ভুৱা MBBSৰ নথি-পত্ৰ ব্যৱহাৰ কৰি এজন ব্যক্তিয়ে প্ৰায় ১৭ বছৰ ধৰি চৰকাৰী চিকিৎসক হিচাপে চাকৰি কৰি আহিছিল। আনকি ২০২৩ চনত তেওঁক ব্লক মেডিকেল অফিচাৰ (BMO) পদলৈও পদোন্নতি দিয়া হৈছিল। কিন্তু তেওঁৰ চিকিৎসা অৰ্হতাক লৈ অনিয়মৰ কথা পোহৰলৈ অহাৰ পিছত ব্যক্তিজনৰ বিৰুদ্ধে গোচৰ ৰুজু কৰা হয়। বৰ্তমানলৈকে অভিযুক্ত চিকিৎসকজনক গ্ৰেপ্তাৰ কৰিব পৰা হোৱা নাই। মধ্যপ্ৰদেশৰ বালাঘাট জিলাৰ পৰা পোহৰলৈ আহিছে এই চাঞ্চল্যকৰ ঘটনা। স্বাস্থ্যজনিত সমস্যাৰ লগতে শিশুৰ মৃত্যুৰ ঘটনাক লৈ উদ্বেগৰ সৃষ্টি হোৱা অঞ্চলটোত এই ঘটনা পোহৰলৈ অহাৰ পিছত স্বাস্থ্য বিভাগৰ কাম-কাজ আৰু টিকাকৰণৰ তথ্যক লৈও প্ৰশ্ন উত্থাপন হৈছে।
অভিযুক্ত সুনীল কুমাৰ সিঙে বালাঘাট জিলাৰ জনজাতি অধ্যুষিত বীৰছা ব্লকত প্ৰায় ১৭ বছৰ ধৰি চিকিৎসক হিচাপে কাম কৰিছিল বুলি জানিব পৰা গৈছে। অভিযোগ অনুসৰি, ভুৱা চিকিৎসা অৰ্হতাৰ নথি-পত্ৰৰ জৰিয়তে তেওঁ চৰকাৰী চাকৰি লাভ কৰিছিল। আচৰিত কথাটো হ’ল, ২০২৩ চনত তেওঁক ব্লক মেডিকেল অফিচাৰ (BMO) পদলৈ পদোন্নতি দিয়া হৈছিল। পিছত ৰাজ্যিক পৰ্যায়ৰ তদন্তত তেওঁৰ চিকিৎসা অৰ্হতাক লৈ অনিয়মৰ তথ্য পোহৰলৈ আহে। ইয়াৰ পিছতে তেওঁৰ বিৰুদ্ধে এজাহাৰ (FIR) দাখিল কৰা হয়। কিন্তু তদন্ত আৰম্ভ হোৱাৰ পিছতো তেওঁক এতিয়ালৈকে গ্ৰেপ্তাৰ কৰিব পৰা হোৱা নাই।
শিশুৰ মৃত্যুৰ ঘটনাৰ সৈতে কি সম্পৰ্ক?
এই গোচৰটোক লৈ অধিক উদ্বেগৰ সৃষ্টি হৈছে অঞ্চলটোত সংঘটিত একাধিক শিশুৰ মৃত্যুৰ ঘটনাক কেন্দ্ৰ কৰি। বিষয়াসকলৰ তথ্য অনুসৰি, অঞ্চলটোত আনুষ্ঠানিকভাৱে ৩২টা শিশুৰ মৃত্যুৰ খবৰ নথিভুক্ত কৰা হৈছে। ইয়াৰে কমেও সাতটা শিশুৰ মৃত্যু অভিযুক্ত চিকিৎসকজন বীৰছাত কৰ্মৰত হৈ থকা সময়ছোৱাত হৈছিল বুলি জানিব পৰা গৈছে। ইয়াৰ উপৰি, বীৰছাৰ পৰা বদলি হোৱাৰ পিছত দামোহ প্ৰাথমিক স্বাস্থ্য কেন্দ্ৰত কৰ্মৰত হৈ থকা সময়তো দুটা শিশুৰ মৃত্যুৰ ঘটনা সংঘটিত হৈছিল বুলি প্ৰতিবেদনত উল্লেখ কৰা হৈছে।
অৱশ্যে, এই মৃত্যুৰ ঘটনাসমূহৰ সৈতে অভিযুক্ত চিকিৎসকজনৰ প্ৰত্যক্ষ সম্পৰ্ক আছে বুলি প্ৰমাণিত হোৱা নাই। বিষয়াসকলেও এই কথা স্পষ্ট কৰি দিছে যে বৰ্তমানলৈকে তেওঁৰ বিৰুদ্ধে শিশুৰ মৃত্যুৰ ঘটনাৰ সৈতে জড়িত কোনো প্ৰত্যক্ষ প্ৰমাণ পোৱা হোৱা নাই।
টিকাকৰণৰ তথ্যক লৈও উত্থাপন হৈছে প্ৰশ্ন
এই ঘটনাই অঞ্চলটোত শিশুৰ টিকাকৰণৰ ব্যৱস্থাক লৈও গুৰুতৰ প্ৰশ্নৰ সৃষ্টি কৰিছে। সূত্ৰ অনুসৰি, অভিযুক্ত চিকিৎসকজনৰ কাৰ্যকালত অঞ্চলটোত প্ৰায় ৭৫ শতাংশ টিকাকৰণ সম্পূৰ্ণ হোৱা বুলি প্ৰতিবেদন দিয়া হৈছিল। কিন্তু শেহতীয়াকৈ অঞ্চলটোত শিশুৰ মাজত মিজিলছ (Measles) ৰোগৰ সংক্ৰমণ আৰু মৃত্যুৰ ঘটনাই উদ্বেগ বৃদ্ধি কৰিছে। এই পৰিস্থিতিৰ প্ৰতি লক্ষ্য ৰাখি প্ৰশাসনে ক্ষতিগ্ৰস্ত অঞ্চলসমূহত পুনৰ টিকাকৰণ অভিযান আৰম্ভ কৰিছে। বিশেষজ্ঞসকলৰ মতে, টিকাকৰণৰ তথ্য আৰু বাস্তৱ পৰিস্থিতিৰ মাজত কোনো পাৰ্থক্য আছিল নেকি, সেয়া পৰীক্ষা কৰাটো গুৰুত্বপূৰ্ণ। অৱশ্যে, কেৱল শিশুৰ মাজত মিজিলছ ৰোগৰ সংক্ৰমণ বৃদ্ধি পোৱাৰ ভিত্তিত টিকাকৰণৰ তথ্য ভুৱা আছিল বুলি নিশ্চিতভাৱে ক’ব নোৱাৰি।
বালাঘাটৰ মুখ্য চিকিৎসা আৰু স্বাস্থ্য বিষয়া ডাঃ শত্ৰুঘন সিং দহিয়াই জনোৱা মতে, অভিযুক্ত চিকিৎসকজনৰ কাৰ্যকালত অঞ্চলটোত ৭৫ শতাংশ টিকাকৰণৰ হাৰ থকা বুলি প্ৰতিবেদন দিয়া হৈছিল। তেওঁ লগতে কয় যে SAM অৰ্থাৎ গুৰুতৰভাৱে পুষ্টিহীনতাত ভোগা শিশুৰ ক্ষেত্ৰত ভেকচিনৰ সুৰক্ষামূলক প্ৰভাৱ কম হ’ব পাৰে। সেয়েহে, মিজিলছ ৰোগীৰ সংখ্যা বৃদ্ধি পোৱাটোক কেৱল টিকাকৰণ সম্পূৰ্ণৰূপে নোহোৱাৰ ফল বুলি ধৰি ল’ব নোৱাৰি।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
