কংগ্ৰেছ নেতা তথা লোকসভাৰ বিৰোধী দলপতি ৰাহুল গান্ধীৰ এটা মন্তব্যক কেন্দ্ৰ কৰি দেশৰ ৰাজনীতিত সৃষ্টি হৈছে নতুন বিতৰ্কৰ। পিতৃ ৰাজীৱ গান্ধী আৰু মাতৃ ছোনিয়া গান্ধীৰ মাজৰ সম্পৰ্কক লৈ কৰা এক ব্যক্তিগত মন্তব্যৰ পিছতে বিজেপি নেতাসকলে ৰাহুল গান্ধীক তীব্ৰ সমালোচনা কৰে। ইয়াৰ প্ৰতিক্ৰিয়া হিচাপে এইবাৰ ভগৱান শিৱ আৰু দেৱী পাৰ্বতীৰ এখন ছবি ছ’চিয়েল মিডিয়াত শ্বেয়াৰ কৰি বিজেপি আৰু RSSক লক্ষ্য কৰি লৈছে ৰাহুল গান্ধীয়ে।
মঙলবাৰে ছ’চিয়েল মিডিয়া প্লেটফৰ্ম এক্সত ভগৱান শিৱ আৰু দেৱী পাৰ্বতীৰ ছবি শ্বেয়াৰ কৰি ৰাহুল গান্ধীয়ে প্ৰেম, ঘৃণা আৰু ভয়ক লৈ নিজৰ মত প্ৰকাশ কৰে। তেওঁ কয় যে বিজেপি আৰু RSSৰ সমৰ্থকসকলৰ হৃদয়ত ভয়, খং আৰু ঘৃণাই এনে এখন জালৰ সৃষ্টি কৰিছে, যাৰ বাবে তেওঁলোকে প্ৰেম অনুভৱ কৰিবলৈ বা প্ৰকাশ কৰিবলৈ সক্ষম হোৱা নাই।
ৰাহুল গান্ধীয়ে লগতে কয় যে এজন প্ৰকৃত হিন্দু হিচাপে মানুহক এই জালৰ পৰা মুক্ত কৰাটো তেওঁৰ কৰ্তব্য। যাতে সকলোৱে নিজৰ জীৱনত প্ৰেম, আপোনত্ব আৰু ইয়াৰ সৈতে জড়িত সৌন্দৰ্য আৰু আনন্দ অনুভৱ কৰিব পাৰে। নিজৰ পোষ্টৰ শেষত তেওঁ ‘সত্যম শিৱম সুন্দৰম’ বুলি উল্লেখ কৰে।
পিতৃ-মাতৃৰ সম্পৰ্কক লৈ কি কৈছিল ৰাহুল গান্ধীয়ে?
দৰাচলতে সোমবাৰে দিল্লীত মাতৃ ছোনিয়া গান্ধীৰ গ্ৰন্থ ‘Belonging: A Journey of Love’ উন্মোচনী অনুষ্ঠানত উপস্থিত আছিল ৰাহুল গান্ধী। অনুষ্ঠানটোত তেওঁ নিজৰ শৈশৱৰ কিছু ব্যক্তিগত স্মৃতিৰ কথা উল্লেখ কৰিছিল। বিশেষকৈ পিতৃ ৰাজীৱ গান্ধী আৰু মাতৃ ছোনিয়া গান্ধীৰ মাজত থকা গভীৰ প্ৰেম আৰু মৰমৰ সম্পৰ্কৰ কথা বৰ্ণনা কৰিছিল।
ৰাহুল গান্ধীয়ে কৈছিল যে সৰুতে তেওঁলোকৰ ঘৰত পৰিয়ালৰ সকলোৱে একেলগে আহাৰ গ্ৰহণ কৰাৰ সময়ত পিতৃ ৰাজীৱ গান্ধী উপস্থিত থকা সময়ত তেওঁৰ কোলাত বহিছিল মাতৃ ছোনিয়া গান্ধী। সৰুতে এই দৃশ্য তেওঁৰ বাবে একেবাৰে স্বাভাৱিক আছিল। কিন্তু বন্ধু-বান্ধৱীৰ ঘৰলৈ যোৱাৰ পিছত তেওঁ দেখিছিল যে আন পৰিয়ালত পিতৃ-মাতৃৰ মাজত এনে ধৰণৰ মৰমৰ প্ৰকাশ দেখা নাযায়। আনকি বন্ধুসকলক তেওঁ সুধিছিল যে তেওঁলোকৰ ঘৰত মাতৃয়ে পিতৃৰ কোলাত কিয় নবহে।
ৰাহুল গান্ধীৰ মতে, তেওঁ এনে এটা পৰিৱেশত ডাঙৰ-দীঘল হৈছিল, য’ত পিতৃ-মাতৃৰ মাজত থকা গভীৰ প্ৰেম, মৰম আৰু ইজনে সিজনৰ প্ৰতি থকা সন্মান দেখাৰ সুযোগ পাইছিল। তেওঁ লগতে কৈছিল যে তেওঁৰ মাতৃ ছোনিয়া গান্ধী ৰাজীৱ গান্ধীৰ বাবে আৰু ৰাজীৱ গান্ধী ছোনিয়া গান্ধীৰ বাবে আছিল। অনুষ্ঠানত মাতৃৰ সন্মুখতে ৰাহুল গান্ধীয়ে পিতৃয়ে ছোনিয়া গান্ধীক কিমান গভীৰভাৱে ভাল পাইছিল, সেই কথাও উল্লেখ কৰে। পত্নীৰ প্ৰতি ৰাজীৱ গান্ধীৰ থকা প্ৰেম আৰু সন্মানৰ কথা ভাষাৰে বৰ্ণনা কৰাটো কঠিন বুলিও তেওঁ মন্তব্য কৰে।
ৰাহুল গান্ধীক লক্ষ্য কৰি কি ক’লে হিমন্ত বিশ্ব শৰ্মাই?
ৰাহুল গান্ধীৰ এই মন্তব্যৰ পিছতে বিজেপি নেতাসকলৰ মাজত প্ৰতিক্ৰিয়াৰ সৃষ্টি হয়। অসমৰ মুখ্যমন্ত্ৰী হিমন্ত বিশ্ব শৰ্মায়ো ছ’চিয়েল মিডিয়াত এটা ভিডিঅ’ শ্বেয়াৰ কৰি ৰাহুল গান্ধীক কটাক্ষ কৰে। হিমন্ত বিশ্ব শৰ্মাই লিখে, “ক্ষমা কৰিব মেম, আপোনাৰ জীৱনৰ ইমান বিশেষ দিনটোতো তেওঁ আপোনাক লাজৰ পৰা বচাব নোৱাৰিলে।”
ইয়াৰ উপৰি তেওঁ কয় যে দেশবাসীয়ে বহু আগতেই কথাটো বুজি পাইছিল আৰু এতিয়া ছোনিয়া গান্ধীয়েও এই কথা বুজি পাব বুলি আশা কৰে। ৰাহুল গান্ধীক সমালোচনা কৰি তেওঁ এনে এক ‘উৎপাদন’ বুলি কটাক্ষ কৰে, যাক বাৰে বাৰে মুকলি কৰিলেও কোনো ফল পোৱা নাযায়।
শিৱ-পাৰ্বতীৰ ছবি শ্বেয়াৰ কৰি বিজেপিক প্ৰত্যুত্তৰ
বিজেপি নেতাসকলৰ এনে সমালোচনাৰ পিছতে ৰাহুল গান্ধীয়ে শিৱ-পাৰ্বতীৰ ছবি শ্বেয়াৰ কৰি প্ৰেম আৰু ঘৃণাৰ প্ৰসংগ উত্থাপন কৰে। তেওঁৰ বক্তব্যত বিজেপি আৰু আৰ এছ এছৰ সমৰ্থকসকলক লক্ষ্য কৰি ভয়, খং আৰু ঘৃণাৰ পৰিৱৰ্তে প্ৰেম আৰু আপোনত্বৰ অনুভূতি গঢ়ি তোলাৰ আহ্বান দেখা যায়।
এনেদৰেই মাতৃ ছোনিয়া গান্ধীৰ গ্ৰন্থ উন্মোচনী অনুষ্ঠানত ৰাহুল গান্ধীয়ে শৈশৱৰ এটা পাৰিবাৰিক স্মৃতিৰ কথা উল্লেখ কৰাৰ পিছতে বিষয়টোৱে ৰাজনৈতিক বিতৰ্কৰ ৰূপ লয়। এটা ব্যক্তিগত পাৰিবাৰিক মুহূৰ্তক কেন্দ্ৰ কৰি কংগ্ৰেছ আৰু বিজেপিৰ মাজত আৰম্ভ হোৱা এই বাক্যযুদ্ধই এতিয়া বিশেষ চৰ্চা লাভ কৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ

















