অসমত শেহতীয়া বান পৰিস্থিতিৰ মাজতে বানপীড়িত লোকসকলৰ সহায়ৰ বাবে সংগৃহীত ধন, ছ’চিয়েল মিডিয়া ইনফ্লুৱেন্সাৰৰ ভূমিকা আৰু গুৱাহাটীৰ কৃত্ৰিম বানৰ সমস্যাক লৈ মুখ্যমন্ত্ৰীয়ে কেইবাটাও গুৰুত্বপূৰ্ণ মন্তব্য কৰিছে। বানপীড়িতক সহায় কৰিবলৈ ৰাজ্যৰ বিভিন্ন প্ৰান্তৰ লোক, অনুষ্ঠান-প্ৰতিষ্ঠান, সামাজিক সংগঠন আৰু ব্যক্তিয়ে আগবাঢ়ি অহাৰ সময়তে সাহায্যৰ ধনৰ স্বচ্ছ ব্যৱহাৰ নিশ্চিত কৰাৰ বিষয়টোও চৰ্চালৈ আহিছে।
মুখ্যমন্ত্ৰীৰ ভাষ্য অনুসৰি, মুখ্যমন্ত্ৰীৰ সাহায্য পুঁজিত এতিয়ালৈ ১৪২ কোটি টকা জমা হৈছে। এই বৃহৎ পৰিমাণৰ ধনে ৰাজ্য তথা দেশবাসীৰ বানপীড়িত লোকসকলৰ প্ৰতি থকা দায়িত্ববোধ আৰু সহমৰ্মিতাৰ কথাকে প্ৰতিফলিত কৰিছে। ৰাজ্যৰ বাহিৰৰ পৰাও বহু লোক আৰু বিভিন্ন ক্ষেত্ৰৰ ব্যক্তিয়ে অসমৰ বানপীড়িতৰ বাবে সহায়ৰ হাত আগবঢ়াইছে।
ইয়াৰ মাজতে বানৰ নামত ছ’চিয়েল মিডিয়াযোগে ধন সংগ্ৰহ কৰা একাংশ ইনফ্লুৱেন্সাৰৰ ভূমিকাক লৈও প্ৰশ্ন উত্থাপন হৈছে। মুখ্যমন্ত্ৰীয়ে জনোৱা মতে, ৭২টা ইনফ্লুৱেন্সাৰৰ বেংক একাউণ্ট চিনাক্ত কৰা হৈছে, যিসকলে বানপীড়িতৰ নামত ধন সংগ্ৰহ কৰিছে। অৱশ্যে ধন সংগ্ৰহ কৰাটোৱেই অপৰাধ নহয়; মূল প্ৰশ্নটো হৈছে—সংগ্ৰহ কৰা সেই ধন সঁচাকৈয়ে বন্যাৰ্ত লোকৰ সহায়ত ব্যৱহাৰ কৰা হৈছে নে নাই। সেয়েহে এই বিষয়টো তদন্তৰ আওতালৈ অনা হ’ব। সংগ্ৰহ কৰা ধন বন্যাৰ্তৰ নামত খৰচ হৈছে নে নাই, সেই বিষয়ে তদন্ত হ’ব। ইয়াৰ জৰিয়তে সাহায্যৰ নামত ধন সংগ্ৰহ কৰি অপব্যৱহাৰ কৰাৰ আশংকা থাকিলে সেয়া পোহৰলৈ অহাৰ লগতে সঁচাকৈয়ে অসহায় লোকৰ কাষত থিয় দিয়া ব্যক্তিসকলৰ কামো স্বীকৃতি লাভ কৰিব।
মুখ্যমন্ত্ৰীয়ে স্পষ্ট কৰি দিছে যে, যিসকলে সঁচাই সহায় কৰিছে, তেওঁলোকক অসম চৰকাৰৰ পৰা সন্মান জনোৱা হ’ব। অৰ্থাৎ বানৰ সময়ত মানৱীয় দায়িত্ব পালন কৰা ব্যক্তি আৰু সংগঠনক চৰকাৰে সন্মান জনোৱাৰ পৰিকল্পনা কৰিছে সদৰী কৰে মুখ্যমন্ত্ৰীয়ে। এনে স্বীকৃতিয়ে ভৱিষ্যতে দুৰ্যোগৰ সময়ত অধিক লোকক স্বেচ্ছাই সহায়ৰ বাবে আগবাঢ়ি আহিবলৈ উৎসাহিত কৰিব পাৰে।
আনহাতে, গুৱাহাটীৰ কৃত্ৰিম বানৰ সমস্যাক লৈও মুখ্যমন্ত্ৰীয়ে এক গুৰুত্বপূৰ্ণ দিশ আঙুলিয়াই দিছে। তেওঁৰ মতে, গুৱাহাটীৰ কৃত্ৰিম বানৰ অধিকাংশ পানী মেঘালয়ৰ পৰা নামি আহে। পাহাৰীয়া অঞ্চলৰ পৰা বৰষুণৰ পানী দ্ৰুতগতিত নামি অহাৰ ফলত মহানগৰীৰ একাংশ অঞ্চল জলমগ্ন হয়। কিন্তু এই সমস্যাৰ বাবে কেৱল মেঘালয়ক দোষাৰোপ কৰিলে সমস্যাটোৰ সম্পূৰ্ণ সমাধান নহ’ব বুলিও তেওঁ স্পষ্ট কৰিছে।
গুৱাহাটীৰ কৃত্ৰিম বানৰ আঁৰত নগৰ পৰিকল্পনা, নলা-নৰ্দমাৰ অৱস্থা, পানী নিষ্কাশনৰ পথ, জলাশয় সংকোচন আৰু নাগৰিকৰ দায়িত্বহীনতাৰ দৰে বহু কাৰক জড়িত হৈ আছে। বিশেষকৈ গুৱাহাটীৰ নলাসমূহত ৰাইজেও জাবৰ-জোঁথৰ পেলোৱাৰ পৰা বিৰত থাকিব লাগিব। নলাত প্লাষ্টিক, বটল, পলিথিন আৰু অন্যান্য আৱৰ্জনা পেলোৱাৰ ফলত পানী ওলাই যোৱাৰ পথ বন্ধ হয় আৰু অলপ সময়ৰ ভিতৰতে ভয়ংকৰ জলাবদ্ধতা সৃষ্টি হয় বুলি মন্তব্য প্ৰকাশ কৰে মুখ্যমন্ত্ৰী হিমন্ত বিশ্ব শৰ্মাই।
সেয়েহে কেৱল চৰকাৰী ব্যৱস্থাৰ ওপৰত নিৰ্ভৰ কৰিলেই নহ’ব। মুখ্যমন্ত্ৰীয়ে উল্লেখ কৰাৰ দৰে, গুৱাহাটীৰ কৃত্ৰিম বানৰ সমস্যা সমাধানৰ বাবে এটা ‘Civic Movement’ বা নাগৰিক আন্দোলনৰ প্ৰয়োজন আছে। অৰ্থাৎ চৰকাৰৰ দায়িত্বৰ লগতে নাগৰিকৰ দায়িত্ববোধো সমানেই গুৰুত্বপূৰ্ণ। নিজৰ চহৰখন পৰিষ্কাৰ কৰি ৰখা, নলাত আৱৰ্জনা নেপেলোৱা, জলাশয় সংৰক্ষণ কৰা আৰু পৰিৱেশৰ প্ৰতি সচেতন হোৱা—এইবোৰো বান নিয়ন্ত্ৰণৰ অংশ।
গুৱাহাটীৰ কৃত্ৰিম বানৰ অন্যতম গুৰুত্বপূৰ্ণ সমস্যা হৈছে পানী নিষ্কাশনৰ আন্তঃগাঁথনি। ৰাষ্ট্ৰীয় ঘাইপথৰ কাষৰ পানী নিষ্কাশন ব্যৱস্থা উন্নত কৰাৰ বাবেও কেন্দ্ৰীয় চৰকাৰে কিছু ধন অনুমোদন দিছে বুলি মুখ্যমন্ত্ৰীয়ে উল্লেখ কৰিছে। ইয়াৰ ফলত গুৱাহাটীৰ বিভিন্ন স্থানত বৰষুণৰ পানী সোনকালে নিষ্কাশন কৰাৰ আন্তঃগাঁথনি শক্তিশালী কৰাৰ সুযোগ সৃষ্টি হ’ব পাৰে।
ইফালে, বানপীড়িত লোকসকলৰ কাষত থিয় হোৱা ৰাজনৈতিক নেতাসকলৰ ভূমিকাক লৈও মুখ্যমন্ত্ৰীয়ে ইতিবাচক মন্তব্য কৰিছে। অখিল গগৈয়ে নিজৰ সমষ্টিৰ মানুহক সহায় কৰিছে, তাত বেয়া পোৱাৰ কথা নাই বুলি তেওঁ কয়। লগতে অখিল গগৈয়ে কষ্ট কৰি থকা বুলি উল্লেখ কৰি সকলো কথাতে ৰাজনীতি কৰিলে নহ’ব বুলিও মন্তব্য কৰে।
এই মন্তব্যই এটা গুৰুত্বপূৰ্ণ বাৰ্তা বহন কৰিছে—দুৰ্যোগৰ সময়ত ৰাজনৈতিক মতাদৰ্শৰ ঊৰ্ধ্বত উঠি মানুহৰ কাষত থিয় দিয়াটোৱেই প্ৰধান কথা। বানৰ দৰে সংকটৰ সময়ত চৰকাৰ, বিৰোধী দল, সামাজিক সংগঠন, স্বেচ্ছাসেৱী সংস্থা, ইনফ্লুৱেন্সাৰ আৰু সাধাৰণ নাগৰিক—সকলোৱে নিজ নিজ সামৰ্থ্য অনুসৰি সহায়ৰ হাত আগবঢ়োৱাটো প্ৰয়োজন।
সামগ্ৰিকভাৱে মুখ্যমন্ত্ৰীৰ বক্তব্যত বান সাহায্যৰ ধনৰ স্বচ্ছতা, প্ৰকৃত বন্যাৰ্তক সহায়, গুৱাহাটীৰ কৃত্ৰিম বানৰ স্থায়ী সমাধান আৰু নাগৰিকৰ দায়িত্ব—এই চাৰিটা বিষয় বিশেষভাৱে গুৰুত্ব লাভ কৰিছে। বানপীড়িতক সহায় কৰাৰ ক্ষেত্ৰত যিমানেই চৰকাৰী ব্যৱস্থা প্ৰয়োজন, সিমানেই প্ৰয়োজন স্বচ্ছতা আৰু জনসচেতনতা। একে সময়তে গুৱাহাটীৰ কৃত্ৰিম বানৰ দৰে দীৰ্ঘদিনীয়া সমস্যাৰ স্থায়ী সমাধানৰ বাবে চৰকাৰ আৰু নাগৰিক—দুয়ো পক্ষই দায়িত্বশীলভাৱে আগবাঢ়িব লাগিব।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
