পাকিস্তানৰ খাইবাৰ পাখতুনখৱা প্ৰদেশৰ পেশ্বাৱৰৰ আফ্ৰিদি আবাদ অঞ্চলত বৃহস্পতিবাৰে এখন ব্যক্তিগত বিদ্যালয়ৰ ছাদ খহি পৰাৰ ফলত কমেও শিক্ষয়িত্ৰীসহ ২১গৰাকী শিক্ষাৰ্থী নিহত হয়। নিহতৰ সংখ্যা আৰু বৃদ্ধি পোৱাৰ আশংকা কৰা হৈছে। নিহতসকলৰ ভিতৰত ৭ৰ পৰা ১২ বছৰ বয়সৰ ২০জন শিক্ষাৰ্থী আৰু এগৰাকী শিক্ষয়িত্ৰী আছে। পাকিস্তানৰ সংবাদপত্ৰ ‘ডন’ৰ প্ৰতিবেদন অনুসৰি, এই দুৰ্ঘটনাত আন ২১জন লোক আহত হৈছে। আহতসকলৰ ভিতৰত কেইবাজনৰো অৱস্থা সংকটজনক। আহতসকলক পেশ্বাৱৰৰ লেডী ৰিডিং হাস্পতালত ভৰ্তি কৰোৱা হৈছে। পৰিস্থিতিৰ গুৰুত্বৰ প্ৰতি লক্ষ্য ৰাখি হাস্পতালখনত জৰুৰীকালীন অৱস্থা ঘোষণা কৰা হয়।
পেশ্বাৱৰৰ উপায়ুক্ত আফাক ৱাজিৰে জানিবলৈ দিয়া অনুসৰি, শিক্ষাৰ্থীসকল শ্ৰেণীকোঠাত পাঠ গ্ৰহণ কৰি থকাৰ সময়তে আল খাইৰ বিদ্যালয়খনৰ ছাদ খহি পৰে। দুৰ্ঘটনাৰ পিছতে উদ্ধাৰকাৰী দল ঘটনাস্থলীত উপস্থিত হৈ ধ্বংসাৱশেষ আঁতৰোৱা আৰু তাৰ তলত আবদ্ধ হৈ থকা লোকসকলক উদ্ধাৰৰ কাম আৰম্ভ কৰে।
খাইবাৰ পাখতুনখৱাৰ ৰাজ্যপাল ফৈছাল কৰিম কুণ্ডীয়ে এই ঘটনাত গভীৰ শোক প্ৰকাশ কৰে। তেওঁ দুৰ্ঘটনাটোৰ কাৰণ নিৰ্ণয় কৰিবলৈ কৰ্তৃপক্ষক নিৰ্দেশ দিয়াৰ লগতে ঘটনাৰ সন্দৰ্ভত এখন বিস্তৃত প্ৰতিবেদন দাখিল কৰিবলৈ কয়। ৰাজ্যপালগৰাকীয়ে কয় যে নিৰীহ শিশুৰ প্ৰাণহানি অত্যন্ত বেদনাদায়ক ঘটনা। তেওঁ নিহতসকলৰ পৰিয়ালবৰ্গলৈ সমবেদনা জ্ঞাপন কৰাৰ লগতে আহতসকলৰ শীঘ্ৰে আৰোগ্য কামনা কৰে। আহত শিশুসকলে যাতে উন্নত চিকিৎসা লাভ কৰে, সেই বিষয়টোও নিশ্চিত কৰিবলৈ সংশ্লিষ্ট বিষয়াসকলক নিৰ্দেশ দিয়ে। এই শোকাৱহ ঘটনাই সমগ্ৰ অঞ্চলটোত গভীৰ শোকৰ সৃষ্টি কৰিছে। বৰ্তমানো ধ্বংসাৱশেষৰ তলত কোনো লোক আবদ্ধ হৈ আছে নেকি, সেই সন্দৰ্ভত উদ্ধাৰ অভিযান অব্যাহত আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
