ঝাৰখণ্ডৰ বোকাৰোত কয়লাৰ খনিত সংঘটিত হৈছে ভয়ংকৰ দুৰ্ঘটনা। কয়লাৰ স্তূপ ভাঙি খনিটোত আবদ্ধ হৈ পৰে ৭জনকৈ লোক ৷ এই ভয়াৱহ দুৰ্ঘটনাত ইতিমধ্যে তিনিগৰাকী মহিলাৰ মৃত্যু হৈছে বুলি জানিব পৰা গৈছে। বৃহস্পতিবাৰে পুৱা প্ৰায় ৪:৪৫ বজাত বাৰ্মো মহকুমাৰ কাথাৰা অ’ পি এলেকাত অৱস্থিত কাথাৰা কলিয়াৰীৰ ৫ নং ষ্টকয়াৰ্ডত সংঘটিত হয় এই দুৰ্ঘটনা।
খবৰ অনুসৰি দুৰ্ঘটনা সংঘটিত খনিটোত অবৈধভাৱে কয়লা খনন চলি আছিল। ষ্টকয়াৰ্ডত জমা কৰি ৰখা কয়লাৰ বৃহৎ অংশ খহি এই দুৰ্ঘটনা সংঘটিত হয়। স্থানীয় গাঁওবাসীয়ে এই পেলনীয়া কয়লা ইন্ধনৰ বাবে উলিয়াই আনিছিল। হঠাৎ কয়লাৰ থোপা এটা ভাঙি ছয়গৰাকী মহিলা আৰু এজন পুৰুষক আৱদ্ধ কৰি পেলায়। দুৰ্ঘটনাটোৰ তথ্য লাভ কৰাৰ লগে লগে আটাইকেইজন আহতক কয়লাৰ স্তূপৰ পৰা টানি চিকিৎসাৰ বাবে চিচিএল হাস্পতাললৈ লৈ যোৱা হয়, য’ত তিনিগৰাকী মহিলাৰ মৃত্যু হোৱা বুলি জানিব পৰা গৈছে।
দুৰ্ঘটনাটোৰ বিষয়ে আৰক্ষীক অৱগত কৰা হয়। ঘটনাস্থলীত আৰক্ষীৰ এটা দল উপস্থিত হৈ বিষয়টোৰ তদন্ত আৰম্ভ কৰে। নিহত দুগৰাকীৰ নাম কৌশল্য দেৱী আৰু পুষ্পা দেৱী। নিহত তৃতীয়গৰাকী মহিলাৰ নাম এতিয়াও পোহৰলৈ অহা নাই। তিনিওজনেই বন্ধ বস্তিৰ বাসিন্দা বুলি জানিব পৰা গৈছে।
এই কথা নিশ্চিত কৰিছে বেৰ্মোৰ এছডিপিঅ’ ৰবীন্দ্ৰ সিঙে। তেওঁ উল্লেখ কৰে যে ঘটনাৰ পৰিস্থিতি নিৰ্ণয়ৰ বাবে তদন্ত কৰা হ’ব। স্থানীয় আৰক্ষী আৰু চিচিএল ব্যৱস্থাপনা ঘটনাস্থলীত উপস্থিত হৈ যাৱতীয় ব্যৱস্থা গ্ৰহণ কৰিছে। আহতসকলৰ অৱস্থা আৰু দুৰ্ঘটনাৰ কাৰণ সন্দৰ্ভত অধিক তথ্যৰ বাবে অপেক্ষা কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
