কাজিৰঙা-মানাহৰ পাছত এইবাৰ আহোম ইতিহাস বিৰজিত চৰাইদেউ মৈদাম বিশ্ব ঐতিহ্য ক্ষেত্ৰ
অসমৰ চৰাইদেউ জিলাত অৱস্থিত আহোম যুগৰ মৈদামলৈ ইউনেস্ক’ৰ বিশেষ স্বীকৃতি, লাভ কৰিলে বিশ্ব ঐতিহ্য ক্ষেত্ৰ হিচাপে সুনাম। প্ৰথমবাৰৰ বাবে উত্তৰ-পূৰ্বাঞ্চলৰ কোনো ঐতিহ্যই এই তালিকাত স্থান লাভ কৰিছে।
কাজিৰঙা, মানাহৰ পিছত চৰাইদেউ মৈদামে পালে এই বিৰল স্বীকৃতি। অসমৰ তৃতীয় আৰু ভাৰতৰ ৪৩সংখ্যক ঐতিহ্যক্ষেত্ৰ ৰূপে পৰিগণিত হ’ল চৰাইদেউ মৈদাম।
বৃহস্পতিবাৰেই মুখ্যমন্ত্ৰী হিমন্ত বিশ্ব শৰ্মাই এই কথা ছচিয়েল মিডিয়াযোগে অসমবাসীক জনাইছিল। ছচিয়েল মিডিয়াত মুখ্যমন্ত্ৰী হিমন্ত বিশ্ব শৰ্মাই লিখিছিল, চৰাইদেউ মৈদামলৈ ইউনেস্ক’ৰ স্বীকৃতি অসমৰ জনসাধাৰণৰ বাবে এক মাইলৰ খুটি হ’ব। আমি আনুষ্ঠানিক ঘোষণাৰ বাবে অপেক্ষা কৰিছো। এই স্মৰণীয় মুহূৰ্ত প্ৰত্যক্ষ কৰিবলৈ আমি একত্ৰিত হওঁ আহক, একেলগে উদযাপন কৰো আহক আমাৰ সমৃদ্ধ ঐতিহ্য আৰু গৌৰৱ।
আহোম মৈদাম হৈছে পিৰামিডৰ দৰে অনন্য টিলা সদৃশ গঠন, যিবোৰ টাই-আহোম বংশই নিজৰ বংশৰ সদস্যসকলক তেওঁলোকৰ প্ৰিয় বস্তুৰ সৈতে সমাধিস্থ কৰিবলৈ ব্যৱহাৰ কৰিছিল। ই অসমৰ ৰাজপৰিয়ালৰ কবৰস্থান।
এই চৰাইদেউ মৈদামক বিশ্ব ঐতিহ্য ক্ষেত্ৰ হিচাপে অন্তৰ্ভুক্ত কৰাৰ পৰামৰ্শ দিছিল আন্তঃৰাষ্ট্ৰীয় পৰামৰ্শদাতা সংস্থা আইক’ম’ছে। ‘সাংস্কৃতিক আৰু মিশ্ৰিত সম্পত্তিৰ মনোনয়নৰ মূল্যায়ন’ নামৰ প্ৰতিবেদনখন আন্তৰ্জাতিক কীৰ্তিচিহ্ন আৰু স্থান পৰিষদে প্ৰস্তুত কৰিছিল। এই প্ৰতিবেদন নতুন দিল্লীত অনুষ্ঠিত বিশ্ব ঐতিহ্য সমিতিৰ ৪৬ সংখ্যক অধিৱেশনত দাখিল কৰা হৈছিল।
আহোমই এই মৈদামৰ মাটিকালি ৯৫.০২ হেক্টৰ আৰু ইয়াৰ বাফাৰ জ’ন ৭৫৪.৫১১ হেক্টৰ। প্ৰতিবেদনত কোৱা হৈছে যে চৰাইদেউত অৱস্থিত মৈদামৰ ভিতৰত ৯০টা গঠন আছে, যিবোৰ ওখ মাটিত অৱস্থিত। এইবোৰ ইটা, শিল বা মাটিৰে তৈয়াৰী ফুটা মাটিৰ টিলাৰ দৰে তৈয়াৰ কৰা হৈছিল। ইয়াত অষ্টভুজ দেৱালৰ মাজত এটা মন্দিৰ নিৰ্মাণ কৰা হৈছিল। চৰাইদেউত অৱস্থিত মৈদাম আহোম ৰজা-ৰাণীৰ কবৰস্থান। মধ্যযুগীয় যুগৰ অসমৰ শিল্পীসকলৰ স্থাপত্য আৰু বিশেষজ্ঞতাৰ নিদৰ্শন।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
