তালিকাৰ দ্বিতীয় স্থানত অসমৰ ৰূপসী

জনপ্ৰিয় পৰ্যটনস্থলীৰ পৰিৱৰ্তে নতুন, কম খৰচী আৰু কম পৰিচিত ঠাইলৈ ফুৰিবলৈ যোৱাৰ ট্ৰেণ্ড শেহতীয়াকৈ বৃদ্ধি পাইছে। অসমৰ পৰ্যটন উদ্যোগৰ বাবে সুখবৰ কঢ়িয়াই স্কাইস্কেনাৰৰ ২০২৭ চনৰ ট্ৰেভেল ট্ৰেণ্ডছ ৰিপ’ৰ্ট অনুসৰি, ৰূপসীলৈ অহাৰ বাবে ইণ্টাৰনেটত বিমানৰ SEARCH পূৰ্বৰ তুলনাত ৫০২ শতাংশ বৃদ্ধি পাইছে। ভাৰতীয় ভ্ৰমণকাৰীৰ বাবে জনপ্ৰিয় হৈ উঠা গন্তব্যস্থানসমূহৰ ভিতৰত ৰূপসীয়ে দ্বিতীয় স্থান লাভ কৰিছে। কিৰ্গিস্তানৰ ৰাজধানী বিস্কেকৰ পিছতে স্থান লাভ কৰিছে ৰূপসীয়ে। পশ্চিম অসমৰ প্ৰাকৃতিক সৌন্দৰ্য, বন্যপ্ৰাণী, ঐতিহাসিক ৰাজপ্ৰাসাদ, ধৰ্মীয় স্থান আৰু পৰম্পৰাগত হস্তশিল্পৰ বাবে জনপ্ৰিয়তা লাভ কৰিছে ৰূপসীয়ে। ৰূপসীলৈ বিমানৰ সন্ধান বৃদ্ধি পোৱাৰ আঁৰত পশ্চিম অসমৰ প্ৰাকৃতিক সৌন্দৰ্য, ঐতিহাসিক সম্পদ, ধৰ্মীয় স্থান আৰু পৰম্পৰাগত শিল্পকলাৰ প্ৰতি ভ্ৰমণকাৰীৰ আগ্ৰহো এটা কাৰণ হ’ব পাৰে। ৰাইমোনা ৰাষ্ট্ৰীয় উদ্যানৰ বন্যপ্ৰাণী, মাটিয়াবাগ ৰাজপ্ৰাসাদৰ ইতিহাস, ধুবুৰীৰ ধৰ্মীয় ঐতিহ্য, আশাৰিকান্দিৰ টেৰাকোটা শিল্প আৰু সৰলপাৰাৰ শান্ত প্ৰাকৃতিক পৰিৱেশ—এই সকলোবোৰে পশ্চিম অসমক এক সুকীয়া ভ্ৰমণ গন্তব্যস্থান হিচাপে গঢ়ি তুলিছে। ৰূপসীৰ ওচৰে-পাজৰে ফুৰিব পৰা উল্লেখযোগ্য স্থানসমূহৰ ভিতৰত হৈছে-

১. ৰাইমোনা ৰাষ্ট্ৰীয় উদ্যান

বন্যপ্ৰাণী আৰু প্ৰকৃতি ভাল পোৱা লোকসকলৰ বাবে কোকৰাঝাৰ জিলাৰ ৰাইমোনা ৰাষ্ট্ৰীয় উদ্যান এক উল্লেখযোগ্য ভ্ৰমণস্থলী। প্ৰায় ৪২২ বৰ্গ কিলোমিটাৰ এলেকাজুৰি বিস্তৃত এই উদ্যানখন জৈৱ-বৈচিত্ৰ্যৰ বাবে বিশেষভাৱে পৰিচিত। ইয়াত সোণালী বান্দৰ বা সোণালী লেংগুৰ, এছিয়ান হাতী, গৌৰ আৰু ভাৰতীয় বনৰীয়া কুকুৰৰ দৰে বিভিন্ন বন্যপ্ৰাণী পোৱা যায়। ইয়াৰ উপৰি উদ্যানখনৰ অৰণ্যত বিভিন্ন প্ৰজাতিৰ চৰাই, পখিলা আৰু উদ্ভিদ দেখা পোৱা যায়।

২. মাটিয়াবাগ ৰাজপ্ৰাসাদ

ইতিহাস আৰু ঐতিহ্যৰ প্ৰতি আগ্ৰহী লোকসকলৰ বাবে গৌৰীপুৰৰ মাটিয়াবাগ ৰাজপ্ৰাসাদ আন এক আকৰ্ষণীয় স্থান। এই ৰাজপ্ৰাসাদটো ‘হাৱা মহল’ নামেৰেও পৰিচিত। গদাধৰ নদীৰ ওচৰত অৱস্থিত এই প্ৰাসাদৰ সৈতে গৌৰীপুৰৰ পূৰ্বৰ ৰাজপৰিয়ালৰ ইতিহাস জড়িত হৈ আছে। অঞ্চলটোৰ সাংস্কৃতিক পৰিচয়ৰ ক্ষেত্ৰতো গৌৰীপুৰৰ বিশেষ স্থান আছে। বিশেষকৈ গোৱালপাৰীয়া লোকসংগীতে এই অঞ্চলৰ সাংস্কৃতিক ঐতিহ্যক সমৃদ্ধ কৰিছে। সেয়েহে মাটিয়াবাগ ৰাজপ্ৰাসাদ ভ্ৰমণৰ জৰিয়তে কেৱল ইতিহাসৰ বিষয়ে জনাই নহয়, পশ্চিম অসমৰ সংস্কৃতিৰ সৈতেও পৰিচিত হ’ব পাৰি।

৩. ধুবুৰী

ব্ৰহ্মপুত্ৰ নদীৰ পাৰত অৱস্থিত ধুবুৰী পশ্চিম অসমৰ এক গুৰুত্বপূৰ্ণ ঐতিহাসিক আৰু ধৰ্মীয় স্থান। ইয়াত বিভিন্ন ধৰ্মীয় পৰম্পৰা আৰু সংস্কৃতিৰ সমন্বয় দেখা পোৱা যায়। ধুবুৰীৰ অন্যতম উল্লেখযোগ্য স্থান হৈছে গুৰুদ্বাৰা শ্ৰী গুৰু টেগ বাহাদুৰ চাহিব জী। শিখ ধৰ্মৰ নৱম গুৰু টেগ বাহাদুৰৰ সৈতে জড়িত এই গুৰুদ্বাৰা শিখ ধৰ্মাৱলম্বী লোকসকলৰ বাবে এক গুৰুত্বপূৰ্ণ তীৰ্থস্থান। ইয়াৰ উপৰি ধৰ্মীয় আৰু ঐতিহাসিক স্থান হিচাপেও ইয়াৰ বিশেষ গুৰুত্ব আছে। আনহাতে, বগৰীবাৰীত অৱস্থিত মহামায়া ধাম দেৱী মহামায়াৰ নামত উৎসৰ্গিত এক উল্লেখযোগ্য মন্দিৰ। নিম্ন অসমৰ এই ধৰ্মীয় স্থানলৈ বহু ভক্তই দৰ্শনৰ বাবে আহে। এই স্থানসমূহ ভ্ৰমণ কৰিলে অঞ্চলটোৰ ধৰ্মীয় পৰম্পৰা, ইতিহাস আৰু স্থানীয় জীৱনশৈলীৰ বিষয়ে জানিব পাৰি।

৪. আশাৰিকান্দি: পৰম্পৰাগত টেৰাকোটাৰ গাঁও

হস্তশিল্পৰ প্ৰতি আগ্ৰহী লোকসকলৰ বাবে ধুবুৰী জিলাৰ আশাৰিকান্দি এখন বিশেষ আকৰ্ষণীয় ঠাই। এই গাঁওখন পৰম্পৰাগত টেৰাকোটা শিল্পৰ বাবে বিখ্যাত। ইয়াৰ শিল্পীসকলে স্থানীয় মাটি ব্যৱহাৰ কৰি বিভিন্ন ধৰণৰ মূৰ্তি, সজাব পৰা সামগ্ৰী আৰু শিল্পকৰ্ম তৈয়াৰ কৰে। পুৰণি পৰম্পৰা আৰু প্ৰজন্মৰ পিছত প্ৰজন্ম ধৰি চলি অহা দক্ষতাই এই শিল্পক এক বিশেষ পৰিচয় দিছে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ