অসম লাইভ২৪ঃ বৰ্তমান তেওঁ এগৰাকী আমোলা। মধ্যপ্ৰদেশৰ খাণ্ডোয়াৰা পুৰনিগমৰ তেওঁ প্ৰথমগৰাকী মহিলা কমিছনাৰ। কিন্তু এই আমোলা হোৱাৰ পথ সহজ নাছিল তেওঁৰ। বৰ্তমান তেওঁক পদবীৰ বাবেই সকলোৱে সন্মান কৰে যদিও এদিন তেওঁৰ সকলোৱে কেৱল মাত্ৰ উপেক্ষাই কৰিছিল। পদে পদে সংগ্ৰাম, যুদ্ধ। এই যুঁজ আছিল পৰিয়ালৰ বিৰুদ্ধেই। সংবাদমাধ্যমৰ সন্মুখত দিয়া এক সাক্ষাৎকাৰত এই কাহিনী তুলি ধৰিছে আইএছ সবিতা প্ৰধান গৌড়াই।
সবিতা বৰ্তমান এগৰাকী সফল আমোলা হোৱাৰ লগতে সফল মাতৃ তথা এগৰাকী সফল জীয়াৰীও। কিন্তু এই সাফল্যৰ নেপথ্যত থকা কষ্টবোৰেই তেওঁক আজি সকলোৰে পৰিচিত কৰি তুলিছে। মধ্যপ্ৰদেশৰ মণ্ডী জিলাৰ এক আদিবাসী পৰিয়ালত জন্ম হৈছিল সবিতাৰ। পৰিয়ালৰ আৰ্থিক অৱস্থাও বিশেষ স্বচ্ছল নাছিল। সৰুৰে পৰাই পঢ়াশুনাৰ প্ৰতি বিশেষ ধাউতি আছিল সবিতাৰ। সেয়ে হাজাৰ বাধা অতিক্ৰম কৰি ৭ কিঃমিঃ দূৰৈৰ এখন স্কুলত দৈনিক খোজেৰে অহা যোৱা কৰিছিল সবিতাই। মণ্ডী জিলাৰ প্ৰথমগৰাকী দশম শ্ৰেণী ছাত্ৰী উত্তীৰ্ণ ছাত্ৰী আছিল সবিতা। ভাল পঢ়াশুনাৰ বাবে বৃত্তিও পাইছিল সবিতাই। সেই বৃত্তিৰ ধনেৰেই পঢ়াশুনা কৰিছিল সবিতাই। দশম শ্ৰেণী উত্তীৰ্ণ হোৱাৰ পাছত কলেজলৈ যাবলৈ বাছৰ ভাড়াও যোগাৰ কৰিব পৰা নাছিল যাৰবাবে দৈনিক খোজেৰেই অহা যোৱা কৰিছিল সবিতাই। দৰিদ্ৰ পৰিয়ালৰ সন্তান হোৱা হেতুকে পিতৃয়ে সবিতালৈ পঢ়ি থাকোতেই অহা বিবাহৰ সম্বন্ধত জীয়াৰীক আগবঢ়াই দিলে। পিতৃৰ কথা ৰাখিয়েই সবিতা বিয়াত বহিল। কিন্তু বৈবাহিক জীৱন সুখৰ নহ’ল সবিতাৰ। বিবাহৰ কেইটামান দিনৰ পাছতেই স্বামীৰ অত্যাচাৰ আৰম্ভ হ’ল। প্ৰতিদিনেই স্বামীৰ অত্যাচাৰৰ সন্মুখীন হ’ল সবিতাই।
এই কাৰ্যত স্বামীৰ পিতৃ আৰু মাতৃয়েও সহায় কৰিলে সবিতাৰ স্বামীক। তেওঁ এই সন্দৰ্ভত কয়, ‘ বিবাহৰ পাছতেই মই অন্তসত্বা হ’লো। কিন্তু তেতিয়াও মই ৰেহাই নাপালো। খাদ্যও খাবলৈ দিয়া হোৱা নাছিল মোক। চুৰ কৰি খাদ্য খাইছিলো। অন্তঃসত্ত্বা অৱস্থাতেই মোৰ ওপৰত বিভিন্ন অত্যাচাৰ চলিল। এই অত্যাচাৰ সহ্য কৰিয়েই মই যমজ সন্তানৰ মাতৃ হ’লো। এসময়ত মই অত্যাচাৰ সহিব নোৱাৰি আত্মহত্যা কৰিবলৈকো আগবাঢ়িছিলো। কিন্তু মই আকৌ নিজকে জুঁকিয়াই চালো। নাই মই আত্মহত্যা কৰিলে সন্তান দুটাৰ ক্ষতি হ’ব। তেতিয়াই মই সিদ্ধান্ত সলনি কৰিলো। স্বামীৰ গৃহ ত্যাগ কৰিলো। সন্তানকেইটাও যিহেতু মোৰ লগত আছিল সেয়ে মই এখন বিউটি পাৰ্লাৰত কাম কৰা আৰম্ভ কৰিলো।’
ইয়াৰোপৰি সবিতাই কয়, ‘মই আকৌ নতুনকৈ পঢ়াশুনা আৰম্ভ কৰিলো। ইন্দোৰ বিশ্ববিদ্যালয়ত পাবলিক এডমিনিষ্ট্ৰেটিভত স্নাতকোত্তৰ কৰিলো। তাৰপাছতেই ইউপিএছছি পৰীক্ষাৰ বাবে প্ৰস্তুতি আৰম্ভ কৰো। ২০১৭ চনত প্ৰথমবাৰতেই মই ইউপিএছছি পৰীক্ষাত উত্তীৰ্ণ হ’লো। কাৰণ মোৰ হাৰি যোৱাৰ মানসিকতা নাছিল। মনটোক ইমান যোগাত্মক কৈ গঢ়িছিলো যে মই জীৱনত সফল হমেই বুলি ধৰি লৈছিলো। সৰুৰে পৰাই আৰম্ভ হোৱা সংগ্ৰাম বিবাহৰ পাছত আৰু জটিল হৈ পৰিছিল। সেই জটিলতাবোৰেই মোৰ সফল হোৱাৰ পথ মুকলি কৰি দিলে। মই আজি নিজকে সফল বুলি ক’ব পাৰো।’
’২১ চনত খাণ্ডোৱা পৌৰনিগমৰ প্ৰথম মহিলা কমিছনাৰ হিচাপে নিযুক্তি লাভ কৰিছে সবিতাই। তাত নিযুক্তি লাভ কৰিয়েই এলেকাটোৰ সকলো মাফিয়াকেই দমন কৰাত সফল হৈছে সবিতা। কামৰ বাবেও জনপ্ৰিয় হৈ পৰা আইএএছ অফিচাৰগৰাকীৰ এই কাহিনী বহুতেই নাজানিছিল। শেহতীয়াভাৱে তেঁও ৰাষ্ট্ৰীয় সংবাদমাধ্যমত দিয়া এক সাক্ষাতকাৰৰ পাছতহে এই বিষয়টো সকলোৰে দৃষ্টিগোচৰ সৈতে। ৪মহীয়া সন্তানক কোলাত লৈ অফিচত যোগ দিওতেই তেওঁৰ অসাধাৰণ ব্যক্তিত্বত সকলো মোহিত হৈছিল। পাছলৈ এই সাফল্যৰ আঁৰৰ কাহিনীয়ে এতিয়া বহু নাৰীকেই প্ৰেৰণা দিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
