দক্ষিণ কৰিমগঞ্জৰ নিলামবজাৰত সংঘটিত হৈছে এক অতি ভয়ংকৰ আৰু চাঞ্চল্যকৰ ঘটনা। নিজৰ দুই ভাতৃক হত্যা কৰাৰ লগতে পিতৃ-মাতৃ আৰু আন এজন ভাতৃক প্ৰাণে মৰাৰ চেষ্টা চলোৱাৰ অভিযোগ উত্থাপন হৈছে ফাৰুক আহমেদ নামৰ এজন যুৱকৰ বিৰুদ্ধে। এই নৃশংস ঘটনাই সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে।
প্ৰাপ্ত তথ্য অনুসৰি, নিলামবজাৰ থানাৰ অন্তৰ্গত গোলাঘাটত নিশা সংঘটিত হয় এই ভয়ংকৰ ঘটনা। অভিযোগ অনুসৰি, ফাৰুক আহমেদে নিজৰ পৰিয়ালৰ সদস্যসকলৰ ওপৰত নৃশংসভাৱে আক্ৰমণ চলায়। এই আক্ৰমণত প্ৰাণ হেৰুৱায় তেওঁৰ দুই কণমানি ভাতৃ জাহাংগীৰ হুছেইন (৮) আৰু আলম উদ্দিন (৭)-এ। নিহত দুই শিশুৰ বয়স ৮ বছৰৰ তলত। এনে নিষ্ঠুৰ ঘটনাই অঞ্চলবাসীক গভীৰ শোকত পেলাইছে।
ইফালে, অভিযুক্তৰ আক্ৰমণত গুৰুতৰভাৱে আহত হৈছে পিতৃ খলিল উদ্দিন, মাতৃ আলিয়া বেগম আৰু আন এজন ভাতৃ আলতাফ হুছেইন। তিনিওজনৰে অৱস্থা সংকটজনক বুলি জানিব পৰা গৈছে। আহতসকলক ততাতৈয়াকৈ উন্নত চিকিৎসাৰ বাবে শিলচৰ চিকিৎসা মহাবিদ্যালয় হাস্পতাল (SMCH)-লৈ প্ৰেৰণ কৰা হৈছে।
ঘটনাৰ খবৰ লাভ কৰাৰ পিছতে নিশাই নিলামবজাৰ আৰক্ষীয়ে অভিযান চলাই অভিযুক্ত ফাৰুক আহমেদক আটক কৰে। ঘটনাস্থলীত আৰক্ষীৰ দল উপস্থিত হৈ তদন্ত আৰম্ভ কৰিছে। নিজৰ পৰিয়ালৰ সদস্যৰ ওপৰত সংঘটিত এনে ভয়ংকৰ আক্ৰমণৰ ঘটনাই সমগ্ৰ দক্ষিণ কৰিমগঞ্জ অঞ্চলত তীব্ৰ প্ৰতিক্ৰিয়াৰ সৃষ্টি কৰিছে। অৱশ্যে, এই নৃশংস ঘটনাৰ আঁৰৰ প্ৰকৃত কাৰণ এতিয়াও স্পষ্ট হোৱা নাই। আৰক্ষীৰ তদন্তৰ পিছতহে ঘটনাৰ সম্পূৰ্ণ তথ্য পোহৰলৈ অহাৰ সম্ভাৱনা আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
