উত্তৰ প্ৰদেশৰ লক্ষ্ণৌৰ খাণ্ডছাৰা গাঁৱত এক হৃদয়বিদাৰক ঘটনাই সমগ্ৰ অঞ্চলটোত চাঞ্চল্যৰ সৃষ্টি কৰিছে। একেটা পৰিয়ালৰ তিনিটা শিশুৰ চাৰিদিনৰ ভিতৰতে ৰহস্যজনকভাৱে মৃ*ত্যু ঘটিছে। তিনিওটা শিশুৰ প্ৰথমে মৃদু জ্বৰ হৈছিল। পৰৱৰ্তী সময়ত স্বাস্থ্যৰ অৱনতি ঘটাৰ পিছত তেওঁলোকৰ মৃ*ত্যু হয়। পৰিয়ালৰ লোকৰ দাবী অনুসৰি, মৃ*ত্যুৰ সময়ত শিশুকেইটাৰ নাক আৰু মুখৰ পৰা তেজ ওলাইছিল। একেৰাহে দুটা শিশুৰ মৃ*ত্যুৰ পিছতো প্ৰথম অৱস্থাত স্বাস্থ্য বিভাগে বিশেষ ব্যৱস্থা গ্ৰহণ কৰা নাছিল। কিন্তু বৃহস্পতিবাৰে পুৱা তৃতীয়টো শিশুৰ মৃ*ত্যুৰ পিছতে আৰক্ষী আৰু স্বাস্থ্য বিভাগৰ দল গাঁওখনত উপস্থিত হয় আৰু ঘটনাৰ তদন্ত আৰম্ভ কৰে।
৪ দিনৰ ভিতৰতে ৩ শিশুৰ মৃত্যু
বিগত ৯ নৱেম্বৰৰ নিশা প্ৰায় ২:৩০ বজাত আশিস কুমাৰ নামৰ লোকজনৰ ৩ বছৰীয়া কনিষ্ঠ পুত্ৰ দিব্যাংশ খেলি থকা অৱস্থাত হঠাৎ অসুস্থ হৈ পৰে। শিশুটোৰ মৃদু জ্বৰ হোৱাত পৰিয়ালৰ লোকে চিকিৎসালয়লৈ লৈ যায়। কিন্তু চিকিৎসালয়লৈ যোৱাৰ পথতে শিশুটোৰ মৃত্যু হয়।
প্ৰথমটো শিশুৰ মৃত্যুৰ পিছদিনা অৰ্থাৎ ১০ নৱেম্বৰত পৰিয়ালটোৰ ৭ বছৰীয়া পুত্ৰ কাৰ্তিকো একে ধৰণে অসুস্থ হৈ পৰে। কিছু সময়ৰ পিছতে শিশুটোৰো মৃত্যু হয়। পৰিয়ালৰ লোকে দুয়োটা শিশুৰ মৃত্যুৰ পিছত কোনো আৰক্ষী বা চিকিৎসা তদন্ত নকৰাকৈয়ে তেওঁলোকৰ শেষকৃত্য সম্পন্ন কৰে।
পৰিয়ালটোৰ ১০ বছৰীয়া ডাঙৰ কন্যা লক্ষ্মীও ১০ নৱেম্বৰৰ নিশা জ্বৰ আৰু পেটৰ বিষত আক্ৰান্ত হয়। পৰিয়ালৰ লোকে শিশুটোক ততাতৈয়াকৈ ডুবাগাৰ এখন ব্যক্তিগত চিকিৎসালয়লৈ লৈ যায়। কিন্তু বৃহস্পতিবাৰে পুৱা চিকিৎসকে লক্ষ্মীক মৃত ঘোষণা কৰে।
তৃতীয়টো শিশুৰ চিকিৎসা প্ৰতিবেদনত কি পালে?
তৃতীয়টো শিশুৰ চিকিৎসা পৰীক্ষাৰ প্ৰতিবেদনত দুয়োটা হাওঁফাওঁতে তীব্ৰ নিউমোনিয়াৰ লক্ষণ ধৰা পৰিছে। স্বাস্থ্য বিভাগৰ বিষয়াসকলে জনোৱা মতে, লক্ষ্মীৰ তেজৰ পৰীক্ষাত টাইফয়েড, ডেংগু আৰু মেলেৰিয়াৰ কোনো নিশ্চিত লক্ষণ পোৱা হোৱা নাই। বৃহস্পতিবাৰে মুখ্য চিকিৎসা বিষয়া (CMO) ডাঃ এন বি সিঙৰ নিৰ্দেশত স্বাস্থ্য বিভাগৰ এটা বিশেষ দল গাঁওখনত উপস্থিত হয়। দলটোত অতিৰিক্ত মুখ্য চিকিৎসা বিষয়া ডাঃ বি এন যাদৱ, জিলা চোৱাচিতা বিষয়া ডাঃ নিশান্ত নিৰ্বাণ, জনস্বাস্থ্য বিশেষজ্ঞ ডাঃ অতুল ভাৰ্মা আৰু মাল CHCৰ অধীক্ষক ডাঃ ধনঞ্জয় কুশৱাহা আছিল। গাঁওখন পৰিদৰ্শন কৰাৰ সময়ত স্বাস্থ্য বিভাগৰ বিষয়াসকলে খাদ্য বিষক্ৰিয়াৰ সম্ভাৱনাও প্ৰকাশ কৰে। অৱশ্যে মৃত্যুৰ প্ৰকৃত কাৰণ এতিয়াও নিশ্চিত হোৱা নাই।
মৃত্যুৰ প্ৰকৃত কাৰণক লৈ ৰহস্য
একেটা পৰিয়ালৰ তিনিটা শিশুৰ অতি কম সময়ৰ ভিতৰতে মৃত্যু হোৱাৰ ঘটনাই বহু প্ৰশ্নৰ সৃষ্টি কৰিছে। শিশুকেইটাৰ মৃত্যুৰ কাৰণ কোনো সংক্ৰামক ৰোগ, খাদ্য বিষক্ৰিয়া নে আন কোনো স্বাস্থ্যজনিত সমস্যা, সেয়া এতিয়াও স্পষ্ট হোৱা নাই। স্বাস্থ্য বিভাগ আৰু আৰক্ষীৰ তদন্তৰ পিছতহে এই ৰহস্যজনক ঘটনাৰ প্ৰকৃত কাৰণ পোহৰলৈ আহিব। বৰ্তমান সকলোৰে দৃষ্টি মৰণোত্তৰ পৰীক্ষাৰ প্ৰতিবেদন আৰু চিকিৎসা বিভাগৰ পৰৱৰ্তী তদন্তৰ ওপৰত কেন্দ্ৰীভূত হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
