ইণ্ডিয়ান প্ৰিমিয়াৰ লীগ অৰ্থাৎ IPLৰ সম্প্ৰচাৰৰ বাবে কেবাটাও ক’ৰ্পৰেট গোষ্ঠীৰ মাজত এক আকৰ্ষণীয় যুঁজ আৰম্ভ হৈছে৷
আন্তঃৰাষ্ট্ৰীয় সংবাদ সংস্থা ৰয়টাৰ-ৰ মতে টেলিভিশ্যন আৰু ডিজিটেল মাধ্যমসমূহত IPLৰ খেলসমূহ সম্প্ৰচাৰৰ স্তত্ব ক্ৰয়ৰ দৰ অভিলেখসংখ্যক ৫০ হাজাৰ কোটি টকা স্পৰ্শ কৰিব পাৰে৷
সংবাদ সংস্থাটোৰ মতে আমাজন আৰু ৰিলায়েন্স ইণ্ডাষ্ট্ৰিজ-এ IPLৰ পাঁচবছৰৰ বাবে টিভি আৰু ডিজিটেল মাধ্যমসমূহত সম্প্ৰচাৰৰ একচেতীয়া অধিকাৰৰ বাবে চ’নি গ্ৰুপ আৰু ৱাল্ট ডিজনীৰ ইণ্ডিয়াৰ ইউনিটৰ সৈতে প্ৰতিদ্বন্দ্বিতাত নামিব পাৰে৷
আৰু দুয়োপক্ষৰ মাজৰ সম্প্ৰচাৰৰ এই স্বত্ব ক্ৰয় মূল্যই অভিলেখসংখ্যক ৫০ হাজাৰ কোটি টকা স্পৰ্শ কৰাৰ সম্ভাৱনা আছে৷
স্মৰ্তব্য যে ইয়াৰ পূৰ্বে ডিজনী মালিকাধীন ষ্টাৰ ইণ্ডিয়াই ২০১৭ চনৰ পৰা ২০২২ চনলৈকে সম্প্ৰচাৰৰ স্বত্বৰ বাবে ১৬,৩৪৮ কোটি টকা পৰিশোধ কৰিছিল৷
উল্লেখ্য যে ২.৫ বিলিয়ন অনুৰাগীৰে ক্ৰিকেট হৈছে বিশ্বৰ দ্বিতীয় সৰ্বোচ্চ জনপ্ৰিয় ক্ৰীড়া৷ আৰু IPL হৈছে বিশ্ব ক্ৰিকেটৰ বৃহত্তম টুৰ্ণামেণ্টসমূহৰ আটাইতকৈ আগশাৰী টুর্ণামেণ্ট৷
২০২১ বৰ্ষৰ IPLৰ প্ৰথম ছেছনত টিভি আৰু ডিজিটেল মাধ্যমসমূহত দৰ্শনাৰ্থীৰ সংখ্যা আছিল ৩৫০ মিলিয়নৰো অধিক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
