মহাকাশত দেখা গ’ল এক ভয়ংকৰ দৃশ্য

জ্যোতিৰ্বিজ্ঞানীসকলে মহাকাশত এক বিৰল আৰু আশ্চৰ্যজনক ঘটনা আৱিষ্কাৰ কৰিছে। বিজ্ঞানীসকলে এটা বিশাল কৃষ্ণগহ্বৰ বিচাৰি উলিয়াইছে। এই কৃষ্ণগহ্বৰটোৱে সূৰ্যতকৈও বিশাল আকৃতিৰ এটা তৰাক নিজৰ প্ৰচণ্ড মহাকৰ্ষণীয় শক্তিৰে টুকুৰা-টুকুৰ কৰি পেলায়। এই ঘটনাটোৰ নাম দিয়া হৈছে TDE 2023MFM। বিজ্ঞানীসকলৰ মতে, এই আৱিষ্কাৰে তাৰকাৰাজ্যৰ কেন্দ্ৰৰ পৰা আঁতৰত থকা কৃষ্ণগহ্বৰৰ বিষয়ে নতুন তথ্য পোহৰলৈ আনিছে।

সাধাৰণতে অতিবৃহৎ কৃষ্ণগহ্বৰবোৰ নিজৰ তাৰকাৰাজ্যৰ কেন্দ্ৰত অৱস্থান কৰে। কিন্তু এই কৃষ্ণগহ্বৰটো তাৰকাৰাজ্যৰ কেন্দ্ৰৰ পৰা প্ৰায় ৩,৫০০ আলোকবৰ্ষ দূৰত অৱস্থিত। সেয়েহে এই ঘটনাই বিজ্ঞানীসকলৰ মাজত বিশেষ কৌতূহলৰ সৃষ্টি কৰিছে।

কৃষ্ণগহ্বৰটোৱে কেনেকৈ ধ্বংস কৰিলে তৰাটোক?

যেতিয়া কোনো তৰা কৃষ্ণগহ্বৰৰ অতি ওচৰলৈ আহে, তেতিয়া কৃষ্ণগহ্বৰৰ প্ৰচণ্ড মহাকৰ্ষণীয় বলে তৰাটোক টানি দীঘল কৰি ফালি পেলাব পাৰে। ফলত তৰাটোৰ পদাৰ্থবোৰ চাৰিওফালে বিয়পি পৰে। জ্যোতিৰ্বিজ্ঞানত এই পৰিঘটনাক জোৱাৰ-ভাটাৰ বিঘিনি (Tidal Disruption Event বা TDE) বুলি কোৱা হয়। TDE 2023MFM নামৰ এই ঘটনাটো প্ৰথমে ZTF নামৰ আকাশ পৰ্যবেক্ষণ ব্যৱস্থাই ধৰা পেলাইছিল। তাৰ পিছত হাবল স্পেচ টেলিস্কোপ, চুইফট, চন্দ্ৰ এক্স-ৰে পৰ্যবেক্ষণ কেন্দ্ৰ, কেক আৰু ভেৰী লাৰ্জ এৰে (VLA)ৰ দৰে শক্তিশালী যন্ত্ৰৰ সহায়ত ঘটনাটো অধ্যয়ন কৰা হয়।

বিজ্ঞানীসকলৰ মতে, কৃষ্ণগহ্বৰ এটা তাৰকাৰাজ্যৰ কেন্দ্ৰৰ পৰা বহু দূৰলৈ আঁতৰি যোৱাৰ কেইবাটাও কাৰণ থাকিব পাৰে।
– দুটা তাৰকাৰাজ্যৰ সংঘৰ্ষ: দুটা তাৰকাৰাজ্যৰ সংঘৰ্ষৰ সময়ত সিহঁতৰ কেন্দ্ৰত থকা কৃষ্ণগহ্বৰবোৰৰ মাজত জটিল মহাকৰ্ষণীয় ক্ৰিয়া হ’ব পাৰে। ইয়াৰ ফলত কোনো এটা কৃষ্ণগহ্বৰ কেন্দ্ৰৰ পৰা আঁতৰি যাব পাৰে।
– তিনিটা কৃষ্ণগহ্বৰৰ পাৰস্পৰিক ক্ৰিয়া: কেতিয়াবা তিনিটা কৃষ্ণগহ্বৰৰ মাজত হোৱা মহাকৰ্ষণীয় ক্ৰিয়াৰ ফলত এটাক অতি বেগেৰে বাহিৰলৈ ঠেলি পঠিওৱা হ’ব পাৰে।
– কৃষ্ণগহ্বৰৰ একত্ৰীকৰণ: দুটা কৃষ্ণগহ্বৰ একত্ৰিত হোৱাৰ সময়ত সৃষ্টি হোৱা মহাকৰ্ষণীয় তৰংগৰ ফলতো নতুনকৈ সৃষ্টি হোৱা কৃষ্ণগহ্বৰটোৱে এক শক্তিশালী ঠেলা লাভ কৰিব পাৰে। কিন্তু এনে কৃষ্ণগহ্বৰ বিচাৰি উলিওৱাটো সহজ নহয়। কাৰণ, ই কোনো তৰা বা গেছৰ সৈতে ক্ৰিয়া নকৰালৈকে সাধাৰণতে সহজে ধৰা পৰিব পৰা সংকেত নিৰ্গত নকৰে।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ