ৰাজ্যত বিগত ১০ বছৰত ৩৭ হাজাৰৰো অধিক দুৰ্ঘটনা

সোণাপুৰত কিছুদিন আগতে সংঘটিত হোৱা ভয়ংকৰ দুৰ্ঘটনাৰ পিছতো গা নলৰিল NHAI। ৰাজ্যৰ ৰাষ্ট্ৰীয় ঘাইপথত আজি আকৌ ভয়াৱহ দুৰ্ঘটনা সংঘটিত হয়। বকোৰ ভুৰ্কীবাৰীত সংঘটিত হৈছে এক ভয়ংকৰ দুৰ্ঘটনা। ৰাষ্ট্ৰীয় ঘাইপথৰ দাঁতিত দমাই থোৱা শিল আৰু বালিৰ প্ৰলেপত খুন্দা মাৰি সংঘটিত হয় এই দুৰ্ঘটনা। কথমপি প্ৰাণৰক্ষা পৰে বাহনখনত থকা দুজনকৈ লোক। শিল দমাই থোৱা স্থানত ৰাষ্ট্ৰীয় ঘাইপথ প্ৰাধিকৰণে আঁৰি থোৱা নাছিল কোনো ধৰণৰ ফলক। গুৱাহাটীৰ পৰা ধুবুৰী, শিলচৰৰ পৰা ডিব্ৰুগড়—ৰাজ্যৰ ইমূৰৰ পৰা সিমূৰলৈ সংযোগ স্থাপন কৰা ৰাষ্ট্ৰীয় ঘাইপথ এতিয়া কেৱল উন্নয়নৰ প্ৰতীক নহয়, পথ সুৰক্ষাক লৈও এক ডাঙৰ প্ৰশ্ন হৈ পৰিছে। বিগত ১০ বছৰৰ চৰকাৰী পৰিসংখ্যাই প্ৰকাশ কৰিছে এক ভয়ংকৰ ছবি। বিগত ১০ বছৰত অসমৰ ৰাষ্ট্ৰীয় ঘাইপথসমূহত সমূহত সংঘটিত হৈছে সৰু-বৰ প্ৰায় ৩৮ হাজাৰ পথ দুৰ্ঘটনা। এই দুৰ্ঘটনাত প্ৰাণ হেৰুৱাইছে ১৫ হাজাৰৰো অধিক লোকে। কেন্দ্ৰীয় চৰকাৰৰ তথ্য অনুসৰি, ২০১৬ চনৰ পৰা ২০২৫ চনলৈ অসমৰ ৰাষ্ট্ৰীয় ঘাইপথত মুঠ ৩৭,৮১৭টা পথ দুৰ্ঘটনা সংঘটিত হৈছে। দুৰ্ভাগ্যজনকভাৱে এই দুৰ্ঘটনাসমূহত ১৫,২০২জন লোকৰ মৃ*ত্যু হৈছে। অৰ্থাৎ বিগত এটা দশকত গড়ে প্ৰতিদিনে অসমৰ ৰাষ্ট্ৰীয় ঘাইপথত প্ৰায় ১০টাতকৈ অধিক দুৰ্ঘটনা সংঘটিত হৈছে। আনহাতে, প্ৰতিদিনে গড়ে ৪ জনতকৈ অধিক লোকৰ মৃ*ত্যু হৈছে পথ দুৰ্ঘটনাত।

বছৰ অনুসৰি পৰিসংখ্যা চালে দুৰ্ঘটনাৰ ভয়ংকৰ ছবিখন অধিক স্পষ্ট হৈ পৰে। ২০১৬ চনত অসমৰ ৰাষ্ট্ৰীয় ঘাইপথত ৩,৪৭৮টা দুৰ্ঘটনা সংঘটিত হৈছিল। সেই বছৰতে ১,২৯৫ জন লোকৰ মৃ*ত্যু হয়। ২০১৭ চনত দুৰ্ঘটনাৰ সংখ্যা ৩,২৭৪টালৈ কমিলেও মৃ*ত্যুৰ সংখ্যা বৃদ্ধি পাই ১,৪৬৪জন হয়। ২০১৮ চনত ৩,৯৬৩টা দুৰ্ঘটনাত ১,৫৪১জন আৰু ২০১৯ চনত ৩,৯৮৮টা দুৰ্ঘটনাত ১,৬৯০জন লোকৰ মৃ*ত্যু হয়। ২০২০ চনত ক’ভিড-১৯ মহামাৰীৰ সময়ত যান-বাহনৰ চলাচল হ্ৰাস পোৱাৰ বাবে দুৰ্ঘটনাৰ সংখ্যা ২,৯৬৩ টালৈ নামি আহে আৰু মৃ*ত্যুৰ সংখ্যাও ১,৩২২জনলৈ কমে। কিন্তু তাৰ পিছত পুনৰ বৃদ্ধি পাবলৈ ধৰে দুৰ্ঘটনা আৰু মৃ*ত্যুৰ সংখ্যা। ২০২১ চনত ৩,৪০৮টা দুৰ্ঘটনাত ১,৫৭৪ জন, ২০২২ চনত ৩,২৪৪ টা দুৰ্ঘটনাত ১,৪২৮জন আৰু ২০২৩ চনত ৩,৪২৭টা দুৰ্ঘটনাত ১,৫৬৪ জন লোকৰ মৃ*ত্যু হয়। ২০২৪: মৃ*ত্যুৰ সংখ্যাত ১০ বছৰৰ ভিতৰত সৰ্বাধিক। ২০২৪ চনটো আছিল বিশেষভাৱে চিন্তনীয়। সেই বছৰ অসমত ৰাষ্ট্ৰীয় ঘাইপথত ৩,৭৬৬টা দুৰ্ঘটনা সংঘটিত হৈছিল। এই দুৰ্ঘটনাসমূহত প্ৰাণ হেৰুৱাইছিল ১,৭২২জন লোকে। অৰ্থাৎ ২০১৬ৰ পৰা ২০২৫লৈ মৃ*ত্যুৰ সংখ্যাৰ হিচাপত ২০২৪ চনতেই সৰ্বাধিক লোকৰ মৃ*ত্যু হৈছিল। ইফালে ২০২৫ চনৰ পৰিসংখ্যাই আৰু এটা চিন্তনীয় তথ্য পোহৰলৈ আনিছে। ২০২৫ চনত অসমৰ ৰাষ্ট্ৰীয় ঘাইপথত নথিভুক্ত হোৱা দুৰ্ঘটনাৰ সংখ্যা ৬,৩০৬টা। অৰ্থাৎ ২০২৪ চনৰ ৩,৭৬৬টা দুৰ্ঘটনাৰ তুলনাত এবছৰতে দুৰ্ঘটনাৰ সংখ্যা যথেষ্ট বৃদ্ধি পাইছে। সেই বছৰটোত অৱশ্যে মৃ*ত্যুৰ সংখ্যা আছিল ১,৬০২জন। এই পৰিসংখ্যাই এটা গুৰুত্বপূৰ্ণ প্ৰশ্ন উত্থাপন কৰিছে—ৰাষ্ট্ৰীয় ঘাইপথ উন্নত আৰু বহল হোৱাৰ পিছতো দুৰ্ঘটনা কিয় কমা নাই?

বছৰ অনুসৰি সম্পূৰ্ণ হিচাপ
বছৰ      NHত দুৰ্ঘটনা      মৃত্যু
২০১৬      ৩,৪৭৮            ১,২৯৫
২০১৭       ৩,২৭৪             ১,৪৬৪
২০১৮       ৩,৯৬৩           ১,৫৪১
২০১৯        ৩,৯৮৮           ১,৬৯০
২০২০        ২,৯৬৩           ১,৩২২
২০২১         ৩,৪০৮          ১,৫৭৪
২০২২         ৩,২৪৪          ১,৪২৮
২০২৩         ৩,৪২৭           ১,৫৬৪
২০২৪          ৩,৭৬৬        ১,৭২২
২০২৫          ৬,৩০৬          ১,৬০২

মুঠ ৩৭,৮১৭ ১৫,২০২

বিগত বছৰসমূহত অসমত ৰাষ্ট্ৰীয় ঘাইপথৰ উন্নয়ন, চাৰি লেনৰ পথ নিৰ্মাণ, নতুন ৰাজপথ কৰিডৰ আৰু সংযোগ ব্যৱস্থা উন্নত কৰাৰ কাম চলিছে। কিন্তু পথ উন্নয়ন মানেই পথ দুৰ্ঘটনা হ্ৰাস পোৱা নহয়। বিভিন্ন ঠাইত লেহমেয়ী নিৰ্মাণ, ঘাইপথত হোৱা প্ৰকাণ্ড প্ৰকাণ্ড গাঁত সময়মতে মেৰামতি নকৰাৰ উপৰিও অত্যধিক গতিবেগ, অসাৱধানতাৰে গাড়ী চলোৱা, ভুল দিশে গাড়ী চলোৱা, গধুৰ বাহনৰ অধিক চলাচল, পথৰ কাষত অবৈধ পাৰ্কিং, পৰ্যাপ্ত পোহৰৰ অভাৱ আৰু বহু ক্ষেত্ৰত বিপজ্জনক পথ নিৰ্মাণৰ নক্সাও দুৰ্ঘটনাৰ অন্যতম কাৰণ হৈ পৰে। সেয়ে কেৱল নতুন পথ নিৰ্মাণ কৰিলেই নহ’ব। পথ সুৰক্ষা অডিট, ব্লেক স্পট চিনাক্তকৰণ, গতি নিয়ন্ত্ৰণ, যান-বাহনৰ দিক-নিৰ্দেশক চিহ্ন, ঘাইপথত উপযুক্ত লাইটৰ ব্যৱস্থা আৰু জৰুৰীকালীন চিকিৎসা সহায়তা অধিক শক্তিশালী কৰাৰ প্ৰয়োজন আছে।

ৰাষ্ট্ৰীয় ঘাইপথৰ উন্নয়নৰ সৈতে আন এটা বিষয়ো চৰ্চালৈ আহিছে— সেয়া হৈছে বৰ্ধিত হাৰত বৃদ্ধি পোৱা টোল গেটসমূহ। কেন্দ্ৰীয় চৰকাৰৰ তথ্য অনুসৰি, ৩১ অক্টোবৰ ২০২৫লৈ অসমত ৰাষ্ট্ৰীয় ঘাইপথত ১০টা মাচুল পৰিচালনা টোল প্লাজা আছিল। বিভিন্ন ঘাইপথ প্ৰকল্প সম্পূৰ্ণ হোৱাৰ পিছত টোল সংগ্ৰহ আৰম্ভ কৰাৰ বাবে এই fee plazaসমূহ ব্যৱহাৰ কৰা হয়।

ৰাষ্ট্ৰীয় ঘাইপথ টোল তথ্য ব্যৱস্থা (National Highways Toll Information System)ৰ তথ্য অনুসৰি অসমত কেইবাটাও toll plaza বিগত দশকত ব্যৱহাৰ হৈ আছে। উদাহৰণস্বৰূপে ৰহা আৰু দাহালপাৰা টোল প্লাজাই ২০১৭ চনত বাণিজ্যিক পৰিচালনা আৰম্ভ কৰিছিল। আনহাতে মিকিৰাতি হাওগাঁও আৰু মদনপুৰ ২০২০ চনত বাণিজ্যিক পৰিচালনা আৰম্ভ হৈছিল। অৰ্থাৎ ২০১৭ৰ পৰা ২০২০ৰ ভিতৰত অসমত একাধিক নতুন toll plaza কাৰ্যক্ষম হোৱা তথ্য চৰকাৰী toll database-ত পোৱা যায়।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ