অসম লাইভ ২৪ঃ লখিমপুৰৰ অসম-অৰুণাচল সীমান্তত তীব্ৰ উত্তেজনা। ৰঙা সংৰক্ষিত বনাঞ্চলত অসমৰ বন বিভাগৰ দলক আবদ্ধ কৰিলে অৰুণাচলীয়ে। অবৈধ দখলদাৰী অৰুণাচলী দুৰ্বৃত্তই কাঢ়ি নিলে বন বিষয়াৰ ম’বাইল, পৰিচয় পত্ৰ। বনৰক্ষীৰ বন্দুক কাঢ়ি নিয়াৰ চেষ্টা চলাই উপদ্ৰৱকাৰী অৰুণাচলীয়ে। সীমান্তত চলি থকা পাৱাৰগ্ৰীডৰ লাইনৰ কাম পৰিদৰ্শন কৰিবলৈ গৈছিল লখিমপুৰৰ DFO অশোক কুমাৰ দেৱ চৌধুৰীসহ এটা বনবিভাগৰ দল। সেই সময়তে ৰঙা বনাঞ্চলত অৰুণাচলীয়ে পথ নিৰ্মাণ কৰি থকা দেখি বাধা দিছিল বনবিভাগৰ দলটোৱে। তাতেই ক্ষুণ্ণ হৈ অৰুণাচলীয়ে আবদ্ধ কৰে বনবিভাগৰ দলটোক। কাঢ়ি লয় DFO গৰাকীৰ মোবাইল ফোন, পৰিচয়পত্ৰ। নিজকে অৰুণাচলৰ ছাত্ৰ সংগঠনৰ নেতা-সদস্য বুলি পৰিচয় দিয়া দখদাৰীহঁতে বনৰক্ষীৰ অস্ত্ৰও কাঢ়ি লোৱাৰ চেষ্টা চলায়। ইমানেই নহয় অৰুণাচলী দুৰ্বৃত্তই ফালি পেলায় বনৰক্ষীৰ পোছাকো।
ৰঙা বনাঞ্চলত অৰুণাচলীৰ উৎপাতৰ খবৰ পাই ঘটনাস্থলীলৈ ৰাওনা হয় লখিমপুৰৰ বনবিভাগ আৰু আৰক্ষীৰ বিশাল বাহিনী। আৰু তেওঁলোকে অৰুণাচলী দুৰ্বৃত্তই আবদ্ধ কৰি ৰখা বনবিভাগৰ দলটোক মুকলি কৰি আনে। কিন্তু, অৰুণাচলীৰ এই আগ্ৰাসন ৰোধৰ বাবে সক্ষম হ’বনে অসম চৰকাৰ? অসমৰ মাটিত অবৈধভাৱে পথ নিৰ্মাণৰ আঁচনিত যে অৰুণাচল চৰকাৰৰ সন্মতি আছে সেয়া দুগ্ধপোষ্য বালকৰো বোধগম্য। উল্লেখ্য অৰুণাচলতো চলি আছে পেমা খাণ্ডুৰ নেতৃত্বত বিজেপিৰ চৰকাৰ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
