৰ্তি কৰোৱাৰ ফলত আন্দোলনৰ নেতৃত্বৰ সম্পূৰ্ণ পৰিৱৰ্তন ঘটিছিল। যন্তৰ মন্তৰত থকাৰ সময়ত প্ৰায় প্ৰতিটো ডাঙৰ সিদ্ধান্ততে তেওঁ প্ৰত্যক্ষ ভূমিকা পালন কৰিছিল যদিও স্বাস্থ্যৰ অৱনতি ঘটাৰ পিছত সিদ্ধান্ত গ্ৰহণৰ দায়িত্ব লয় CJPৰ আঠজনীয়া নেতৃত্বৰ দলে। এই দলটোৱে কৌশল প্ৰণয়ন কৰিবলৈ প্ৰতিবাদকাৰী ছাত্ৰ-ছাত্ৰী, স্বেচ্ছাসেৱক আৰু অংশীদাৰ সংস্থাসমূহৰ পৰা অহৰহ মতামত বিচাৰিছিল। ৱাংচুকৰ পত্নী গীতাঞ্জলিক মূল সিদ্ধান্তৰ বিষয়ে অৱগত কৰি ৰখা হৈছিল যদিও দৈনন্দিন সিদ্ধান্তসমূহ আঠজনীয়া নেতৃত্বৰ দলটোৱে লৈছিল।
সূত্ৰ অনুসৰি আন্দোলনৰ লগত জড়িত ছাত্ৰ সংগঠন বিশেষকৈ আইছাক গুৰুত্বপূৰ্ণ সিদ্ধান্তৰ বিষয়ে অৱগত কৰি ৰখা হৈছিল আৰু বহু বিষয়ত তেওঁলোকৰ মতামত বিচৰা হৈছিল। অৱশ্যে CJPৰ মূল দলটোৱে চূড়ান্ত সিদ্ধান্তসমূহ গ্ৰহণ কৰি আহিছে। ইফালে ৱাংচুকক ৰখা চিকিৎসালয়খনত ৰাজনৈতিক কাৰ্যকলাপ তীব্ৰতৰ হৈ পৰে। এদিন পূৰ্বে আম আদমী পাৰ্টিৰ সাংসদ সঞ্জয় সিং আৰু RJDৰ সাংসদ সঞ্জয় যাদৱকে ধৰি কেইবাজনো বিৰোধী সাংসদৰ প্ৰতিনিধি দলে ৱাংচুকক সাক্ষাৎ কৰিবলৈ গৈছিল যদিও আৰক্ষীয়ে তেওঁলোকক সাক্ষাৎ কৰিবলৈ অনুমতি নিদিলে। ইয়াৰ পিছতে তেওঁলোকে পত্নী গীতাঞ্জলি আংমোৰ হাতত অনশন শেষ কৰিবলৈ আহ্বান জনাই এখন চিঠি দিয়ে।
ইয়াৰ পিছতে ১৯ জন সাংসদৰ স্বাক্ষৰিত এখন পত্ৰ লৈ কংগ্ৰেছ ৰাজ্যসভাৰ সাংসদ বিবেক তংখা, চি পি আই (এম)ৰ সাংসদ জন ব্ৰিটাছ আৰু তৃণমূল কংগ্ৰেছৰ সাংসদ সাগৰিকা ঘোষে চিকিৎসালয়ত উপস্থিত হয়। সূত্ৰসমূহে জনোৱা মতে, সমগ্ৰ সময়ছোৱাত বিবেক তংখাই সক্ৰিয় পদক্ষেপ লৈ ৱাংচুকক ছফদাৰজং হাস্পতালৰ পৰা মেদান্ত হাস্পতাললৈ স্থানান্তৰিত কৰাৰ সিদ্ধান্তত গুৰুত্বপূৰ্ণ ভূমিকা পালন কৰিছিল।
আলোচনাৰ আশ্বাস চৰকাৰৰ
কেন্দ্ৰীয় মন্ত্ৰী জীতেন্দ্ৰ সিঙে ৱাংচুকৰ পত্নী গীতাঞ্জলি আংমোৰ সৈতে বাৰ্তালাপ কৰি আন্দোলনৰ দাবীৰ ভিত্তিত চৰকাৰে ইতিবাচকভাৱে আগবাঢ়ি যোৱাৰ মনস্থ কৰিছে বুলি আশ্বাস দিয়ে। শুকুৰবাৰে জীতেন্দ্ৰ সিং আৰু জে পি নাড্ডাই ব্যক্তিগতভাৱে মেদান্ত চিকিৎসালয়ত উপস্থিত হৈ ৱাংচুকক এখন লিখিত চৰকাৰী আশ্বাস পত্ৰ প্ৰদান কৰে, য’ত শান্তিপূৰ্ণ প্ৰতিবাদকাৰীৰ বিৰুদ্ধে কোনো ব্যৱস্থা গ্ৰহণ নকৰাৰ আশ্বাস দিয়া হয়। সূত্ৰৰ পৰা জানিব পৰা মতে, সুস্থ হ’বলৈ ছোনম ৱাংচুক আৰু কিছু দিন হাস্পতালতে থাকিব। ইফালে দিল্লীৰ যন্তৰ মন্তৰত CJPৰ মূল দলটোৱে আন্দোলনৰ নেতৃত্বত থাকিব। আজি চৰকাৰ আৰু CJPৰ মাজত দ্বিতীয় ৰাউণ্ডৰ আলোচনা অনুষ্ঠিত হ’ব আৰু বাকী থকা দাবীসমূহৰ ওপৰত অধিক আলোচনা কৰা হ’ব বুলি জানিব পৰা গৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
