অষ্টম দৰমহা আয়োগে বিভিন্ন কৰ্মচাৰী সংগঠন, সংঘ আৰু প্ৰতিষ্ঠানৰ প্ৰতিনিধিৰ সৈতে ধাৰাবাহিকভাৱে আলোচনা কৰি তেওঁলোকৰ মতামত সংগ্ৰহ কৰিছে। চণ্ডীগড়ত অনুষ্ঠিত আয়োগৰ দুদিনীয়া বৈঠক ১৮ ছেপ্টেম্বৰত সমাপ্ত হয়। তাৰ পিছত ৭ আৰু ৮ অক্টোবৰত বেংগালুৰুত অংশীদাৰসকলক সাক্ষাৎ কৰিব আয়োগে।
চণ্ডীগড়ত আয়োগৰ সৈতে হোৱা বৈঠকৰ অন্তত নাৰ্ছ ৱেলফেয়াৰ এছ’চিয়েশ্যন আৰু প’ষ্ট গ্ৰেজুৱেট ইনষ্টিটিউট অৱ মেডিকেল এডুকেশ্যন এণ্ড ৰিচাৰ্চ (পিজিআইএমইআৰ)য়ে তেওঁলোকৰ দাবী আয়োগে মানি ল’ব বুলি আস্থা প্ৰকাশ কৰিছে। এই নাৰ্ছ সংগঠনসমূহ অল ইণ্ডিয়া এন পি এছ এম্প্লয়িজ ফেডাৰেচন (AINEF)ৰ অংশ।
এআইএনইএফৰ সৈতে জড়িত নাৰ্চিং সংস্থাসমূহে বিশ্বাস কৰে যে আয়োগে তেওঁলোকৰ দাবী মানি ল’লে কেন্দ্ৰীয় চৰকাৰী চিকিৎসালয়, পিজিআই, ইএছআইচি চিকিৎসালয়, এইমছ আৰু অন্যান্য স্বাস্থ্যসেৱা প্ৰতিষ্ঠানত কৰ্মৰত ৩ লাখৰো অধিক নাৰ্ছ উপকৃত হ’ব। এন ডব্লিউ এয়ে কয় যে অষ্টম দৰমহা আয়োগৰ প্ৰতিনিধি আৰু নাৰ্ছসকলৰ কল্যাণমূলক সংস্থাসমূহৰ মাজত অতি গুৰুত্বপূৰ্ণ আৰু ফলপ্ৰসূ আলোচনা সমাপ্ত হৈছে।
এন ডব্লিউ এৰ মতে নাৰ্চিং বিষয়াসকলৰ বাবে ‘লেভেল-১০’ৰ আৰম্ভণিৰ দৰমহাৰ দাবী অৰ্হতাৰ মাপকাঠী উন্নীতকৰণৰ সৈতে মিল আছে—অৰ্থাৎ জি এন এমৰ পৰা বি.এছ.চি. নাৰ্চিং। ইয়াৰ উপৰিও স্বাস্থ্য আৰু পৰিয়াল কল্যাণ মন্ত্ৰালয়ৰ পৰামৰ্শ অনুসৰি নাৰ্চিং বিষয়াসকলক ‘মিলিটাৰি নাৰ্চিং চাৰ্ভিচ’ৰ স্তৰলৈ উন্নীত কৰা হৈছে।
তেওঁলোকৰ দাবীৰ ভিতৰত আছে সকলো নাৰ্চিং বিষয়াৰ বাবে নিশাৰ কৰ্তব্যৰ বাবে বিশেষ ভাট্টা আৰু আৰ ১ এইচ ১ মেট্ৰিক্সৰ অধীনত ৰিস্ক আৰু কঠোৰ পৰিশ্ৰমৰ ভাট্টা। তেওঁলোকৰ মতে নাৰ্ছৰ কাম অতি প্ৰত্যাহ্বানজনক। লগতে স্বাস্থ্যকৰ্মীসকলৰ বাবে সম্পূৰ্ণ ম্যাদী বীমা আৰু স্বাস্থ্য বীমাৰ সুবিধাও দাবী কৰে।
গৃহ ভাড়া ভাট্টা (এইচ আৰ এ) আৰু ভ্ৰমণ ভাট্টা (টি এ) নিৰ্ধাৰণৰ ক্ষেত্ৰত চণ্ডীগড়ক ‘এ১ চহৰ’ শ্ৰেণীত অন্তৰ্ভুক্ত কৰিবলৈও সংগঠনটোৱে দাবী জনাইছে। ইয়াৰ লগতে সংগঠনটোৱে নাৰ্চিং ভাট্টা, কাপোৰৰ ভাট্টা আৰু বিশেষ ভাট্টাৰো দাবী জনাইছে। ‘পুৰণি পেঞ্চন আঁচনি’ পুনৰুদ্ধাৰৰ বাবেও দাবী জনাইছে সংগঠনটোৱে।
পিজিআইএমআৰৰ নাৰ্ছসকলেও ৭ম দৰমহা আয়োগৰ অধীনত ২.৫৭ৰ তুলনাত ৩.২৫ৰ ‘ফিটমেণ্ট ফেক্টৰ’ দাবী কৰিছে। সংগঠনটোৱে যুক্তি আগবঢ়ায় যে জীৱন-যাপন, গৃহ নিৰ্মাণ, স্বাস্থ্যসেৱা আৰু শিক্ষাৰ বৰ্ধিত ব্যয়ৰ সন্মুখত উচ্চ ফিটমেণ্ট কাৰক অতি প্ৰয়োজনীয়। লগতে বাৰ্ষিক দৰমহা বৃদ্ধি ৩ শতাংশৰ পৰা ৫ শতাংশলৈ বৃদ্ধি কৰাৰ দাবী উত্থাপন কৰিছে; তেওঁলোকে কয় যে বৰ্ধিত খৰচৰ সৈতে খোজ মিলাবলৈ বৰ্তমানৰ বৃদ্ধিৰ হাৰ অপৰ্যাপ্ত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
