চলিত বৰ্ষৰ আৰম্ভণিৰ পৰাই দেশত মূল্যবৃদ্ধিৰ চাপ ক্ৰমাৎ বৃদ্ধি পাইছে। ফেব্ৰুৱাৰী মাহৰ শেষৰ ফালে মধ্যপ্ৰাচ্যত সৃষ্টি হোৱা উত্তেজনাৰ ফলত আন্তঃৰাষ্ট্ৰীয় বাণিজ্য আৰু যোগান ব্যৱস্থাত ব্যাঘাত ঘটে। ইয়াৰ ফলত বহু সামগ্ৰীৰ দাম বৃদ্ধি পায়। ইয়াৰ উপৰিও প্ৰতিকূল বতৰৰ পৰিস্থিতিও মূল্যবৃদ্ধিৰ অন্যতম কাৰণ হিচাপে বিবেচিত হৈছে।
বেংক অব বৰোদাৰ এক প্ৰতিবেদন অনুসৰি, চলিত বৰ্ষৰ জুলাইত দেশৰ খুচুৰা মূল্যবৃদ্ধিৰ হাৰ (Retail Inflation) প্ৰায় ৪.৫ শতাংশ হ’ব পাৰে। ফলস্বৰূপে সাধাৰণ লোকৰ ঘৰুৱা ব্যয় আৰু ৰান্ধনীঘৰৰ বাজেটত পুনৰ চাপ পৰাৰ সম্ভাৱনা দেখা দিছে।
সাধাৰণতে খাদ্য সামগ্ৰীৰ মূল্য বৃদ্ধি হ’লেই মানুহে প্ৰকৃত মূল্যবৃদ্ধিৰ প্ৰভাৱ বেছি অনুভৱ কৰে। উল্লেখিত প্ৰতিবেদনখনত কোৱা হৈছে যে এইবাৰ মূল্যবৃদ্ধিৰ আটাইতকৈ বেছি প্ৰভাৱ পৰিব দৈনন্দিন ব্যৱহাৰৰ খাদ্য সামগ্ৰীৰ ওপৰত। ইতিমধ্যে তেল, চাউল, দাইল আৰু পিঁয়াজৰ দৰে অত্যাৱশ্যকীয় সামগ্ৰীৰ দাম বৃদ্ধি পাবলৈ আৰম্ভ কৰিছে। যদিও বৰ্তমান বৰষুণৰ বাবে বজাৰত শাক-পাচলিৰ যোগান তুলনামূলকভাৱে ঠিকেই আছে, সেয়েহে প্ৰায়বোৰ পাচলিৰ দাম কিছু নিয়ন্ত্ৰণত আছে। বিলাহী, পিঁয়াজ আৰু আলু—এই তিনিটা অত্যাৱশ্যকীয় পাচলি (TOP)-ৰ যোগানত বৰ্তমান বিশেষ সমস্যা দেখা পোৱা হোৱা নাই। তথাপিও পিঁয়াজৰ দামত ইতিমধ্যে উঠা-নমা আৰম্ভ হৈছে আৰু আগন্তুক দিনবোৰতো এই অস্থিৰতা অব্যাহত থাকিব পাৰে বুলি প্ৰতিবেদনত উল্লেখ কৰা হৈছে।
প্ৰতিবেদনত এইটোও কোৱা হৈছে যে Core Inflation অৰ্থাৎ খাদ্য সামগ্ৰী আৰু ইন্ধন বাদ দি আন সামগ্ৰী আৰু সেৱাৰ মূল্যবৃদ্ধিৰ হাৰ—জুলাই মাহৰ ক্ষেত্ৰত ৪.০ শতাংশৰ পৰা ৪.১ শতাংশৰ ভিতৰত থাকিব পাৰে। আন্তঃৰাষ্ট্ৰীয় বজাৰত সোণৰ মূল্য ধাৰাবাহিকভাৱে হ্ৰাস পোৱাৰ ফলত Personal Care সামগ্ৰী আৰু কোৰ মূল্যবৃদ্ধিৰ ওপৰত কিছু ইতিবাচক প্ৰভাৱ পৰিব পাৰে বুলি অনুমান কৰা হৈছে।
কিন্তু বিশেষজ্ঞসকলে সতৰ্কবাণী দি কৈছে যে আগন্তুক সময়ত উৎপাদন ব্যয় পুনৰ বৃদ্ধি পালে সামগ্ৰিক মূল্যবৃদ্ধিৰ হাৰ আকৌ বৃদ্ধি পাব পাৰে। সেয়ে সাধাৰণ গ্ৰাহকসকলে আগন্তুক মাহবোৰত দৈনন্দিন প্ৰয়োজনীয় সামগ্ৰীৰ ক্ষেত্ৰত অধিক ব্যয় বহন কৰিবলগীয়া হোৱাৰ সম্ভাৱনা নুই কৰিব নোৱাৰি।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
