অসম লাইভ২৪ঃ ভাৰতীয় জনতা পাৰ্টীৰ নেতা তথা IT চেলৰ প্ৰধান অমিত মালব্য ভাৰত জোড়ো ন্যায় যাত্ৰাৰ এটা ভিডিঅ’ পোষ্ট কৰিছে। দেওবাৰে সেই ভিডিঅ’ত দেখা গৈছে যে ৰাহুল গান্ধীৰ সন্মুখত একাংশ বিজেপি কৰ্মীয়ে পতাকা লৈ জয় শ্ৰী ৰাম ধ্বনি দিছে। বাছৰ ভিতৰৰ পৰাই সেই শ্লোগান শুনি বাছৰ পৰা নামিবলৈ চেষ্টা কৰে কংগ্ৰেছ নেতা ৰাহুলে। অমিত মালব্যই সেই ছবি পোষ্ট কৰি ৰাহুলৰ বিৰুদ্ধে অভিযোগ আনিছে, ‘ৰাহুলে জয় শ্ৰী ৰাম ধ্বনি আৰু মোদী মোদী শ্লোগান শুনিব নোৱাৰি মেজাজ হেৰুৱাই পেলাইছে। খঙটো ফ্লায়িং কিছ দি ঢাকিবলৈ চেষ্টা কৰিলেও সকলোবোৰ ওলাই পৰিছে। ৰাহুলে এইখিনিতেই মেজাজ হেৰুৱালে ভৱিষ্যতে কেনেকৈ দেশক প্ৰতিনিধিত্ব কৰিব?’
https://x.com/amitmalviya/status/1749041429727383720?s=20
‘হিন্দু বিৰোধী কংগ্ৰেছে যেনেকৈ ৰাম মন্দিৰৰ প্ৰাণ প্ৰতিষ্ঠা অনুষ্ঠানৰ আমন্ত্ৰণ প্ৰত্যাখান কৰিছে, সেই বিষয়টোক দেশৰ মানুহে সহজভাৱে ল’ব পৰা নাই। জনগণৰ প্ৰতিক্ৰিয়া কেনেকৈ লুকুৱাব ৰাহুলে?’ এই প্ৰশ্ন ৰাহুললৈ এৰিছে অমিত মালব্যই। দেওবাৰে ৰাহুল গান্ধীৰ নেতৃত্বাধীন ভাৰত জোড়ো ন্যায় যাত্ৰা অসমৰ জামুগুৰিহাটত হৈছিল। তাতেই প্ৰথমে জয়ৰাম ৰমেশৰ বাহনত আক্ৰমণ কৰে বুলি অভিযোগ আনিছে কংগ্ৰেছে। BJP ৰ গুণ্ডাই এই আক্ৰমণ চলাইছে বুলি পোনপটীয়াকৈ উল্লেখ কৰিছে কংগ্ৰেছে। জামুগুৰি হাটৰ পাছতেই একাধিক স্থানত ৰাহুলৰ ৰেলীৰ ওপৰত আক্ৰমণ চলিছে।
এক্স হেণ্ডেলত এটা ভিডিঅ’ প’ষ্ট কৰি জয়ৰাম ৰমেশে লিখিছে, ‘শোনিতপুৰৰ জামুগুৰিহাটত এদল বিশৃংখল BJPৰ গুণ্ডাই আমাৰ বাহনৰ ওপৰত আক্ৰমণ চলাইছে। ভাৰত জোড়ো ন্যায় যাত্ৰাৰ পোষ্টাৰ বেনাৰ ফালি পেলাইছে। বাহনৰ উইণ্ডছিল্ডত এইসমূহ লগোৱা আছিল। বাহনলৈ একাংশ উদণ্ডই পানীও ছটিয়াইছে। ভাৰত জোড়ো ন্যায় যাত্ৰাৰ বিৰুদ্ধে একাধিক শ্লোগান দিয়া হৈছে। আমি ধৈৰ্য্য আৰু সংযমেৰে এই পৰিস্থিতি সামৰিছো। গুণ্ডাসকলে পথৰ সন্মুখত ৰৈ আছিল। সেই সমগ্ৰ ঘটনাৰ বাবে অসমৰ মুখ্যমন্ত্ৰী হিমন্ত বিশ্ব শৰ্মাৰ ওপৰতেই আঙুলি তুলিছে জয়ৰাম ৰমেশে। তেওঁ লগতে লিখিছে, ‘এয়া অসমৰ মুখ্যমন্ত্ৰী হিমন্ত বিশ্ব শৰ্মাৰ নিৰ্দেশতেই হৈছে। আমাৰ যাত্ৰা তেওঁ ৰখাব নোৱাৰে। আমাৰ সৈনিক আগুৱাই যাবই।’
কংগ্ৰেছ কমিটিৰ কমিউনিকেশ্ব্যন ক’অৰ্ডিনেটৰ মহিমা সিঙে এই সন্দৰ্ভত লিখিছে, ‘আৰক্ষীক খবৰ দিয়া হৈছে। ছুপাৰিণ্টেন্ডেন্ট ঘটনাস্থলত উপস্থিত হৈছে। আমাৰ যাত্ৰা কভাৰ কৰি থকা কেমেৰামেনৰ সকলো সামগ্ৰী কাঢ়ি লোৱা হৈছে। সামাজিক মাধ্যমৰ চলোৱাৰ বাবে ৰখা আমাৰ টীমৰ সদস্যৰ ওপৰতো আক্ৰমণ চলিছে। বিজেপিৰ গুণ্ডাই আমাক বাৰে বাৰে বাধা দিবলৈ চেষ্টা কৰিছে। ভ্লগাৰৰ কেমেৰা আৰু অন্যান্য সামগ্ৰীসমূহ ঘূৰাই নিদিও বুলিও আমাক পোনপটীয়াকৈ ধমক দিছে গুণ্ডাকেইটাই।’
এই অথন্তৰৰ সময়তে ৰাহুল গান্ধীৰ বাহনৰ সন্মুখত ৰৈ একাংশই জয় শ্ৰী ৰাম ধ্বনিও দিছে। কিন্তু ৰাহুলে সকলোবোৰকে হাঁহিমুখে ফ্লায়িং কিছহে দিছে। সোমবাৰে ৰাম মন্দিৰৰ প্ৰাণ প্ৰতিষ্ঠাৰ দিনটোত ৰাহুল বটদ্ৰৱাত উপস্থিত হোৱাৰ কথা। শ্ৰীমন্ত শংকৰদেৱৰ জন্মস্থান বটদ্ৰৱাত ৰাহুল উপস্থিত থাকিব সেই বিষয়টোক লৈ মুখ্যমন্ত্ৰীয়ে বিৰোধীতা কৰাৰ লগতে ৰাহুলক অনুৰোধো জনাইছিল যে, সেই দিনটোত ৰাহুলে যাতে কোনো ৰেলী নকৰে। কিন্তু ৰাহুলে মুখ্যমন্ত্ৰীৰ কথা আওকান কৰি বটদ্ৰৱাত ৰেলী কৰাৰ প্ৰস্তুতি চলোৱাৰ প্ৰাকমুহূৰ্তত এটাৰ পাছত আনটো অথন্তৰে দেখা দিছে ৰাহুলৰ ন্যায় যাত্ৰাত। ইফালে ৰাহুলৰ আগমনৰ কথা জানি বটদ্ৰৱা থান মেলেজমেণ্ট কমিটিৰ সভাপতি যোগেন্দ্ৰ নাৰায়ণ মহন্তই কয়, ‘ৰাহুল আহিব জানি আমি অতিকৈ সুখী হৈছো। ৰাম মন্দিৰৰ উদ্বোধনী অনুষ্ঠানৰ বাবে সোমবাৰে ১০হাজাৰতকৈয়ো বেছি মানুহ আমাৰ ইয়ালৈ আহিব। ফলত ৰাহুলক সেই সময়ত ভিতৰত প্ৰৱেশৰ অনুমতি আমি দিব নোৱাৰিম। দুপৰীয়া ৩টাৰ পাছত আহক আমি ভালকৈ আতিথ্য দিব পাৰিম।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
