অভিশপ্ত ১২ জুন বৃহস্পতিবাৰ! প্ৰাণ হেৰুৱালে সৰ্বমুঠ ২৯৭গৰাকীয়ে, আজি মোদী উপস্থিত হ’ব ঘটনাস্থলীত
অভিশপ্ত বৃহস্পতিবাৰ! অভিশপ্ত ১২ জুন। ভাৰতৰ ইতিহাসত লিখা থাকিব ১২ জুনৰ অতিকে হৃদয়বিদাৰক ঘটনাৰ বিষয়ে। মাথো কেইটামান মুহুৰ্ত, কেইটামান ছেকেণ্ড। নিমিষতে শেষ হৈ যায় ২৯৭ গৰাকী লোকৰ প্ৰাণ।
কালি গুজৰাটৰ আহমেদাবাদত সংঘটিত হোৱা বিমান দুৰ্ঘটনাত এতিয়ালৈকে ২৯৭ জন লোকৰ মৃত্যু হোৱা বুলি নিশ্চিত কৰা হৈছে। বিমানখনত থকা ২৪২ জনৰ ভিতৰত ২৪১ জনৰ মৃত্যু হৈছে। দুৰ্ঘটনাটোত মাত্ৰ এজন যাত্ৰীহে ৰক্ষা পৰে।
নিহতসকলৰ ভিতৰত ২২৯ জন যাত্ৰী হোৱাৰ বিপৰীতে ১২ জন বিমানখনৰ ক্ৰু মেম্বাৰ। ইয়াৰ উপৰিও বিমানখন দুৰ্ঘটনাগ্ৰস্ত হোৱা মেডিকেল কলেজৰ হোষ্টেলত উপস্থিত থকা ৫৬ জন লোকেও প্ৰাণ হেৰুৱাইছে।
আজি সেই অভিশপ্ত ঘটনাস্থলীত উপস্থিত হ’ব প্ৰধানমন্ত্ৰী মোদী। কালি গৃহমন্ত্ৰী অমিত শ্বাহে সেই স্থানত উপস্থিত হৈ পৰিস্থিতিৰ বুজ লয়। ইফালে বিমান দুৰ্ঘটনাৰ তদন্তও তীব্ৰতৰ হৈ পৰিছে। তদন্তৰ বাবে চৰকাৰে গঠন কৰিছে এখন উচ্চ পৰ্যায়ৰ কমিটী।
আহমেদাবাদত সংঘটিত হোৱা এয়াৰ ইণ্ডিয়াৰ বিমান দুৰ্ঘটনাৰ পিছত একমাত্ৰ জীৱিত আৰু আহত এমবিবিএছৰ ছাত্ৰ-ছাত্ৰীক আহমেদাবাদ অসামৰিক চিকিৎসালয়ত চিকিৎসাধীন হৈ আছে। আনহাতে আজি পুৱাই মৃত যাত্ৰীক চিনাক্ত কৰিবলৈ ডি এন এৰ নমুনাও সংগ্ৰহ কৰা হৈছে।
বিমানখনত মুঠ ২৩০ জন যাত্ৰী আছিল, য’ত আছিল ১৬৯ জন ভাৰতীয়, ৫৩ জন ব্ৰিটিছ, ৭ জন পৰ্তুগীজ আৰু এজন কানাডাৰ নাগৰিক। বাকীসকল আছিল ১২ জন ক্ৰু মেম্বাৰ। বিমানখনত থকা লোকসকলৰ ভিতৰত আছিল ১০৩জন পুৰুষ, ১১৪গৰাকী মহিলা, ১১টা শিশু আৰু ২টা নৱজাতক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
