ভাৰতৰ প্ৰধানমন্ত্ৰী পদত অধিষ্ঠিত হোৱাৰ পাছত বিচক্ষণ ৰাজনীতিক নৰেন্দ্ৰ মোদীয়ে দেশৰ সকলো প্ৰান্তৰ আৰু সকলো স্তৰৰ নাগৰিকৰে সম্পৰ্ক স্থাপনৰ বাবে ৰচনা কৰে কৌশল৷ আৰু সেই কৌশলেৰে পৰৱৰ্তী পৰ্যায়ত সমগ্ৰ ভাৰতবৰ্ষত প্ৰধানমন্ত্ৰীগৰাকীয়ে নিজৰ জনপ্ৰিয়তা বৃদ্ধি কৰিবলৈ সক্ষম হৈছে৷
প্ৰধানমন্ত্ৰী নৰেন্দ্ৰ মোদীৰ সেই কৌশল হৈছে ‘মন কী বাত’ অনুষ্ঠান৷ ২৬ জুনত এই অনুষ্ঠানটিৰ ৯০ সংখ্যক খণ্ডত সম্প্ৰচাৰিত হয়৷ কিন্তু প্ৰধানমন্ত্ৰীগৰাকীৰ এই সফল পৰীক্ষণৰ আঁৰত থকা অনুষ্ঠানটো কি?
আকাশবাণীৰ বাবেহে সফল হৈছে প্ৰধানমন্ত্ৰীৰ কৌশল। হয়, ‘মন কী বাত’ অনুষ্ঠানৰ জৰিয়তে দেশৰ সকলো প্ৰান্তৰ সকলো স্তৰৰ নাগৰিকৰ মাজলৈ প্ৰধানমন্ত্ৰীৰ বাৰ্তা প্ৰেৰণ কৰা অনুষ্ঠানটো হৈছে আকাশবাণী৷ অৰ্থাৎ ৰেডিঅ’ চেণ্টাৰ৷ ভাৰতত আকাশবাণীৰ ইতিহাসো বহু দীঘলীয়া৷
প্ৰথম পৰীক্ষামূলক ৰেডিঅ’ সম্প্ৰচাৰ ১৯২৩ চনত। চৰকাৰৰ আনুষ্ঠানিক ৰেডিঅ’ সম্প্ৰচাৰ ১৯২৭ চনত। ৯৪ বছৰীয়া হ’ল ভাৰতত ৰেডিঅ’ চেণ্টাৰৰ ইতিহাস। আকাশবাণী হিচাপে পৰিচয় লাভ ১৯৫৭ত । আকাশবাণী প্ৰতিষ্ঠা হৈছিল ১৯৩৬ চনত ।
ভাৰতৰ আকাশবাণী অৰ্থাৎ ৰেডিঅ’ চেণ্টাৰৰ ইতিহাস বহু দীঘলীয়া৷ পোনতে ব্যক্তিগত খণ্ডৰ বোম্বাই প্ৰেছিডেন্সী ৰেডিঅ’ ক্লাবে ১৯২৩ চনত ৰেডিঅ’ত পৰীক্ষামূলক সম্প্ৰচাৰ আৰম্ভ কৰিছিল৷ অৱশ্যে সেই উদ্যোগ সম্পূৰ্ণ ব্যক্তিগত আছিল৷
ইংৰাজ শাসিত ভাৰতত ১৯২৭ চনৰ ২৩ জুলাইত ৰেডিঅ’ চেণ্টাৰৰ আনুষ্ঠানিক সম্প্ৰচাৰ আৰম্ভ হয়৷ তেতিয়াৰে পৰা ভাৰতবৰ্ষত ৰেডিঅ’ অৰ্থাৎ আকাশবাণীয়ে পিছলৈ উভতি চাবলগীয়া হোৱা নাই৷
আজি তথ্য প্ৰযুক্তি আৰু ছ’চিয়েল মিডিয়াৰ লগতে দৃশ্য-শ্ৰব্য মাধ্যমৰ অভাৱনীয় উত্তৰণৰ মাজতো আকাশবাণী বা অল ইণ্ডিয়া ৰেডিঅ’ৰ এক বিশেষ মৰ্যাদা অক্ষুণ্ণ আছে৷
কেৱল সিমানেই নহয়, ভাৰতৰ জনগণৰ মাজত ৰেডিঅ’ চেণ্টাৰৰ প্ৰভাৱ আৰু ভূমিকাও উলাই কৰিব পৰা বিধৰ নহয়৷ আৰু সেইবাবে প্ৰধানমন্ত্ৰী নৰেন্দ্ৰ মোদীয়ে বাৰ্তা প্ৰেৰণৰ বাবে এই ৰেডিঅ’ পচন্দ কৰিছে৷ কিন্তু কিয়?
ভাৰতত আছে ৪৫০টা ৰেডিঅ’ চেণ্টাৰ। ৰেডিঅ’ চেণ্টাৰৰ প্ৰভাৱ থকা এলেকা ৯২ শতাংশ। ৯৯.১৯ শতাংশ জনতাৰ ওপৰত আছে ৰেডিঅ’ৰ প্ৰভাৱ । ২৩টা আঞ্চলিক ভাষাত পূৰ্ণাংগ ৰেডিঅ’ সম্প্ৰচাৰ। ১৭৯টা দোৱান বা কথিত ভাষাটো ৰেডিঅ’ সম্প্ৰচাৰ।
সমগ্ৰ দেশত বিজেপিৰ সৰ্বব্যাপি নেটৱৰ্ক থকাৰ উপৰিও প্ৰধানমন্ত্ৰী নৰেন্দ্ৰ মোদীয়ে ৰেডিঅ’ চেণ্টাৰক বাছি লৈছে কিয়? দেশত আৰ এছ এছৰ অৰ্ধশতাধিক বিবিধ ক্ষেত্ৰৰ সংগঠন আছে৷
সেই সংগঠনৰো পৰিসৰ আৰু ব্যাপকতা কম নহয়৷ কিন্তু তাৰ পাছতো ৰেডিঅ’ চেণ্টাৰত বাৰ্তা প্ৰেৰণৰ বাবে নিৰ্বাচন কৰাৰ মূল কাৰণটো হৈছে আকাশবাণীয়ে ভাৰতৰ সৰ্বমুঠ ভূখণ্ডৰ ৯২ শতাংশ ঠাইত বিস্তাৰিত হৈ আছে৷
আৰু আকাশবাণীয়ে স্পৰ্শ কৰা লোকৰ সংখ্যা মুঠ জনসংখ্যাৰ ৯৯ শতাংশ৷ গতিকে ইমান বৃহৎ এলেকাত বৃহৎসংখ্যক জনতাৰ মাজলৈ নিজৰ বাৰ্তা প্ৰেৰণ কৰাৰ বাবে প্ৰধানমন্ত্ৰী মোদীয়ে আকাশবাণীকে মূল অনুষ্ঠান হিচাপে লৈছে৷
অন্য অৰ্থত বিজেপিৰ জয়যাত্ৰা আৰু ৰাজনৈতিক প্ৰভাৱত আকাশবাণীৰ প্ৰভাৱো উল্লেখযোগ্য হিচাপে বিবেচিত হৈছে৷
✍️মানৱেন্দ্ৰ কুমাৰ দাস
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
