প্ৰতিটো মানুহৰে সপোন থাকে এখন সুন্দৰ আৰু শান্তিৰে ভৰা ঘৰৰ।সেই ঘৰখনত সুখ-শান্তি, সমৃদ্ধি আৰু ইতিবাচক পৰিৱেশ বৰ্তাই ৰাখিবলৈ বহুতে বাস্তু শাস্ত্ৰৰ নিয়ম মানি চলে। বাস্তু শাস্ত্ৰ অনুসৰি ঘৰৰ মূল দুৱাৰখনক বিশেষ গুৰুত্ব দিয়া হয়। কিয়নো মূল দুৱাৰখনক ঘৰখনৰ প্ৰৱেশদ্বাৰ হিচাপে গণ্য কৰা হয়। পৰম্পৰাগত বিশ্বাস অনুসৰি এই দুৱাৰেদিয়েই ঘৰলৈ ইতিবাচক শক্তি আৰু সমৃদ্ধিৰ আগমন ঘটে। আজি জানক বাস্তুশাস্ত্ৰমতে আমাৰ ঘৰখন সজাবলৈও আমি নীতি-নিয়ম অনুসৰণ কৰিব লাগে।
মূল দুৱাৰৰ সন্মুখত তুলসী গছ ৰাখক
হিন্দু ধৰ্মীয় পৰম্পৰাত তুলসী গছক অতি পৱিত্ৰ বুলি গণ্য কৰা হয়। বাস্তু শাস্ত্ৰৰ বিশ্বাস অনুসৰি ঘৰৰ উপযুক্ত স্থানত তুলসী গছ ৰোপণ কৰিলে ইতিবাচক পৰিৱেশ সৃষ্টি হয়। মূল দুৱাৰৰ কাষত পৰ্যাপ্ত পোহৰ আৰু বতাহ পোৱা স্থানত তুলসী গছ ৰাখিব পাৰে।
দুৱাৰত লগাওক শুভ চিহ্ন
ঘৰৰ মূল দুৱাৰত আমৰ পাতৰ তোৰণ, ফুলৰ মালা বা পৰম্পৰাগত শুভ চিহ্ন ব্যৱহাৰ কৰাটো বহুদিনীয়া পৰম্পৰা। বাস্তু আৰু ধৰ্মীয় বিশ্বাস অনুসৰি এনে সজ্জাই ঘৰলৈ মংগল আৰু ইতিবাচক শক্তি আনে বুলি ধাৰণা কৰা হয়।
দুৱাৰৰ সন্মুখত ৰাখক পৰিষ্কাৰ পানীৰ পাত্ৰ
ঘৰৰ মূল দুৱাৰৰ ওচৰত ফুলেৰে সজোৱা পৰিষ্কাৰ পানীৰ পাত্ৰ ৰাখিব পাৰে। পৰম্পৰাগত বিশ্বাস অনুসৰি পানীক পৱিত্ৰতা আৰু সমৃদ্ধিৰ প্ৰতীক হিচাপে গণ্য কৰা হয়। অৱশ্যে পানী সদায় পৰিষ্কাৰ কৰি ৰাখিব লাগে।
ঘৰৰ মূল দুৱাৰৰ সন্মুখত ৰাখক সুন্দৰ ৰংগোলী
ভাৰতীয় পৰম্পৰাত ঘৰৰ মূল দুৱাৰৰ সন্মুখত ৰংগোলী অংকন কৰাটো শুভ বুলি গণ্য কৰা হয়। বিশেষকৈ উৎসৱ-পাৰ্বণ আৰু পূজা-পাতলৰ সময়ত ঘৰৰ প্ৰৱেশদ্বাৰত ৰংগোলী অংকন কৰিলে ঘৰখনৰ সৌন্দৰ্য বৃদ্ধি পায়। বাস্তুৰ বিশ্বাস অনুসৰিও ইয়াক মংগলৰ প্ৰতীক হিচাপে গণ্য কৰা হয়।
দুৱাৰৰ সন্মুখত পৰ্যাপ্ত পোহৰৰ ব্যৱস্থা কৰক
বাস্তু শাস্ত্ৰ অনুসৰি ঘৰৰ মূল দুৱাৰখন আন্ধাৰ হৈ থকাটো ভাল বুলি গণ্য কৰা নহয়। সেয়েহে মূল দুৱাৰৰ সন্মুখত পৰ্যাপ্ত পোহৰৰ ব্যৱস্থা কৰিব লাগে। ইয়াৰ ফলত ঘৰখনৰ প্ৰৱেশদ্বাৰটো অধিক আকৰ্ষণীয় আৰু নিৰাপদ হৈ পৰে।
মূল দুৱাৰৰ সন্মুখত কি কি বস্তু ৰাখিব নালাগে?
বাস্তু শাস্ত্ৰৰ পৰম্পৰাগত নিয়ম অনুসৰি ঘৰৰ মূল দুৱাৰৰ সন্মুখত কিছুমান বস্তু ৰখাৰ পৰা বিৰত থাকিবলৈ পৰামৰ্শ দিয়া হয়।
- ভঙা জোতা-চেণ্ডেল বা অপৰিষ্কাৰ বস্তু জমা কৰি নাৰাখিব।
- আৱৰ্জনা বা জাবৰৰ পাত্ৰ দুৱাৰৰ সন্মুখত নাৰাখিব।
- ভঙা আচবাব বা ব্যৱহাৰ নকৰা সামগ্ৰী জমা নকৰিব।
- মূল দুৱাৰৰ সন্মুখত ডাঙৰ গছ বা এনে কোনো বস্তু নাৰাখিব, যিয়ে প্ৰৱেশৰ পথ বন্ধ কৰে।
- দুৱাৰৰ সন্মুখত পানী জমা হ’বলৈ নিদিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ

















