অসম লাইভ২৪ঃ ৫৭ বছৰ বয়সত জীৱনৰ দ্বিতীয় ইনিংছ আৰম্ভ কৰিলে অভিনেতা আশীষ বিদ্যাৰ্থীয়ে। প্ৰথমা পত্নী পিলু বিদ্যাৰ্থীৰ সৈতে বিবাহবিচ্ছেদৰ কিছু দিন পাছতেই আকৌ বিবাহপাশত আৱদ্ধ হ’ল অভিনেতা আশীষ বিদ্যাৰ্থী। অসমীয়া জীয়াৰী তথা প্ৰতিষ্ঠিত ফেশ্বন ডিজাইনাৰ ৰূপালীৰ সৈতে বিবাহপাশত আৱদ্ধ হৈছে অভিনেতাগৰাকী। বিগত প্ৰায় কেইবাদিন ধৰি তেওঁৰ বিবাহৰ চৰ্চা চলিছে। কোনোৱে যদি এই বিবাহক প্ৰশংসা কৰিছে কোনোৱে আকৌ সমালোচনাও কৰা দেখা গৈছে। এই কটাক্ষমূলক কথাৰ উত্তৰো সামাজিক মাধ্যমযোগে আশীষ বিদ্যাৰ্থীয়ে দিছে। অভিনেতাজনে কোৱা অনুসৰি, ‘মোৰ দ্বিতীয় বিবাহে বহুজনৰ মনত আঘাত দিছে। বহুতেই এই কথাক সহ্যও কৰা নাই। মোৰ বাবেও দ্বিতীয় বিবাহৰ সিদ্ধান্ত সহজ নাছিল। মোৰ পৰিয়ালেও এই বিবাহক সহজভাৱে লোৱা নাই।’
কিয় প্ৰথমা পত্নীৰ সৈতে বিবাহ বিচ্ছেদ হ’ল সেই কথাও জনালে আশীষ বিদ্যাৰ্থীয়ে। এই সন্দৰ্ভত অভিনেতাজনে কয়, ‘কাজিয়া, অশান্তি নাথাকিলে মানুহে কেতিয়াও বিচ্ছেদ নিবিচাৰে। কিন্তু এই কথা হয়তো বহুতেই বিশ্বাস নকৰিব যে, দুজন ব্যক্তিয়ে শান্তিপূৰ্ণভাৱেও বিচ্ছেদ ল’ব পাৰে। আচলতে মানুহবোৰ এনেকুৱা যে সমালোচনা কৰিবলৈ এটা টপিক পালে সেইটোতেই খামুচি থাকে। মোৰ ক্ষেত্ৰতো তেনেকুৱাই হৈছে। পিলু মোৰ প্ৰথমা পত্নী। তেওঁ মোৰ সন্তানৰ মাতৃও। তেওঁৰ সৈতে মোৰ বহু স্মৃতি আছে। সকলোবোৰ স্মৃতিয়েই সুখৰ। পিলু মোৰ পত্নীয়েই নহয় তেওঁ মোৰ খুব ভাল বন্ধুও। আপোনালোকে নাভাৱিব যে মই খুব আনন্দমনেৰে দ্বিতীয় বিবাহৰ সিদ্ধান্ত লৈছো। এই সিদ্ধান্ত লওঁতে মই বহু মানসিক সংঘাতৰ মাজেৰে নিজকে পাৰ কৰিছো।’
ইপিনে দ্বিতীয় পত্নী ৰূপালীৰ প্ৰসংগত অভিনেতাজনে কয়, ‘পিলুৰ সৈতে বিচ্ছেদৰ পাছতেই মোৰ ৰূপালীৰ সৈতে দেখা হৈছিল। তাৰপাছতেই আৰম্ভ হৈছিল আন এক অধ্যায়। আমি দুয়ো দুয়োকে অজানিতেই বুজিবলৈ চেষ্টা কৰা হ’লো। মোৰ সৈতে চিনাকী হোৱাৰ সময়ত ৰূপালীৰ কোনো বন্ধুও নাছিল। তেওঁয়ো মোক লগ পোৱাৰ ৫বছৰ পূৰ্বেই স্বামীক হেৰুৱাইছিল। তেওঁয়ো দ্বিতীয় বিবাহৰ কথা তেতিয়া কোনো কাৰণতে ভৱা নাছিল। কিন্তু আমি নজনাকৈয়ে এজনে আনজনৰ হাতখন ধৰিলো। তাৰপাছতেই লাহে লাহে আমাৰ মনত ঘৰ বন্ধাৰ সপোন এটাই গা কৰি উঠিল। এনেকৈ কাষ চাপি গ’লো যে আমি বিবাহৰ সিদ্ধান্তই লৈ পেলালো।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
