আন এটা পুৰণি প্ৰৱঞ্চনাৰ গোচৰৰ তদন্তৰ স্বাৰ্থত শিৱসাগৰলৈ নিয়া হ’ব অভিযুক্ত ঘনকান্ত গগৈক। কাইলৈ শিৱসাগৰৰ মুখ্য ন্যায়িক দণ্ডাধীশ (CJM) আদালতত ঘনকান্ত গগৈক হাজিৰ কৰোৱাৰ সম্ভাৱনা আছে। ডিমৌ থানাত ৰুজু হৈ থকা এটা প্ৰৱঞ্চনাৰ গোচৰৰ ভিত্তিত তেওঁৰ বিৰুদ্ধে Production Warrant জাৰি কৰাৰ সম্ভাৱনা প্ৰকাশ পাইছে। উল্লেখ্য যে ডিমৌ থানাত ঘনকান্ত গগৈৰ বিৰুদ্ধে ১০৮/২৪ নম্বৰত এটা প্ৰৱঞ্চনাৰ গোচৰ পঞ্জীয়ন হৈ আছে। ২০২৩ চনৰ ২৫ নৱেম্বৰত ছাদ্দাম হুছেইন নামৰ এজন লোকে ঘনকান্ত গগৈৰ বিৰুদ্ধে এই গোচৰটো ৰুজু কৰিছিল।
(ঘনকান্তৰ বিৰুদ্ধে এজাহাৰ)
অভিযোগ অনুসৰি, ছাদ্দাম হুছেইনৰ পৰা মাহিলী ভাড়াৰ চুক্তিত এখন ফকলেন লৈছিল ঘনকান্ত গগৈয়ে। অৰুণাচলত কাম কৰাৰ উদ্দেশ্যে ফকলেনখন লৈ যোৱাৰ পিছত চুক্তি অনুসৰি মাহিলী ভাড়া পৰিশোধ কৰা নাছিল ঘনকান্তই। দুমাহৰ পিছত ছাদ্দাম হুছেইনে ভাড়া আৰু ফকলেনখন ঘূৰাই বিচৰাত ঘনকান্ত গগৈয়ে ফকলেনখন ঘূৰাই নিদিয়াৰ ভাবুকি দিয়াৰ অভিযোগ উত্থাপন হৈছিল। ইয়াৰ পিছতে ছাদ্দাম হুছেইনে ডিমৌ আৰক্ষী থানাত এজাহাৰ দাখিল কৰিছিল।
ইফালে, আন এটা গোচৰৰ তদন্তৰ স্বাৰ্থত কাৰাগাৰত বন্দী অভিযুক্তক আদালতত হাজিৰ কৰোৱাৰ বাবে Production Warrant জাৰি কৰিব পাৰে আদালতে। কাৰাগাৰত বন্দী হৈ থকা এজন অভিযুক্তক আন এটা গোচৰৰ তদন্ত বা আইনী প্ৰক্ৰিয়াৰ বাবে আদালতত হাজিৰ কৰোৱাৰ এয়া এক আইনী ব্যৱস্থা।
আনহাতে, শিৱসাগৰ সদৰ থানাতো ঘনকান্ত গগৈৰ বিৰুদ্ধে ২০২৪ চনত আন এটা পুৰণি গোচৰ ৰুজু হৈছিল। এই গোচৰটোৰ তদন্ত আগবঢ়োৱাৰ স্বাৰ্থত শিৱসাগৰ আৰক্ষীয়ে তেওঁক নিজৰ জিম্মাত লোৱাৰ সম্ভাৱনা আছে। লগতে গোচৰটোৰ ভিত্তিত শিৱসাগৰ আৰক্ষীয়ে তেওঁক Show Arrest কৰাৰো সম্ভাৱনা প্ৰকাশ পাইছে। সেয়েহে, আজি ঘনকান্ত গগৈক শিৱসাগৰলৈ নিয়া আৰু কাইলৈ CJM আদালতত হাজিৰ কৰোৱাৰ প্ৰক্ৰিয়াক লৈ আৰক্ষীৰ পৰৱৰ্তী পদক্ষেপৰ ওপৰত দৃষ্টি নিবদ্ধ হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
