অসম লাইভ২৪ঃ কেইবাঘণ্টা ধৰি বন্ধ হৈ আছে উত্তৰকাশীৰ ভঙা সুৰংগত চলোৱা উদ্ধাৰকাৰ্য। কেতিয়া আকৌ উদ্ধাৰৰ কাম আৰম্ভ হ’ব সেই সম্পৰ্কে কোনেও স্পষ্টকৈ ক’ব নোৱাৰে। শুকুৰবাৰৰ দুপৰীয়া ১১ বজাৰ পৰা উদ্ধাৰৰ কাম পুনৰ আৰম্ভ হ’ব বুলি জনাইছিল যদিও বৰ্তমানলৈকে উদ্ধাৰৰ কাম আৰম্ভ হোৱা নাই। উদ্ধাৰকাৰী দলে বুধবাৰৰ দিনটোত জনাইছিল যে ২৪ ঘণ্টাৰ ভিতৰতেই উদ্ধাৰকাৰ্য সম্পন্ন হ’ব। কিন্তু ৪৮ঘণ্টা পাৰ হৈ যোৱাৰ পাছতো উদ্ধাৰ কৰিব পৰা নাই শ্ৰমিককেইজনক। আৱদ্ধ ৪১ শ্ৰমিকক উদ্ধাৰৰ বাবে চলাই থকা উদ্ধাৰকাৰ্য কেইমিটাৰ মান দূৰত্বত থমকি ৰৈছে। উদ্ধাৰকাৰ্য ৰখাই দিয়াৰ প্ৰধান কাৰণ হৈছে সুৰংগৰ মাটি কটা যন্ত্ৰত প্ৰযুক্তিগত সমস্যাই দেখা দিছে। ইয়াৰোপৰি যি কাঠামোৰ ওপৰত বহুৱাই এই যন্ত্ৰ চলোৱা হৈছিল তাতো ফাঁট মেলিছে। যন্ত্ৰৰ মেৰামতি কৰি শুকুৰবাৰেই আকৌ উদ্ধাৰৰ কাম আৰম্ভ হ’ব বুলি জনাইছে উদ্ধাৰকাৰী দলে।
উত্তৰাখণ্ডৰ প্রশাসনিক বিষয়াই জনোৱা অনুসৰি, বৃহস্পতিবাৰে পুৱাৰ পৰাই শ্ৰমিকক উদ্ধাৰৰ শেষ পৰ্যায়ত উপনীত হৈছে উদ্ধাৰকাৰী দল। কিন্তু কিছু যান্ত্ৰিক অসুবিধাৰ বাবে এই কাম ৰখাই দিয়া হৈছে। বুধবাৰে নিশা খনন কৰি থকাৰ সময়তেই যন্ত্ৰৰ আগত এটা লোহাৰ ৰ’ড আহে। সেই ৰ’ডত খুন্দা লাগি ড্ৰিল মেছিন বিকল হৈছে। যাৰবাবে কাম কিছুসময়ৰ বাবে স্তব্ধ কৰি দিয়া হৈছে। ইয়াৰোপৰি মাজে মাজে ড্ৰিলিঙৰ কাম এনেও বন্ধ কৰিব লগা হয়। কাৰণ ড্ৰিল মেচিন গৰম হৈ পৰে। ঠাণ্ডা কৰিবৰ বাবেই কিছুসময়ৰ বাবে কাম ৰখাই দিয়া হয়।
শ্ৰমিকসকলৰ কাষ পাবলৈ আৰু অলপমান দূৰহে বাকী। বৰ্তমানলৈকে উদ্ধাৰকাৰী আৰু শ্ৰমিকসকলৰ মাজত মাত্ৰ কেই মিটাৰমানহে দূৰত্ব আছে। এই দূৰত্ব অতিক্ৰম কৰিবৰ বাবেই বাধা আহি পৰিছে। যাৰবাবে এই উদ্ধাৰকাৰ্য কেতিয়া সম্পূৰ্ণ হৈ উঠিব কোনেও নাজানে। উদ্ধাৰকাৰী দলে জনোৱামতে বুধবাৰে নিশাৰে পৰা সুৰংগৰ বাহিৰত অপেক্ষা কৰি আছে ৪১ খন এম্বুলেঞ্চে। সুৰংগৰ পৰা বাহিৰলৈ অনাৰ লগে লগেই শ্ৰমিকসকলক হাস্পতাললৈ লৈ যোৱা হ’ব। ঘটনাস্থলত অস্থায়ী স্বাস্থ্য পৰিসেৱাৰ ব্যৱস্থাও কৰা হৈছে। তাতেই ৪১ খন বিচনাও ৰেডী কৰা হৈছে। সকলোধৰণৰ জৰুৰী পৰিস্থিতিৰ বাবে উদ্ধাৰকাৰী দল সাজু হৈ আছে। কোনো শ্ৰমিক গুৰুতৰ অৱস্থাত থাকিলে তেওঁলোকক বিমানেৰে উচ্চ পৰ্যায়ৰ চিকিৎসাৰ বাবে পঠিয়াই দিবলৈকো সাজু হৈ আছে।
বিগত ১২ নৱেম্বৰত উত্তৰকাশী জিলাৰ ব্ৰহ্মতাল-যমুনাত্ৰী ৰাষ্ট্ৰীয় ঘাইপথৰ ওপৰৰ চিল্কিয়াৰা আৰু ডণ্ডালহগাঁৱৰ মাজত নিৰ্মীয়মান সুৰংগৰ একাংশ খহি পৰিয়েই আৱদ্ধ হৈ আছে ৪১ জন শ্ৰমিক। শ্ৰমিক আৱদ্ধ হৈ থকা সুৰংগটো প্ৰায় ৮ মিটাৰ ওখ আৰু চাৰে চাৰি কিঃমিঃ দীঘল। ভঙা সুৰংগৰ ভিতৰত প্ৰায় ৬০০ মিটাৰ ধ্বংসস্তূপৰ পিছত আৱদ্ধ হৈ আছে কৰ্মৰত ৪১ শ্ৰমিক। সেই ঘটনাৰ আজি ১৩ দিন সম্পূৰ্ণ হৈছে। ৰাজ্য আৰু কেন্দ্ৰ উভয় চৰকাৰেই শ্ৰমিকক নিৰাপদে বাহিৰলৈ অনাৰ বাবে যথাসাধ্য চেষ্টা চলাইছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
