অসম লাইভ২৪ঃ এই মুহূৰ্তত কৃত্ৰিম বুদ্ধিমত্তাৰ(AI) দক্ষতাক লৈ সমগ্ৰ বিশ্বতে চৰ্চা চলিছে৷ বিজ্ঞানীয়ে দাবী কৰামতে শীঘ্ৰেই মানুহৰ ঠাই দখল কৰিব কৃত্ৰিম ৰবটে৷ কাম হেৰুৱাব লাখ লাখ মানুহে৷ এই প্ৰযুক্তিয়ে টোপনি কাঢ়িছে বহুলোকৰেই৷ বিশেষজ্ঞসকলৰ মতে AI অহাৰ পাছতেই অধিবক্তা, অৰ্থনীতিবিদ, লেখক, প্ৰশাসনিক কৰ্মীসকলৰ চাকৰিলৈ সংকট আহিব৷ এনে কোনো কাম নাই যি কাম AIয়ে কৰিব নোৱাৰে৷ কিন্তু এই সকলোবোৰ পাৰিলেও AIয়ে কৰিব নোৱাৰিক এটা কাম৷ এই ক্ষেত্ৰতেই ব্যৰ্থ হ’ব কৃত্ৰিম বুদ্ধিমত্তা৷ সেয়া হৈছে ধৰ্ম৷ এই ক্ষেত্ৰত নিযুক্ত হৈ থকা লোকসকলৰ চাকৰি খোৱাৰ ক্ষমতা AIৰ নাই৷ সাম্প্ৰতিক সময়ত চলা এক গৱেষণাত পোহৰলৈ আহিছে এই তথ্য৷
ধৰ্মক ইণ্ডাষ্ট্ৰী ক’লে ভুল হ’ব৷ কিন্তু প্ৰতিটো ধৰ্মীয় কাম কাজ পৰিচালনাৰ বাবেই বিশেষ সংস্থা থাকে৷ এই সংস্থাৰ অধীনত কাম কৰি থাকে বহুলোকে৷ মানুহৰ বাবে এই সেৱাত নিযুক্ত হৈ থাকে বহু ব্যক্তি৷ তেঁওলোকে এই কামৰ জৰিয়তেই পৰিয়াল পোহপাল দিয়ে৷ বিশ্বৰ একাধিক ইণ্ডাষ্ট্ৰী দখল কৰিলেও এই ক্ষেত্ৰ দখল কৰাৰ সাধ্য নাই AIৰ বুলি গৱেষণাত প্ৰকাশ পাইছে৷
ৰবট পুৰোহিত বা কৃত্ৰিম ধৰ্মীয় প্ৰচাৰক হ’ব নোৱাৰে!
AIয়ে যদি ধৰ্মীয় কামত অংশগ্ৰহণ কৰে তেন্তে মানুহে ধৰ্মৰ ওপৰতেই আস্থা হেৰুৱাই পেলাব৷ এই প্ৰশ্নকেই তুলিছে বিশেষজ্ঞসকলে৷ সম্প্ৰতি এটা ঘটনাত দেখা গৈছে যে য’ত পুৰোহিত নাথাকে তাত AIৰ পুৰোহিতৰ তত্ত্বাবধানত বিয়া কৰাব পাৰিব দম্পত্তিয়ে৷ এই বিষয়টোক লৈ তুমুল বিতৰ্কও চলিছিল৷ অধিকাংশৰেই মত, ধৰ্মত AIৰ ব্যৱহাৰে বিশ্বাসযোগ্যতা ভংগ কৰিব৷ জাপানৰ কিয়োটোত থকা জি-বৌদ্ধ মন্দিৰত মিণ্ডাৰ নামৰ এটা ৰবট আনিছে৷ সেই ৰবট দেখাত অবিকল মানুহ৷ ধৰ্ম প্ৰচাৰৰ বাবেই অনা হৈছে এই ৰবট৷ এই ৰবটে ধৰ্মৰ বাণী কেনেদৰে বিলাই তাকে চাবলৈকে বিশেষ বৌদ্ধ মন্দিৰটোত ভিৰ কৰে সাধাৰণ জনতাই৷ এই ৰবট তৈয়াৰৰ নামত প্ৰায় ১০ লাখ ডলাৰ খৰচ হৈছে৷
সকলোবোৰ ঠিকেঠাকে আগবাঢ়িলেও ৰবটক চাবলৈ আহিলেও কিন্তু ৰবটৰ সৈতে প্ৰাৰ্থনা কৰি সন্তুষ্ট নহয় একাংশ ভক্ত৷ তেওঁলোকে পূৰ্বৰ তুলনাত অনুদাৰো কমকৈ দিবলৈ লৈছে৷ ইতিমধ্যেই কৃত্ৰিম বুদ্ধিমত্তাই বিশ্বত খলকনি তুলিলেও ধৰ্মৰ নামত ইয়াক ব্যৱহাৰ কৰা ইমান সোনকালে সম্ভৱ হৈ নুঠিব বুলি জনাইছে বিশেষজ্ঞৰ দলে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
