নিমিষা হত্যাকাণ্ডৰ তদন্তৰ মাজতে পোহৰলৈ আহিছে আন এক চাঞ্চল্যকৰ তথ্য। ঘটনাটোৰ সৈতে নাম সাঙোৰ খোৱা ৰূপম শইকীয়া ঘটনাৰ পিছদিনা সন্ধিয়াৰ পৰা সন্ধানহীন হৈ আছে। গাড়ীগাঁৱৰ বেজপাৰৰ বাসিন্দা ৰূপম শইকীয়াক বিচাৰি বৰ্তমান পৰিয়ালৰ মাজত হাহাকাৰ।
উল্লেখ্য যে, ২৫ ছেপ্টেম্বৰত আছিক আৰু নিমিষাৰ সৈতে ৰূপম শইকীয়াই একেলগে মদ্যপান কৰিছিল ৰূপমে। মদ্যপান কৰাৰ পিছত নিশা হোমষ্টেৰ পৰা ৰূপম ওলাই আহিছিল। নিশা প্ৰায় ৯.৪০ বজাত ৰূপমে ঘৰলৈ উভতি গৈছিল।
পিছদিনা পুৱা পৰিয়ালৰ কোনো লোকৰ মৃত্যুৰ খবৰ ল’বলৈ ৰূপম মিৰ্জালৈ গৈছিল। মিৰ্জাৰ পৰা উভতি অহাৰ পিছত দিনটো তেওঁ ঘৰতে আছিল বুলি জানিব পৰা যায়।
কিন্তু সন্ধিয়া পুনৰ বাইকেৰে আদাবাৰীলৈ ওলাই যায়। তাৰ পিছৰে পৰা তেওঁৰ কোনো সন্ধান পোৱা নাই। পৰিয়ালৰ লোকে বিভিন্ন স্থানত খবৰ কৰিও তেওঁৰ সন্ধান উলিয়াব পৰা নাই।
আনহাতে, ৰূপমৰ শেষ লোকেশ্যন ৰামপুৰৰ এখন পথাৰত পোৱা গৈছিল বুলি জানিব পৰা গৈছে। ইয়াৰ পিছতে তেওঁৰ মোবাইল ফোনটো ছুইটছ অফ হৈ পৰে। ফলত ঘটনাটোক লৈ অধিক ৰহস্যৰ সৃষ্টি হৈছে।
জানিব পৰা মতে, ডেৰমাহমান পূৰ্বেহে ৰূপম শইকীয়াৰ সৈতে আছিক-নিমিষাৰ চিনাকী হৈছিল। ইয়াৰ পূৰ্বে ৰূপমৰ গাড়ীতেই আছিক আৰু নিমিষা শ্বিলঙলৈ যোৱা বুলিও জানিব পৰা গৈছে। লগতে আছিক আলী ৰূপমৰ ভাতৃৰ ঘনিষ্ঠ আছিল বুলিও তথ্য পোহৰলৈ আহিছে।
নিমিষা হত্যাকাণ্ডৰ তদন্ত চলি থকাৰ সময়তে ৰূপম শইকীয়াৰ এনেদৰে সন্ধানহীন হৈ পৰা ঘটনাই স্বাভাৱিকতে বহু প্ৰশ্নৰ অৱতাৰণা কৰিছে। অৱশ্যে ৰূপমৰ সন্ধানহীন হোৱা আৰু নিমিষা হত্যাকাণ্ডৰ মাজত কোনো প্ৰত্যক্ষ সম্পৰ্ক আছে নেকি, সেয়া তদন্তৰ জৰিয়তেহে স্পষ্ট হ’ব।
বৰ্তমান সন্ধানহীন ৰূপম শইকীয়াক বিচাৰি পৰিয়ালৰ লোকে উদ্বিগ্নতাৰে অপেক্ষা কৰিছে। আৰক্ষীয়ে তেওঁৰ সন্ধান উলিয়াবলৈ কি পদক্ষেপ গ্ৰহণ কৰিছে আৰু তদন্তত পৰৱৰ্তী সময়ত কি তথ্য পোহৰলৈ আহে, সেয়া এতিয়া লক্ষ্যণীয় হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
