IPLত দিল্লী কেপিটেলছৰ হৈ খেলা বংগৰ ক্ৰিকেটাৰ অভিষেক পোৰেলক ধ*ৰ্ষণৰ অভিযোগত গ্ৰেপ্তাৰ কৰা হৈছে। মঙলবাৰে কলকাতাত গ্ৰেপ্তাৰ কৰা হয় ২৩ বছৰীয়া ক্ৰিকেটাৰজনক। এগৰাকী মেডিকেলৰ ছাত্ৰীৰ অভিযোগৰ ভিত্তিত তেওঁৰ বিৰুদ্ধে ধ*ৰ্ষণ, ভাবুকি প্ৰদানসহ একাধিক অভিযোগত গোচৰ ৰুজু কৰা হৈছিল। অভিযোগকাৰী মহিলাগৰাকীয়ে বিগত জুনত আৰক্ষীৰ ওচৰত অভিযোগ দাখিল কৰিছিল। এই গোচৰটো ইতিমধ্যে কলকাতা উচ্চ ন্যায়ালয়তো চলি আছিল। আদালতে ২০ জুলাইত অভিষেক পোৰেলক গ্ৰেপ্তাৰৰ নিৰ্দেশ দিয়াৰ লগতে তেওঁৰ ইলেক্ট্ৰনিক ডিভাইচসমূহ জব্দ কৰাৰ নিৰ্দেশ দিছিল। অৱশ্যে ক্ৰিকেটাৰগৰাকীয়ে আৰম্ভণিৰে পৰাই তেওঁৰ বিৰুদ্ধে উত্থাপিত সকলো অভিযোগ অস্বীকাৰ কৰি আহিছে।
অভিযোগ অনুসৰি, যুৱতীগৰাকীয়ে দাবী কৰিছে যে তেওঁ আৰু অভিষেক পোৰেল বিগত প্ৰায় তিনিবছৰ ধৰি সম্পৰ্কত আছিল। কিন্তু যোৱা বছৰৰ পৰা দুয়োৰে মাজত মতানৈক্য আৰম্ভ হয়। অভিযোগকাৰীৰ মতে, ইয়াৰ পিছৰে পৰা ক্ৰিকেটাৰগৰাকীয়ে তেওঁৰ পৰা আঁতৰি যাবলৈ আৰম্ভ কৰে। যুৱতীগৰাকীয়ে অভিযোগ কৰিছে যে অভিষেক পোৰেলে তেওঁক বিয়াৰ প্ৰতিশ্ৰুতি দিছিল। সেই প্ৰতিশ্ৰুতিৰ ভিত্তিতেই দুয়োৰে মাজত শাৰীৰিক সম্পৰ্ক স্থাপন হৈছিল বুলি অভিযোগত উল্লেখ কৰা হৈছে। কিন্তু পিছত অভিষেকে বিয়াত সন্মতি নিদিয়া বুলি যুৱতীগৰাকীয়ে দাবী কৰিছে।
বাওঁহতীয়া টপ অৰ্ডাৰ বেটাৰ তথা উইকেটকীপাৰ অভিষেক পোৰেল ২০২৩ চনৰ পৰা IPLত দিল্লী কেপিটেলছৰ হৈ খেলি আহিছে। দলটোৱে তেওঁক ৪ কোটি টকা মূল্যত ৰিটেইন কৰিছিল। বিগত ছিজনত দিল্লী কেপিটেলছৰ হৈ পোৰেলে চাৰিটা ইনিংছত মুঠ ১০৮ ৰান সংগ্ৰহ কৰিছিল। ইয়াৰ পূৰ্বে অভিষেকে ইণ্ডিয়া ‘এ’ দলৰ সৈতেও ইংলেণ্ড আৰু অষ্ট্ৰেলিয়া ভ্ৰমণ কৰিছিল। ২০২১-২২ ছিজনত বংগৰ হৈ প্ৰথম শ্ৰেণীৰ ক্ৰিকেটত অভিষেক ঘটোৱা পোৰেলে এতিয়ালৈকে ৩২খন ফাৰ্ষ্ট ক্লাছ আৰু ২৩খন লিষ্ট-এ মেচ খেলিছে।
বিৱাহৰ প্ৰতিশ্ৰুতি দি শাৰীৰিক সম্পৰ্ক স্থাপন কৰাৰ অভিযোগৰ ক্ষেত্ৰত ভাৰতীয় ন্যায় সংহিতা (BNS)ৰ ধাৰা ৬৯ প্ৰযোজ্য হ’ব পাৰে। এই ধাৰা তেতিয়াহে প্ৰযোজ্য হয়, যেতিয়া অভিযোগ অনুসৰি অভিযুক্ত ব্যক্তিজনৰ আৰম্ভণিৰ পৰাই বিয়া কৰাৰ কোনো প্ৰকৃত উদ্দেশ্য নাছিল, কিন্তু বিয়াৰ প্ৰতিশ্ৰুতি দি মহিলাগৰাকীৰ সৈতে শাৰীৰিক সম্পৰ্ক স্থাপন কৰিছিল। দোষী সাব্যস্ত হ’লে এই ধাৰাৰ অধীনত ১০ বছৰ পৰ্যন্ত কাৰাদণ্ড আৰু জৰিমনাৰ ব্যৱস্থা আছে।
অৱশ্যে বিয়াৰ প্ৰতিশ্ৰুতি পূৰণ নোহোৱা প্ৰতিটো ঘটনাকেই ধ*ৰ্ষণ বুলি গণ্য কৰা নহয়। আদালতে ঘটনাটোৰ সময়ত অভিযুক্তজনৰ প্ৰকৃত উদ্দেশ্য কি আছিল, সম্পৰ্কটো কেনেদৰে গঢ় লৈছিল আৰু শাৰীৰিক সম্পৰ্কৰ ক্ষেত্ৰত সন্মতিৰ পৰিস্থিতি কেনে আছিল—এই সকলোবোৰ বিষয় বিবেচনা কৰে। দুয়োৰে সন্মতিত সম্পৰ্ক স্থাপন হোৱাৰ পিছত পৰৱৰ্তী সময়ত কোনো কাৰণত বিয়া নহ’লে, কেৱল সেই কাৰণতেই ঘটনাটো ধ*ৰ্ষণ হিচাপে গণ্য নহ’বও পাৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
