অসমত কাইলৈৰ পৰা ৪৮ ঘণ্টীয়া কৰ্মবিৰতিৰ ঘোষণা কৰিছে মটৰ শ্ৰমিক আৰু গাড়ীৰ মালিকপক্ষৰ কেইবাটাও সংগঠনে। বিভিন্ন দাবী পূৰণৰ উদ্দেশ্যে গ্ৰহণ কৰা এই বন্ধ কাৰ্যসূচীৰ ফলত ৰাজ্যজুৰি বাছসহ যাত্ৰীবাহী বাণিজ্যিক বাহনৰ চলাচল ব্যাহত হোৱাৰ আশংকা কৰা হৈছে। ২০ নৱেম্বৰৰ পুৱা ৬ বজাৰ পৰা ২২ নৱেম্বৰৰ পুৱা ৬ বজালৈ এই ৪৮ ঘণ্টীয়া কৰ্মবিৰতিৰ কাৰ্যসূচী ৰূপায়ণ কৰা হ’ব। ফলত দুদিন ধৰি যাতায়াতৰ ক্ষেত্ৰত সমস্যাৰ সন্মুখীন হ’ব পাৰে সাধাৰণ যাত্ৰীসকল।
কি কি দাবী লৈ বন্ধৰ ঘোষণা?
মটৰ শ্ৰমিক আৰু গাড়ীৰ মালিক সংগঠনসমূহে দীৰ্ঘদিন ধৰি বিভিন্ন সমস্যা আৰু দাবী উত্থাপন কৰি আহিছে। বিশেষকৈ অসম পৰিবহণ শ্ৰমিক সামাজিক সুৰক্ষা আঁচনি শীঘ্ৰে কাৰ্যকৰী কৰাৰ দাবী উত্থাপন কৰিছে সংগঠনসমূহে। শ্ৰমিকসকলৰ সামাজিক আৰু আৰ্থিক সুৰক্ষা নিশ্চিত কৰাৰ ক্ষেত্ৰত এই আঁচনি কাৰ্যকৰী কৰাটো অত্যন্ত গুৰুত্বপূৰ্ণ বুলি তেওঁলোকে মত প্ৰকাশ কৰিছে।
ইয়াৰ লগতে পেট্ৰ’ল, ডিজেলকে ধৰি পেট্ৰ’লজাত সামগ্ৰীৰ মূল্যবৃদ্ধি আৰু গাড়ীৰ বিভিন্ন যন্ত্ৰাংশৰ অত্যধিক মূল্যবৃদ্ধিয়ে পৰিবহণ ব্যৱসায়ত প্ৰভাৱ পেলাইছে বুলি অভিযোগ উত্থাপন কৰিছে গাড়ীৰ মালিকসকলে। গাড়ী চলোৱাৰ খৰচ ক্ৰমাগতভাৱে বৃদ্ধি পোৱাৰ বিপৰীতে আয়ৰ ক্ষেত্ৰত সেই অনুপাতে বৃদ্ধি নোহোৱাত পৰিবহণ খণ্ডৰ সৈতে জড়িত লোকসকল সমস্যাৰ সন্মুখীন হৈছে।
৭০ শতাংশ গাড়ীভাড়া বৃদ্ধিৰ দাবী
নিত্যপ্ৰয়োজনীয় সামগ্ৰীৰ মূল্যবৃদ্ধিৰ লগতে পেট্ৰ’ল-ডিজেল আৰু গাড়ীৰ বিভিন্ন যন্ত্ৰাংশৰ দাম বৃদ্ধিৰ প্ৰতি লক্ষ্য ৰাখি গাড়ীভাড়া ৭০ শতাংশ বৃদ্ধি কৰাৰ দাবী জনাইছে সংগঠনসমূহে। তেওঁলোকৰ মতে, বৰ্তমানৰ ভাড়াৰে গাড়ী চলাই ব্যৱসায় চলাই থকাটো ক্ৰমাৎ কঠিন হৈ পৰিছে। সেয়েহে ভাড়া বৃদ্ধি কৰি পৰিবহণ ব্যৱসায়ৰ সৈতে জড়িত মালিক আৰু শ্ৰমিকসকলৰ আৰ্থিক সমস্যা কিছু পৰিমাণে সমাধান কৰাৰ দাবী উত্থাপন কৰিছে।
দুদিনলৈ যাতায়াতত সমস্যাৰ আশংকা
এই ৪৮ ঘণ্টীয়া কৰ্মবিৰতিৰ ফলত ৰাজ্যৰ বিভিন্ন প্ৰান্তত বাছ, ট্ৰেভেলাৰ আৰু অন্যান্য যাত্ৰীবাহী বাণিজ্যিক বাহনৰ চলাচল বন্ধ বা সীমিত হোৱাৰ সম্ভাৱনা আছে। বিশেষকৈ দৈনিক কৰ্মস্থলীলৈ অহা-যোৱা কৰা লোক, শিক্ষাৰ্থী, চিকিৎসাৰ বাবে যাত্ৰা কৰা লোক আৰু দূৰণিবটীয়া যাত্ৰীসকল অধিক সমস্যাৰ সন্মুখীন হ’ব পাৰে।
২০ নৱেম্বৰৰ পুৱা ৬ বজাৰ পৰা আৰম্ভ হ’বলগীয়া এই বন্ধ কাৰ্যসূচী ২২ নৱেম্বৰৰ পুৱা ৬ বজাত সমাপ্ত হোৱাৰ কথা। সংগঠনসমূহে নিজৰ দাবীসমূহ পূৰণৰ উদ্দেশ্যে এই ৪৮ ঘণ্টীয়া কৰ্মবিৰতিৰ সিদ্ধান্ত গ্ৰহণ কৰিছে।
বন্ধৰ ফলত ৰাজ্যৰ পৰিবহণ ব্যৱস্থাত কেনে প্ৰভাৱ পৰে আৰু চৰকাৰ তথা সংশ্লিষ্ট কৰ্তৃপক্ষই সংগঠনসমূহৰ দাবীৰ প্ৰতি কেনে পদক্ষেপ গ্ৰহণ কৰে, সেয়া পৰৱৰ্তী সময়ত লক্ষণীয় হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ

















