ডুবাইৰ বিমান সংস্থা FlyDubaiত কৰ্মৰত মালদ্বীপৰ দুজন পাইলটক ৩০ ছেপ্টেম্বৰত FZ1073 বিমানখনৰ ককপিটত সংঘটিত আক্ৰমণৰ ঘটনাৰ পিছত সংযুক্ত আৰব আমিৰশ্বাহীৰ আৰক্ষীয়ে জিম্মাত লোৱা বুলি জানিব পৰা গৈছে। মালদ্বীপৰ সংবাদ মাধ্যম Adhadhuৰ এক প্ৰতিবেদনত এই কথা প্ৰকাশ পাইছে।
প্ৰতিবেদন অনুসৰি, দুয়োজন পাইলটক ৩ অক্টোবৰত আটক কৰা হৈছিল। কেইবাদিন ধৰি তেওঁলোক ক’ত আছে, সেই বিষয়ে পৰিয়ালৰ লোকসকলে কোনো তথ্য লাভ কৰা নাছিল। পিছত মালদ্বীপৰ দূতাবাসে তেওঁলোকৰ পৰিয়ালক এই বিষয়ে অৱগত কৰে। অৱশ্যে, বৰ্তমানলৈকে দুয়োজন পাইলটৰ নাম ৰাজহুৱা কৰা হোৱা নাই। তেওঁলোকৰ বিৰুদ্ধে কি অভিযোগ উত্থাপন কৰা হৈছে, সেই বিষয়েও কোনো স্পষ্ট তথ্য প্ৰকাশ পোৱা নাই।
উল্লেখ্য যে ৩০ ছেপ্টেম্বৰত ডুবাইৰ পৰা ইজৰাইলৰ তেল আভিভলৈ গৈ থকা এখন বিমানত এই আক্ৰমণৰ ঘটনা সংঘটিত হৈছিল। অভিযোগ অনুসৰি, বিমানখনৰ ওমানৰ সহ-পাইলটজনে বিমানত জৰুৰীকালীন অৱস্থাৰ বাবে থকা কুঠাৰসদৃশ সঁজুলিৰে বিমানখনৰ মুখ্য পাইলট ভাৰতৰ স্মিট মচ্চৰক আক্ৰমণ কৰিছিল। সংযুক্ত আৰব আমিৰশ্বাহীৰ চৰকাৰী অধিবক্তাৰ মতে, অভিযুক্ত সহ-পাইলটজনে বিমানখন ইজৰাইলৰ বেন গুৰিয়ন বিমানবন্দৰৰ যাত্ৰী টাৰ্মিনেলত খুন্দিয়াই দুৰ্ঘটনাগ্ৰস্ত কৰাৰ উদ্দেশ্য লৈছিল। সেই সময়ত বিমানখনৰ আন পাইলট, কেবিন ক্ৰু আৰু যাত্ৰীসকলে মিলি আক্ৰমণকাৰীজনক বাধা দিয়ে আৰু তেওঁক নিয়ন্ত্ৰণলৈ আনে। ইয়াৰ ফলত বিমানখন নিৰাপদে ছৌদি আৰৱৰ তাবুকত অৱতৰণ কৰিবলৈ সক্ষম হয়।
তদন্তকাৰী বিষয়াৰ আগত অভিযুক্ত সহ-পাইলটজনে এই আক্ৰমণত তেওঁ অকলে জড়িত আছিল বুলি স্বীকাৰোক্তি দিছে। কিন্তু সংযুক্ত আৰব আমিৰশ্বাহীৰ এটৰ্নী জেনেৰেলে ৯ অক্টোবৰত প্ৰকাশ কৰা বিবৃতিত উল্লেখ কৰে যে ওমানৰ অভিযুক্ত পাইলটজনৰ এই দাবী সঁচা হয় নে নহয়, সেয়া এতিয়াও তদন্ত কৰি থকা হৈছে। ঘটনাটোৰ সৈতে আন কোনো লোক জড়িত আছে নেকি, সেই বিষয়েও তদন্ত অব্যাহত আছে।
ইপিনে ‘আধাধু’ৰ প্ৰতিবেদন অনুসৰি, আটকাধীন মালদ্বীপৰ পাইলট দুজনৰ সৈতে স্মিট মচ্চৰক আক্ৰমণ কৰা অভিযুক্ত সহ-পাইলটজনৰ কৰ্মক্ষেত্ৰত যোগাযোগ আছিল। কিন্তু তেওঁলোকৰ মাজত কি ধৰণৰ যোগাযোগ হৈছিল বা দুয়োজন পাইলটক কিয় আটক কৰা হৈছে, সেই বিষয়ে এতিয়ালৈকে স্পষ্ট কৰা হোৱা নাই। মন কৰিবলগীয়া যে, কেৱল অভিযুক্তজনৰ সৈতে কৰ্মক্ষেত্ৰত যোগাযোগ থকাৰ ভিত্তিত দুয়োজন পাইলট এই আক্ৰমণৰ ষড়যন্ত্ৰৰ বিষয়ে অৱগত আছিল বা ঘটনাটোত সহায় কৰিছিল বুলি এই পৰ্যন্ত স্পষ্ট হোৱা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
