গ্ৰেটাৰ নয়ডাত সংঘটিত হৈছে এক মৰ্মান্তিক ঘটনা। শুকুৰবাৰে পুৱা মহাগুন মাইউডছ ছ’চাইটিৰ ২৩ নং মহলাৰ পৰা পৰি পিতৃ-পুত্ৰৰ মৃত্যু হয়। মৃত ১১ বছৰীয়া আৰাভ আৰু তেওঁৰ পিতৃ ৰণদীপ পাত্ৰ বুলি চিনাক্ত কৰা হৈছে। ৰণদীপ পাত্ৰই সচিবালয়ত কৰ্মৰত আছিল। পৰিয়ালটোৱে পূজা আৰু খাতু শ্যাম ধাম ভ্ৰমণৰ প্ৰস্তুতি চলাই থকাৰ সময়তে সংঘটিত হয় এই শোকাৱহ দুৰ্ঘটনা। পুত্ৰক বচাবলৈ গৈ পিতৃয়েও প্ৰাণ হেৰুৱাবলগীয়া হোৱা ঘটনাই অঞ্চলটোত শোকৰ ছাঁ পেলাইছে।
পুত্ৰক বচাবলৈ গৈ প্ৰাণ হেৰুৱালে পিতৃয়ে
প্ৰাপ্ত তথ্য অনুসৰি, শুকুৰবাৰে পুৱা প্ৰায় ৪ বজাত পৰিয়ালটোৱে খাতু শ্যাম ধামলৈ তীৰ্থযাত্ৰা কৰাৰ প্ৰস্তুতি চলাই আছিল। যাত্ৰাৰ পূৰ্বে পূজাৰ বাবে ঘৰৰ বেলকনিত থকা গছ-গছনিৰ পৰা ফুল ছিঙি আছিল পৰিয়ালৰ লোকসকল। সেই সময়তে ১১ বছৰীয়া আৰাভে বেলকনিৰ পৰা ফুল ছিঙি থাকোঁতে হঠাতে ভাৰসাম্য হেৰুৱায়। ফলত তেওঁ ৰেলিঙৰ পৰা পিছলি বাহিৰফালে ওলমি পৰে। নিজৰ পুত্ৰক বিপদত পৰা দেখি পিতৃ ৰণদীপ পাত্ৰই লগে লগে তেওঁক বচাবলৈ চেষ্টা কৰে। পুত্ৰক ওপৰলৈ টানি আনিবলৈ গৈ তেওঁ নিজেও ভাৰসাম্য হেৰুৱায়। অৱশেষত পিতৃ-পুত্ৰ দুয়োটা ২৩ নং মহলাৰ পৰা তললৈ পৰে। এই ঘটনাত দুয়োৰে থিতাতে মৃত্যু হয়।
আৰক্ষীৰ তদন্ত অব্যাহত
দুৰ্ঘটনাৰ খবৰ লাভ কৰাৰ লগে লগে বিছৰাখ আৰক্ষী ঘটনাস্থলীত উপস্থিত হয়। বিছৰাখ থানাৰ বিষয়া ৰঞ্জিত সিঙৰ মতে, আৰক্ষীয়ে মৃতদেহ দুটা উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। ঘটনাটোৰ প্ৰকৃত কাৰণ জানিবলৈ আৰক্ষীয়ে তদন্ত অব্যাহত ৰাখিছে। আনহাতে, খাতু শ্যাম ধামলৈ যোৱাৰ প্ৰস্তুতি চলাই থকা পৰিয়ালটোৰ বাবে এই ঘটনা এক ভয়ংকৰ শোকলৈ পৰিণত হয়। পিতৃ-পুত্ৰৰ আকস্মিক মৃত্যুত পৰিয়ালৰ লোকসকল ভাগি পৰাৰ লগতে মহাগুন মাইউডছ ছ’চাইটিৰ বাসিন্দাসকলৰ মাজতো গভীৰ শোকৰ সৃষ্টি হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
